ជាតិ
មេសហជីព និងអ្នកសេដ្ឋកិច្ច ចង់ឲ្យរដ្ឋាភិបាលបន្ថែមយុទ្ធសាស្ត្រ ជួយអ្នកធ្វើការក្រៅប្រព័ន្ធ
ពលរដ្ឋប្រកបអាជីវកម្មលក់ដូរនៅខេត្តព្រះសីហនុ និង អ្នកធ្វើការសេវាកម្មកម្សាន្ត (រូបពីគណនីហ្វេសប៊ុករបស់លោក អ៊ី សុខឡេង និង ThmeyThmey)
×![]()
ដោយ: ឡាយ សុភាវតី
ភ្នំពេញ៖ មេសហជីព អ្នកជំនាញផ្នែកសេដ្ឋកិច្ច និង សង្គមស៊ីវិល មើលឃើញ ភាពខ្វះចន្លោះ ក្នុងយុទ្ធសាស្ត្ររដ្ឋាភិបាល ចំពោះអ្នកធ្វើការក្រៅប្រព័ន្ធ។ ពួកគេ ជំរុញឲ្យរដ្ឋាភិបាល បន្ថែមយុទ្ធសាស្ត្រ ជួយដល់អ្នកធ្វើការក្រៅប្រព័ន្ធសេដ្ឋកិច្ចទាំងនោះ។ តែមន្ត្រីរដ្ឋាភិបាល តបថា រដ្ឋាភិបាល ខិតខំជួយហើយ។ 
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ប្រាប់សារព័ត៌មានថ្មីៗ នៅថ្ងៃទី២៨ ខែមិថុនាថា រដ្ឋាភិបាលគួរចុះស្រង់ស្ថិតិអ្នកធ្វើការក្រៅប្រព័ន្ធ ធ្វើបណ្ណបេឡាជាតិរបបសន្តិសុខសង្គម (ប.ស.ស) និងបណ្ណសមធម៌។ លើសពីនេះ លោក យល់ថា រដ្ឋាភិបាលគួរកំណត់ឲ្យមានការពន្យារពេលសងប្រាក់ទៅស្ថាប័នហិរញ្ញវត្ថុទាំងការប្រាក់និងដើម។ លោក ថែមទាំងជំរុញឲ្យរដ្ឋាភិបាល ជួយសម្រួលដល់ការលក់ដូររបស់អ្នកប្រកបរបរក្រៅប្រព័ន្ធ និងធ្វើយ៉ាងណាឲ្យមានការបញ្ចុះតម្លៃតូបឬទីតាំងជួល៥០ភាគរយ។
យ៉ាងណាក៏ដោយ មេសហជីពរូបនេះ បានថ្លែងថា៖ «កន្លងមក គោលការណ៍របស់រដ្ឋាភិបាលបានជួយដល់អ្នកក្រៅប្រព័ន្ធយើងតិចតួចប៉ុណ្ណោះ លើការរៀបចំឥណទានឡើងវិញនិងចុះបណ្ណធ្វើបណ្ណសមធម៌។ ប៉ុន្តែមិនមានប្រសិទ្ធភាពទេ ដូចការរៀបចំឥណទានឡើងវិញឲ្យបង់តែការប្រាក់ អ្នកក្រៅប្រព័ន្ធខ្លះគ្មានលុយបង់ការប្រាក់ទៀត ហើយការចុះឈ្មោះធ្វើបណ្ណសមធម៌ក៏មិនទាន់មានប្រសិទ្ធដែរ»។
លោក បញ្ជាក់ថា អ្នកប្រកបរបរក្រៅប្រព័ន្ធដូចអ្នករត់ម៉ូតូឌុប មូតូកង់បី និងអ្នកធ្វើការតាមផ្ទះខ្លះបានធ្វើបណ្ណមូលនិធិសមធម៌ហើយ ប៉ុន្តែមិនទាន់ទទួលបានកញ្ចប់ថវិកានៅឡើយទេ។ លោក អះអាងថា ភាគច្រើននៃអ្នកធ្វើការក្រៅប្រព័ន្ធមិនបានធ្វើបែបបទសុំបណ្ណសមធម៌ទេ ដោយសារមិនឃើញមានអាជ្ញាធរចុះសាកសួរ។
ចំណែក អ្នកជំនាញសេដ្ឋកិច្ច លោក ឆេង គីមឡុង ក៏សង្កេតឃើញដែរថា យុទ្ធសាស្ត្ររបស់រដ្ឋាភិបាល មិនទាន់មានប្រសិទ្ធភាពធំទូលាយនៅឡើយទេ សម្រាប់អ្នកធ្វើការក្រៅប្រព័ន្ធ។ ដើម្បីជួយដល់ជនងាយរងគ្រោះ ពិសេសអ្នកធ្វើការក្រៅប្រព័ន្ធ លោក ឆេង គីមឡុង យល់ថា រដ្ឋាភិបាលត្រូវប្រើយុទ្ធសាស្ត្រមិនផ្ទាល់ គឺគួរពង្រឹងហេដ្ឋារចនាសម្ព័ន្ធ ដើម្បីជួយដល់វិស័យទេសចរណ៍។
អ្នកសេដ្ឋកិច្ចរូបនេះ ពន្យល់ពីយុទ្ធសាស្ត្រមិនផ្ទាល់ ដូច្នេះថា៖«ទេសចរណ៍ទាំងអស់នៅក្នុងស្រុកត្រូវរក្សាការពារសុវត្ថិភាពជាចម្បង សន្តិសុខលើផ្នែកសុខភាពមានន័យថា ត្រូវរៀបចំអនាម័យដើម្បីពលរដ្ឋក្នុងស្រុកមានទំនុកចិត្តអាចដើរទសន្សាបាន ដើម្បីឲ្យសេដ្ឋកិច្ចក្នុងស្រុកទាំងសេដ្ឋកិច្ចក្នុងប្រព័ន្ធនិងក្រៅប្រព័ន្ធងើបឡើងវិញ»។
