គ្រប់ខេត្ត និងក្រុងរបស់វៀតណាមទាំងអស់ កំពុងស្ថិតក្នុងគ្រោះថ្នាក់កម្រិតខ្ពស់នៃការឆ្លងCOVID-19។ នាយករដ្ឋមន្ត្រីវៀតណាម លោក ង្វៀន ស៊ួនហ្វុក បានលើកឡើងបែបនេះ នៅថ្ងៃទី២៩ ខែកក្កដា ដោយបន្ថែមថា ស្ថានភាព COVID-19 នៅវៀតណាមក្នុងពេលនេះ គឺខុសពីស្ថានភាពCOVID-19 ដែលផ្ទុះឡើងនៅវៀតណាម កាលពីដើមឆ្នាំ។
ករណីឆ្លង COVID-19 នៅក្នុងទីក្រុងដាណាង និងតំបន់ជិតខាង កំពុងធ្វើឲ្យរដ្ឋាភិបាលវៀតណាមឈឺក្បាលយ៉ាងខ្លាំង។ មកទល់ពេលនេះ ដាណាង មានករណីឆ្លង COVID-19 សរុបចំនួន ២៩ករណី។ រដ្ឋាភិបាលវៀតណាម បានចេញវិធានការមួយចំនួន ដូចជាបិទជើងហោះហើរចេញចូលក្រុងដាណាងទាំងអស់ និងហាមការធ្វើដំណើរនៅក្នុងទីក្រុង លើកលែងតែករណីចាំបាច់ប៉ុណ្ណោះ។
ដោយមើលឃើញពីករណីឆ្លងក្នុងស្រុកហក់ឡើង នាយករដ្ឋមន្ត្រីវៀតណាម លោក ង្វៀន ស៊ួនហ្វុក បានប្រាប់មន្ត្រីរបស់ខ្លួនឲ្យចាត់វិធានការឲ្យលឿន និងខ្លាំងបំផុត ដើម្បីទប់ស្កាត់ការរាតត្បាត។ ករណីឆ្លងនៅដាណាង បានធ្វើឲ្យគ្រប់ខេត្តក្រុងវៀតណាមទាំងអស់ស្ថិតក្នុងស្ថានភាពគ្រោះថ្នាក់ខ្ពស់។ ប្រមុខរដ្ឋាភិបាលវៀតណាម បានលើកឡើងបែបនេះ ដោយបន្ថែមថា រលកឆ្លងថ្មីនេះ គឺខុសពីអ្វីដែលបានកើតឡើងកាលពីដើមឆ្នាំ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ទាក់ទិននឹងករណីផ្ទុះ COVID-19 ថ្មីនេះ ប្រមុខរដ្ឋាភិបាលវៀតណាម បានអំពាវនាវឲ្យប្រជាជនទាំងអស់ ប្រុងប្រយ័ត្ន និងរក្សាអនាម័យឲ្យបានខ្ពស់ ដើម្បីបង្ការ COVID-19 ។
ចំណែកនៅទីក្រុងហាណូយឯណោះវិញ ករណីឆ្លងCOVID-19 ក៏មានហានិភ័យខ្ពស់ដែរ។ នាព្រឹកថ្ងៃទី២៩ ខែកក្កដា អាជ្ញាធរវៀតណាម បានរកឃើញករណីសង្ស័យនៃ COVID-19 មួយនៅភោជនីយដ្ឋានភីហ្សាមួយកន្លែងក្នុងរដ្ឋធានីដែលពាក់ព័ន្ធអ្នកទើបមកពីដាណាង។ បន្ទាប់ពីរកឃើញករណីសង្ស័យនេះ អាជ្ញាធរបានបិទភោជនីយដ្ឋាន និងបាញ់ថ្នាំសម្លាប់វីរុស ចំណែកតំបន់ជនសង្ស័យផ្ទុក COVID-19 នេះរស់នៅ ក៏ត្រូវបានអាជ្ញាធររឹតត្បិតការធ្វើដំណើរដែរ។
ទីក្រុងហាណូយ បានទទួលប្រជាជនដែលជម្លៀសពីដាណាងវិញចម្លោះពី១៥០០០នាក់ដល់២០០០០នាក់។ លោក Nguyen Duc Chung ប្រធានគណៈកម្មាធិការប្រជាជនក្រុងហាណូយ បានអំពាវនាវឲ្យប្រជាជន ដែលត្រលប់មកពីដាណាងចាប់ពីថ្ងៃទី៨ ខែកក្កដា ដាក់ចត្តាឡីស័កខ្លួនឯង និងរាយការណ៍ប្រាប់អាជ្ញាធរពីសកម្មភាពរបស់ខ្លួន។
បន្ថែមពីលើនោះ រដ្ឋាភិបាលវៀតណាម បានចេញសេចក្តីថ្លែងការណ៍មួយ ដើម្បីឲ្យនាយកដ្ឋានសុខាភិបាលក្រុងហាណូយ ត្រៀមសម្ភារក្នុងការទប់ស្កាត់ និងប្រយុទ្ធប្រឆាំងជាមួយកូរ៉ូណាវីរុសឲ្យបានរួចរាល់។
នាពេលកន្លងមក អាជ្ញាធរវៀតណាម អះអាងថា ករណីឆ្លងCOVID-19 នៅក្នុងទីក្រុងដាណាង គឺមានពាក់ព័ន្ធនឹងមន្ទីរពេទ្យបីកន្លែងនៅក្នុងក្រុងដាណាង។ លើសពីនេះ អាជ្ញាធរវៀតណាម ក៏បានសង្ស័យលើ ជនអន្តោប្រវេសន៍ខុសច្បាប់មកពីចិនផងដែរ ថា អាចចម្លងកូរ៉ូណាវីរុសនៅពេលនេះដែរ។
សូមបញ្ជាក់ថា គិតមកត្រឹមពេលនេះ វៀតណាមមានករណី COVID-19 សរុបចំនួន ៤៤៦ករណី មិនមានអ្នកស្លាប់ និងអ្នកជាសះស្បើយមានចំនួន ៣៦៩នាក់៕