COVID-19
ជាតិ
សង្គមជាតិ
ឆ្នាំនេះមិនដឹកពលរដ្ឋទៅតាមខេត្ត តែអ្នកបើករថយន្តក្រុងសាធារណៈ ក៏មិនបានទៅស្រុកកំណើតដែរ
×![]()
ភ្នំពេញ៖ រៀងរាល់វេលាចូលឆ្នាំខ្មែរ អ្នកបើកបររថយន្តក្រុងសាធារណៈ តែងមមាញឹកដឹកពលរដ្ឋទៅតាមបណ្តាខេត្ត ដែលធ្វើឲ្យពួកគាត់គ្មានពេលទៅលេងក្រុមគ្រួសារនៅស្រុកកំណើត។ ឆ្នាំនេះ ក៏មិនខុសពីឆ្នាំមុនដែរ អ្នកបើកបររថយន្តក្រុងសាធារណៈ មិនបានទៅស្រុកកំណើតឡើយ បើទោះជាបុណ្យចូលឆ្នាំត្រូវផ្អាកក៏ដោយ។ ទោះសេវាកម្មរថយន្តក្រុងនៅក្នុងរាជធានីភ្នំពេញ ត្រូវបានផ្អាក ក៏ពួកគាត់នៅបំពេញការងារនៅកន្លែងជាធម្មតា។
លោក អ៊ុច សំបុក អ្នកបើករថយន្តក្រុងសាធារណៈ មិនបានទៅស្រុកកំណើតនៅខេត្តតាកែវ ឡើយនៅឆ្នាំនេះ ដោយសារត្រូវប្រចាំការនៅកន្លែងធ្វើការ។ តាមពិតទៅ លោកគ្រោងទៅជួបជុំគ្រួសារនៅឆ្នាំនេះ ប៉ុន្តែក្រោយមករដ្ឋាភិបាលបានចេញប្រកាសឲ្យបុគ្គលរដ្ឋ និងឯកជនធ្វើការធម្មតាវិញ។ លោក អ៊ុច សំបុក បានរៀបរាប់ប្រាប់សារព័ត៌មានថ្មីៗដូច្នេះ៖«ឆ្នាំនេះ ខ្ញុំមិនបានទៅស្រុកកំណើតទេ ដោយឆ្នាំនេះខ្ញុំនៅយាម។ សម្រាប់ខ្ញុំ ចូលឆ្នាំ ឬមិនចូលឆ្នាំ វាមិនមានបញ្ហាអ្វីឡើយ ដោយសារខ្ញុំត្រូវមានបេសកម្មកន្លងទៅ ក៏ខ្ញុំអត់មានពេលឈប់នៅថ្ងៃចូលឆ្នាំ។ ដល់ចូលឆ្នាំហើយ ទើបបានឈប់សម្រាក»។
ចំណែកអ្នកបើកបររថយន្តក្រុងសាធារណៈម្នាក់ទៀត គឺលោក សយ សុវណ្ណ។ រាល់ឆ្នាំ លោក សុវណ្ណ មមាញឹកដឹកពលរដ្ឋទៅតាមខេត្ត គឺខេត្តកំពត កែប កំពង់ស្ពឺ និងព្រះសីហនុ។ សម្រាប់ឆ្នាំនេះ ទោះមិនមានការងារដឹកពលរដ្ឋទៅតាមខេត្តក៏ដោយ លោកនៅបានសម្រេចថាមិនទៅស្រុកកំណើតតែម្តងនៅឆ្នាំនេះ ព្រោះលោកបារម្ភពីសុវត្ថិភាពផ្ទាល់ខ្លួន និងក្រុមគ្រួសារផង។ លោក សយ សុវណ្ណ ពន្យល់ប្រាប់សារព័ត៌មានថ្មីៗថា៖«ដោយសារតែខ្ញុំខ្លាចឆ្លងជំងឺហ្នឹង អ៊ីចឹងខ្ញុំអត់ហ៊ានទៅស្រុកទេ។ ខ្ញុំភ័យ ដោយឃើញមានករណីឆ្លងច្រើនអ៊ីចឹង។ ពេលចូលឆ្នាំខ្ញុំនឹងទៅប្រចាំការនៅកន្លែងវិញ។ ពេលមានបទបញ្ជាអីថ្មី យើងនៅតែធ្វើការរបស់យើងធម្មតាទៅ»។ ខ្ញុំតែងតែទៅលេងគាត់ ពេលគាត់តេមក ថាគាត់ឈឺអ៊ីចឹង ខ្ញុំក៏ទៅមើលគាត់ មិនមែនចាំតែពេលបុណ្យទានទេ»។
មិនបានជុំគ្រួសារ នៅឯស្រុកក្នុងអំឡុងចូលឆ្នាំនេះ តែលោក សយ សុវណ្ណ ពេញចិត្តនឹងវិធានការរាជរដ្ឋាភិបាល ដែលផ្អាកពិធីចូលឆ្នាំខ្មែរ ក៏ដូចជាការផ្អាកសេវាដឹកជញ្ជូនពលរដ្ឋ ទៅតាម បណ្តាខេត្ត ដោយពួកគេយល់ថា វិធានការនេះ នឹងជួយរួមចំណែកកាត់បន្ថយការឆ្លងជំងឺកូវីដ-១៩៕
អត្ថបទទាក់ទង
Tag:
អ្នកបើកបរ
រថយន្តក្រុង
COVID-19
© រក្សាសិទ្ធិដោយ thmeythmey.com
