អន្តរជាតិ
COVID-19៖ ៧នាក់ហើយដែលស្លាប់នៅកូរ៉េខាងត្បូង ខណៈអ្នកជំងឺឡើងដល់៧៦៣នាក់ ប្រភពរូប៖ The Korea Herald
× អាជ្ញាធរសុខាភិបាលកូរ៉េខាងត្បូង បានរកឃើញករណីឆ្លងជំងឺផ្លូវដង្ហើមបង្កឡើងដោយកូរ៉ូណាវីរុស (COVID-19) ចំនួន ១៦១នាក់បន្ថែមទៀត នៅព្រឹកថ្ងៃ២៤ ខែកុម្ភៈ។ តួលេខថ្មីនេះ ធ្វើឲ្យអ្នកជំងឺសរុបទូទាំងប្រទេសកូរ៉េខាងត្បូងឡើងដល់ ៧៦៣នាក់។
ក្នុងសេចក្តីថ្លែងការណ៍ មជ្ឍមណ្ឌលប្រយុទ្ធជំងឺឆ្លងកូរ៉េខាងត្បូង ក៏បានប្រកាសពីករណីស្លាប់២នាក់ថ្មីទៀត ដែលបង្កើនអ្នកស្លាប់ព្រោះ COVID-19 នៅកូរ៉េខាងត្បូងឡើងដល់ ៧ករណីហើយ។ នេះបើតាមការចុះផ្សាយរបសទីភ្នាក់ងារព័ត៌មាន Yonhap ។
ក្នុងចំណោមអ្នកឆ្លងCOVID-19ថ្មីទាំង១៦១នាក់ អ្នកជំងឺ ១៤២នាក់ គឺស្ថិតក្នុងទីក្រុង Daegu ដែលមានចម្ងាយ៣០០គីឡូម៉ែត្រពីរដ្ឋធានី សេអ៊ូល។ ហើយចំណែក ៤ ករណីផ្សេងទៀត ត្រូវបានរាយការណ៍ថា រកឃើញក្នុងទីក្រុង សេអ៊ូល ។
អ្នកឆ្លងនៅក្រុង Daegu ភាគច្រើនគឺជាប់ពាក់ព័ន្ធនឹងវិហារសាសនាគ្រឹស្ត Shincheonji ក្នុងក្រុង Daegu ភាគខាងត្បូងនៃប្រទេសកូរ៉ខាងត្បូង។ អភិបាលក្រុង Daegu ក្រុងធំបំផុតលំដាប់ទី៤របស់កូរ៉េខាងត្បូង ជាមួយប្រជាជនជាង២,៨លាននាក់ បានអំពាវនាវឲ្យពលរដ្ឋសម្ងំក្នុងផ្ទះ និងបញ្ចៀសការដើរហើរ ប្រសិនបើមិនចាំបាច់។
សូមបញ្ជាក់ថា នាថ្ងៃអាទិត្យទី២៣ ខែកុម្ភៈ ប្រធានាធិបតីកូរ៉េខាងត្បូង មូន ចេអ៊ីន បានលើកឡើងថា COVID-19 គួរតែដោះស្រាយដោយវិធានការម៉ត់ចត់។ ពាក់ព័ន្ធទៅនឹងបញ្ហានេះ រដ្ឋាភិបាលកូរ៉េខាងត្បូង នឹងដំឡើងកម្រិតប្រកាសអាសន្នរបស់ប្រទេស ជុំវិញCOVID-19 ទៅ«កម្រិតខ្ពស់បំផុត» ដោយផ្អែកទៅតាមការផ្តល់អនុសាសន៍របស់ក្រុមអ្នកជំនាញ៕
© រក្សាសិទ្ធិដោយ thmeythmey.com