COVID-19
អន្តរជាតិ
កូរ៉េខាងត្បូង ធ្វើតេស្តមនុស្សជាង២ម៉ឺននាក់ដែលពាក់ព័ន្ធករណីឆ្លង COVID-19 នៅតំបន់ Itaewon តំបន់ Itaewon។ រូបភាព៖ Yonhap
× អាជ្ញាធរសុខាភិបាលកូរ៉េខាងត្បូង បានធ្វើតេស្តមនុស្សច្រើនជាង ២ម៉ឺននាក់ ដែលមានពាក់ព័ន្ធនឹងតំបន់ពហុវប្បធម៌ Itaewon ដើម្បីស្វែងរកអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស(COVID-19)។ បើតាមការអះអាងរបស់អភិបាលក្រុងសេអ៊ូលនៅថ្ងៃទី១៤ ខែឧសភា ការធ្វើតេស្តក្នុងអត្រាដ៏ច្រើនបែបនេះ គឺធ្វើឡើងក្រោមគោលការណ៍ «ធ្វើតេស្តសេរី និងសម្ងាត់» ចំពោះបុគ្គលដែលធ្លាប់បានទៅក្លិបកម្សាន្តក្នុងតំបន់ Itaewon ។
តំបន់ពហុវប្បធម៌ Itaewon ត្រូវបានអាជ្ញាធរសុខាភិបាលកូរ៉េខាងត្បូង ចាត់ទុកថាជាតំបន់ផ្ទុះថ្មីនៃ COVID-19។ គិតត្រឹមថ្ងៃទី១៣ ខែឧសភា ករណីឆ្លងកូរ៉ូណាវីរុស ទាក់ទងនឹងក្លិបកម្សាន្តក្នុងតំបន់ Itaewon បានកើនដល់ ១២០ករណី ក្នុងនោះសេអ៊ូលមាន ៧២ករណី។ ករណីឆ្លងនេះ ត្រូវបានគេចាត់ទុកករណីឆ្លងលើកទី២ (Secondary Infection) នៅក្នុងកូរ៉េខាងត្បូង ។
បើតាមការចុះផ្សាយរបស់ទីភ្នាក់ងារ Yonhap ដោយព្រួយបារម្ភពីការរីកសាយភាយ COVID-19 ជាថ្មី អាជ្ញាធរកូរ៉េខាងត្បូង បានពន្លឿនការធ្វើតេស្តយ៉ាងខ្លាំង លើបុគ្គលដែលមានជាប់ពាក់ព័ន្ធនឹងតំបន់ Itaewon។ តាមរយៈកិច្ចសម្ភាសជាមួយវិទ្យុ TBS អភិបាលក្រុងសេអ៊ូល លោក Park Won-soonបានបញ្ជាក់ថា៖«ចំនួននៃការធ្វើតេស្ត ដែលទាក់ទងនឹងការផ្ទុះកូរ៉ូណាវីរុស នៅក្នុងតំបន់ Itaewon បានកើនដល់ចំនួន ២៤ ០៨២ហើយ»។
ការធ្វើតេស្តដ៏ច្រើនបែបនេះ គឺធ្វើឡើងបន្ទាប់ពីរដ្ឋាភិបាលកូរ៉េខាងត្បូង បានអនុម័តគោលការណ៍ «ធ្វើតេស្តដោយសេរី និងសម្ងាត់» ចំពោះអ្នកដែលមានជាប់ពាក់ព័ន្ធក្លិបកម្សាន្ត ក្នុងតំបន់ពហុវប្បធម៌មួយនេះ។ មូលហេតុ ដែលនាំឲ្យបង្កើតគោលការណ៍នេះ គឺដោយសារមនុស្សមួយចំនួន ដែលបានចូលកម្សាន្តក្នុងក្លិបស្រលាញ់ភេទដូចគ្នា មិនចង់ចេញមុខឡើយអំឡុងពេល COVID-19 ។
បើតាមការបញ្ជាក់របស់លោកអភិបាលក្រុង រដ្ឋាភិបាលគ្មានគម្រោងបញ្ចេញតួលេខដែលមានពាក់ព័ន្ធនឹងគោលការណ៍សម្ងាត់នេះទេ ព្រោះវាជាការធ្វើតេស្តដោយសម្ងាត់។ មិនត្រឹមតែប៉ុណ្ណោះ លោកអភិបាលក្រុង ក៏បានព្រមានដែរថា ជនទាំងឡាយណា ដែលមិនគោរពតាមបញ្ជាធ្វើតេស្តនេះ ត្រូវប្រឈមនឹងប្រាក់ពិន័យរហូតដល់ជាង ១៦០០ដុល្លារ។
សូមបញ្ជាក់ថា តួលេខ COVID-19 សរុបរបស់កូរ៉េខាងត្បូង បានកើនឡើងដល់ ១០ ៩៩១ករណី អ្នកស្លាប់ចំនួន ២៦០នាក់ និងអ្នកជាសះស្បើយមានចំនួន ៩ ៧៦២ករណី ដោយគិតត្រឹមថ្ងៃទី១៤ ខែឧសភា៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com