លោក បន្ថែមថា រដ្ឋាភិបាលក៏ត្រូវមើលលើផ្នែកសិប្បកម្មផ្សេងៗផងដែរ ដូចសិប្បកម្មតម្បាញ ម្ហូបអាហារ ដែលជាផ្នែកមួយបម្រើឲ្យវិស័យទេសចរណ៍។ លោក សង្កត់ធ្ងន់ថា វិស័យទាំងអស់នេះ គួរតែទទួលបានការឧបត្ថម្ភ និងការយកចិត្តទុកដាក់។
យ៉ាងណាក៏ដោយ លោក ទទួលស្គាល់ថា កន្លងមករដ្ឋាភិបាល គាំទ្រវិស័យសិប្បកម្មនេះ និងជួយឧបត្ថម្ភហើយទុកជាអាទិភាពផងដែរ ប៉ុន្តែនៅខ្វះចន្លោះ។ ដូច្នេះ ការផ្ដោតលើវិស័យកសិកម្មនិងកសិឧស្សាហកម្ម សំខាន់សម្រាប់ទាក់ទាញភ្ញៀវទេសចរជាតិនិងអន្តរជាតិ ដើម្បីសេដ្ឋកិច្ចរបស់ពលរដ្ឋងើបឡើងវិញ។
លោក គីមឡុង ក៏យល់ដូចគ្នានឹង លោក វន់ ពៅ ដែរ ថាគួរតែពន្យារពេលសង់ប្រាក់ត្រឡប់ទៅស្ថាប័នហិរញ្ញវត្ថុវិញ។ ទន្ទឹមនឹងនេះ លោក ចង់ឲ្យរដ្ឋាភិបាល ធ្វើអន្តរាគមន៍បន្ធូរបន្ថយពន្ធផ្សេងៗ ដល់ស្ថាប័នឯកជនបន្ថែមទៀតផងដែរ ក្នុងដំណាក់កាលកូវីដ-១៩។
រីឯ លោក មឿន តុលា នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (CENTRAL) ស្នើឲ្យរដ្ឋាភិបាល កាត់បន្ថយថ្លៃទឹក និងថ្លៃភ្លើង ជាដើម។ លោក ក៏ចង់មានការពន្យាពេលសងបំណុលធនាគារដែរ និងឧបត្ថម្ភថវិកាមួយចំនួនដល់អ្នកគ្មានការងារធ្វើ។
លោក សង្កេតឃើញថា រដ្ឋាភិបាល ក៏បានប្រឹងប្រែងដែរ ក្នុងការជួយដល់អ្នកបាត់បង់ការងារ និងទប់មិនឲ្យតម្លៃសាំងឡើងខ្ពស់ ព្រមទាំងបន្ធូរបន្ថយពន្ធ ដល់វិស័យមួយចំនួនទៀត ដែលរងគ្រោះក្នុងអំឡុងពេលកូវីដ-១៩។ ប៉ុន្តែ សម្រាប់លោក ការប្រឹងប្រែងនេះ មិនទាន់គ្រប់គ្រាន់នៅឡើយទេ។
ផ្ទុយពីអ្នកទាំង៣ខាងលើ លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ និយាយថា រដ្ឋាភិបាលបានខិតខំជួយដោះស្រាយបញ្ហាពលរដ្ឋជាពិសេសជនងាយរងគ្រោះដោយផ្ទាល់និងបន្ទាន់ជាបណ្ដើរៗហើយ ទោះមិនទាន់ល្អ១០០ភាគរយក្តី។ លោក មានប្រសាសន៍ថា៖«យើងបានធ្វើហើយ ដូចជាបុគ្គលិក កម្មករ ដែលគាត់បានទទួលផលពីការដោះស្រាយ គឺគាត់បានទទួលបណ្ដើរៗហើយ នូវប្រាក់បៀវត្សមួយផ្នែកពីរដ្ឋាភិបាលនិងនិយោជក»។
មន្ត្រីជាន់ខ្ពស់ក្រសួងសេដ្ឋកិច្ចរូបនេះ អះអាងទៀតថា ពលរដ្ឋក្រីក្រនិងរងផលប៉ះពាល់នៅអំឡុងពេលេជំងឺកូវីដ-១៩នេះ នឹងទទួលបានប្រាក់ឧបត្ថម្ភពីរដ្ឋាភិបាលតាមការចុះស្រង់ទិន្ន័យរបស់ក្រសួងផែនការ។
សូមបញ្ជាក់ថា រដ្ឋាភិបាល ចាប់ផ្តើមបើសាច់ប្រាក់ ជូនដល់ជនក្រីក្រដែលមានបណ្ណសមធម៌ហើយ។ ពលរដ្ឋក្រីក្រដែលក្រសួងផែនការចុះស្រង់ទិន្ន័យជុំទី១ មានប្រមាណ២,៣លាននាក់ ក្នុងនោះមានប្រមាណ៦០ម៉ឺនគ្រួសារ។ ក្រសួងផែនការ នឹងបន្តចុះស្រង់ទិន្នន័យពលរដ្ឋក្រីក្រ ក្នុងជុំទី២បន្ថែមទៀត៕
Tag:
អ្នកធ្វើការក្រៅប្រព័ន្ធ
© រក្សាសិទ្ធិដោយ thmeythmey.com
