វីរបុរសកីឡាបាល់ទាត់ប្រេស៊ីល Pele បានបង្ហោះសារលើបណ្តាញសង្គម Instagram ដោយបង្ហាញពីការមិនពេញចិត្តចំពោះ Cristiano Ronaldo និង Lionel Messi ដែលបានបំបែកកំណត់ត្រាស៊ុតបាល់បញ្ចូលទីច្រើនបំផុតលើលោករបស់ខ្លួននៅពេលថ្មីៗនេះ។ Pele បដិសេធមិនទទួលស្គាល់កំណត់ត្រាថ្មីនេះឡើយ ហើយអះអាងថា លោករកបានគ្រាប់បាល់សរុបដល់ទៅ ១២៨៣ គ្រាប់ឯណោះក្នុងអាជីព។
អស់រយៈពេលជាង ៤០ ឆ្នាំមកហើយដែលកំពូលកីឡាករបាល់ទាត់ Pele បានកាន់កំណត់ត្រាអ្នករកគ្រាប់បាល់ស៊ុតបញ្ចូលទីច្រើនជាងគេក្នុងអាជីពចំនួន ៧៥៧គ្រាប់ ដោយក្នុងនោះគ្រាប់បាល់ដែលបុរសវ័យ៨០ឆ្នាំរកបានច្រើនសម្រាប់ក្លិប Santos ក្នុងចំនួន៦៤៣គ្រាប់ក៏ជាកំណត់ត្រាមួយដែរ។ យ៉ាងណាក៏ដោយ កំណត់ត្រាទាំងពីរនេះត្រូវបានបំបែកទៅហើយនៅពេលថ្មីៗនេះ Cristiano Ronaldo និង Lionel Messi។
កាលពីខែធ្នូកន្លងទៅ Messi បានបំបែកកំណត់ត្រា Pele ដែលរកគ្រាប់បាល់ច្រើនជាងគេសម្រាប់ក្លិបរៀងខ្លួន។ ប្រធានក្រុមជម្រើសជាតិអាហ្សង់ទីនវ័យ៣៣ឆ្នាំរូបនេះ រកគ្រាប់បាល់សរុបឲ្យ Barcelona ចំនួន៦៤៤គ្រាប់ ក្នុងការបង្ហាញខ្លួន៧៤៩ប្រកួត ដោយលើសអតីតខ្សែប្រយុទ្ធប្រេស៊ីលចំនួន១គ្រាប់។ Pele រកបាន៦៤៣គ្រាប់ សម្រាប់ការលេងឲ្យក្លិប Santos របស់ប្រេស៊ីល រយៈពេល១៩រដូវកាល ចន្លោះពីឆ្នាំ១៩៥៦ ដល់១៩៧៤ មុនចាកចេញទៅក្រុមថ្មី New York Cosmos នៅឆ្នាំ១៩៧៥។
ត្រឹមរយៈពេលមិនដល់មួយខែផង ខ្សែប្រយុទ្ធឆ្នើម Ronaldo បានបន្តបំបែកកំណត់ត្រាស៊ុតបញ្ចូលទីច្រើនជាងគេរបស់ Pele ដែលរកបានសរុប ៧៥៧ គ្រាប់ សម្រាប់ក្លិប Santos, New York Cosmos និជម្រើសជាតិប្រេស៊ីល។ Ronaldo ប្រធានក្រុមជម្រើសជាតិព័រទុយហ្គាល់ដែលរកបានពីរគ្រាប់ឲ្យ Juventus កាលពីសប្តាហ៍មុនបានកើនគ្រាប់ស៊ុតសរុបក្នុងអាជីពចំនួន ៧៥៨ គ្រាប់ហើយ។
គ្រាប់បាល់បញ្ចូលទីរបស់ខ្សែប្រយុទ្ធវ័យ៣៥ឆ្នាំទាំង ៧៥៨ គ្រាប់ រកបានរួមបញ្ចូលគ្នារវាងក្លិប Sporting Lisbon, Manchester United, Real Madrid, Juventus និងជម្រើសជាតិព័រទុយហ្គាល់ ចាប់ពីឆ្នាំ២០០២ មក។
អ្វីដែលគួរភ្ញាក់ផ្អើលនោះ ការបំបែកកណត់ត្រារបស់ Ronaldo និង Messi មិនត្រូវបានទទួលស្គាល់ពីសំណាក់ស្តេចបាល់ទាត់ប្រេស៊ីលឡើយ។
Pele ដែលជួយក្រុមរហស្សនាមសាំបាឈ្នះ World Cup ៣សម័យ បានសរសេរលើ Instagram ផ្ទាល់របស់ខ្លួនថា លោកបានស៊ុតបញ្ចូលទីដល់ទៅ ១២៨៣ គ្រាប់ឯណោះ ដែលនេះជាចំនួនច្រើនជិតពាក់កណ្តាលដែលគេបានកត់ត្រាទុក។
លើសពីនេះទៀត ក្លិបប្រេស៊ីល Santos មួយនេះបានចេញសេចក្តីប្រកាសមួយថាចំនួនគ្រាប់បាល់សរុបរបស់ Pele សម្រាប់ក្លិបរបស់ពួកគេតាមពិតមានចំនួនសរុប ១០៩១ គ្រាប់។ Santos បន្ថែមថា៖ «គ្រាប់បាល់ ៤៤៨គ្រាប់ផ្សេងទៀតដែលមិនបានរាប់ចូល គឺ Pele រកបានក្នុងការប្រកួតមិត្តភាពដោយត្រូវប៉ះក្រុមគូប្រជែងខ្សោយ និងក្រុមតូចៗក្នុងតំបន់»។
ការអះអាងតាមរយៈបណ្តាញសង្គមខាងលើនេះ មានន័យថា Pele មិនបានទទួលស្គាល់ Ronaldo និង Messi បានបំបែកកំណត់ត្រាអ្នករកគ្រាប់បាល់ស៊ុតបញ្ចូលទីច្រើនជាងគេលើលោករបស់ខ្លួនឡើយ៕