សង្គមអន្តរជាតិ
អន្តរជាតិ
សភាចិន ចេញមុខរិះគន់អាមេរិកដែលដាក់ទណ្ឌកម្មមន្ត្រីខ្លួន១៤នាក់ លោក លី ចាន់ស៊ូ ប្រធានគណៈកម្មាធិការអចិន្ត្រៃយ៍សភាប្រជាជនចិន ដែលអមដោយអនុប្រធានជាច្រើននាក់ ដឹកនាំកិច្ចប្រជុំនាពេលកន្លងមក។ រូបភាព Xinhua
× សភាប្រជាជនចិន នៅថ្ងៃទី៩ ខែធ្នូ បានរិះគន់ទណ្ឌកម្មរបស់អាមេរិកលើមន្ត្រីជាន់ខ្ពស់របស់ខ្លួន១៤នាក់ ទាក់ទងច្បាប់សន្តិសុខជាតិដែលអនុវត្តនៅហុងកុង។ តាមរយៈអ្នកនាំពាក្យ គណៈកម្មាធិការអចិន្ត្រៃយ៍សភាប្រជាជនចិន បានការពារច្បាប់នេះ ហើយព្រមានដាក់ទណ្ឌកម្មសងសឹកវិញ។
ទណ្ឌកម្មអាមេរិក ដែលបង្កកទ្រព្យសម្បត្តិ និងហាមចូលទឹកដី មកលើអនុប្រធានគណៈកម្មាធិការអចិន្ត្រៃយ៍សភាប្រជាជនចិនចំនួន ១៤នាក់ បានធ្វើឲ្យស្ថាប័នចិន ចេញមុខរិះគន់ជាបន្តបន្ទាប់។ បន្ទាប់ពីក្រសួងការបរទេសចិន គណៈអចិន្ត្រៃ៍នៃសភាប្រជាជនចិនផ្ទាល់ បានចេញមុខការពារសមាជិកជាន់ខ្ពស់របស់ខ្លួនវិញម្ដង។ អ្នកនាំពាក្យគណៈអចិន្ត្រៃ៍នៃសភាប្រជាជនចិន បានអះអាងថា ចិនជំទាស់ជាដាច់ខាត លើទណ្ឌកម្មនេះ។
«ចិននឹងដាក់ទណ្ឌកម្មត្រលប់ទៅវិញ លើមន្ត្រីអាមេរិកណា ដែលលើកយកបញ្ហាហុងកុង ជ្រៀតជ្រែកកិច្ចការផ្ទៃក្នុងហុងកុង និងបំផ្លាញសន្តិសុខ និងអធិបតេយ្យរបស់ចិន»។ អ្នកនាំពាក្យគណៈអចិន្ត្រៃយ៍នៃសភាប្រជាជនចិន បានលើកឡើងបែបនេះក្នុងសេចក្ដីថ្លែងការណ៍ដែលផ្សាយទីភ្នាក់ងារព័ត៌មានXinhua ។
ដូចទៅនឹងការជំទាស់របស់ក្រសួងការបរទេសចិនដែរ អ្នកនាំពាក្យដដែល អះអាងថា ហុងកុង ជាដែនដីរបស់ចិនសុទ្ធសាធ ព្រោះរដ្ឋធម្មនុញ្ញចិន និងច្បាប់មូលដ្ឋានហុងកុង រួមបញ្ចូលគ្នា បង្កើតជាច្បាប់មូលដ្ឋានមួួ។ បើតាមអ្នកនាំពាក្យដែលមិនបញ្ចេញអត្តសញ្ញាណ ទណ្ឌកម្មអាមេរិក ជាការរករឿងផ្នែកនយោបាយ និងការអនុវត្តបទដ្ឋានពីរ។
ជាមួយគ្នានេះ គណៈអចិន្ត្រៃយ៍នៃសភាប្រជាជនចិន និយាយការពារអនុម័តច្បាប់ខ្លួនទៀតថា សភាប្រជាជនចិន មានអំណាចក្នុងការចាត់ចែងឲ្យហុងកុងអនុវត្តគោលនយោបាយ «ប្រទេសមួយ ប្រព័ន្ធពីរ» គោលនយោបាយ «ប្រជាជនហុងកុង ដឹកនាំហុងកុង» និងស្វ័យភាពកម្រិតខ្ពស់ដោយផ្អែកទៅតាមច្បាប់មូលដ្ឋានរបស់ហុងកុង។
អ្នកនាំពាក្យគណៈអចិន្ត្រៃ៍នៃសភាប្រជាជនចិន បានបកស្រាយថា ច្បាប់សន្តិសុខជាតិហុងកុង គឺផ្អែកទៅតាមរដ្ឋធម្មនុញ្ញចិន និងច្បាប់មូលដ្ឋានរបស់ហុងកុង។ ចំណែកសេចក្តីសម្រេចរបស់សភាប្រជាជនចិន ធ្វើឡើង ដើម្បីកែលម្អប្រព័ន្ធអនុវត្តច្បាប់ នៅហុងកុងតែប៉ុណ្ណោះ។
សូមបញ្ជាក់ថា សម្រាប់ចិន ច្បាប់ដែលបានដាក់ឲ្យអនុវត្តនៅហុងកុងទាំងនោះ គឺដើម្បីធានាពីសន្តិភាព ស្ថិរភាព និងវិបុលភាពរបស់ហុងកុង ជាពិសេស គឺដើម្បីការពារផលប្រយោជន៍ ការជ្រៀតជ្រែករបស់បរទេស ការបំបែកទឹកដី និងការអភិវឌ្ឍផ្សេងទៀតជាដើម៕
© រក្សាសិទ្ធិដោយ thmeythmey.com