ជាតិ
សង្គមជាតិ
លោក ផែង វណ្ណៈ សុំទោសព្រះសង្ឃទូទាំងប្រទេស ក្រោយពីក្រសួងព័ត៌មានលុបអាជ្ញាបណ្ណ
×![]()
ភ្នំពេញ៖ ម៉ោងប្រមាណ៨យប់ថ្ងៃទី១៨មីនា លោក ផែង វណ្ណៈ បានចេញលិខិតសុំទោសព្រះសង្ឃគ្រប់ព្រះអង្គនៅទូទាំងប្រទេស លើកំហុសរបស់ខ្លួនដែលមានជេរប្រមាថព្រះមហាវិមលធម្ម ពិន សែម ព្រះចៅអធិការវត្តរាជបូណ៌ ខេត្តសៀមរាប ធ្វើឱ្យប៉ះពាល់ធ្ងន់ធ្ងរលើវិស័យព្រះពុទ្ធសាសនា។ ការសុំទោសជាសាធារណៈពីលោក ផែង វណ្ណៈ នេះ បានធ្វើឡើងបន្ទាប់ពីក្រសួងព័ត៌មាន បានលុបអាជ្ញាបណ្ណលើអាជីវកម្មគេហទំព័រ phengvannaknews.com នារសៀលថ្ងៃនេះ។
«ជាប់គុកជាប់ទៅខ្ញុំលេងវិញហើយ ខ្ញុំអត់យកទៅប្តឹងផ្តល់អ្វីទេនិយាយដោយស្មោះត្រង់។ ប្រសិនបើវ៉ៃកូនខ្ញុំដល់របៀបអ៊ីចឹង ខ្ញុំអត់វ៉ៃទេ ខ្ញុំទៅបាញ់ចោលតែម្តង និយាយត្រង់ អត់អនុវត្តច្បាប់ទេ»។ នេះជាការស្រង់សំដីរបស់លោក ផែង វណ្ណៈ ក្នុងហ្វេសប៊ុក Live របស់ខ្លួន កាលពីថ្ងៃទី១៥មីនា ឆ្នាំ២០២១ ពេលប្រតិកម្មនឹងវិធានការរបស់ព្រះអង្គ ពិន សែម ដែលប្រើរំពាត់ផ្តៅវាយសិស្ស៩អង្គដែលបានប្រព្រឹត្តខុស។
លោក ផែង វណ្ណៈ បានរៀបរាប់នៅក្នុងលិខិតសុំទោសរបស់ខ្លួនថា៖« ដោយមើលឃើញមន្ត្រីពាក់ព័ន្ធចុះទៅ មិនមានចំណាត់ការច្បាប់ចំពោះបុគ្គលសង្ឃ[ព្រះអង្គ ពិន សែម] ដែលប្រព្រឹត្តខុស។ ម្យ៉ាងទៀត ដោយមានចិត្តអាណិតអាសូរចំពោះជនរងគ្រោះដែលទទួលរងរបួសធ្ងន់ធ្ងរនោះ និងដោយសារតែខ្ញុំបាទ ពុំបានយល់ពីវិន័យផ្ទៃក្នុងរបស់ព្រះសង្ឃ ដែលតម្រូវឱ្យអប់រំដោយប្រើអំពើហិង្សាមិនខុសច្បាប់ ខ្ញុំបានរិះគន់ខ្លាំងៗទៅលើមន្ត្រីមួយចំនួន ដែលចុះទៅសម្របសម្រួល និងបុគ្គលសង្ស័យដែលប្រើអំពើហិង្សា រហូតប្រើពាក្យប្រមាថធ្ងន់ធ្ងរ ទៅលើបុគ្គលសង្ឃអង្គនោះ»។
អត្ថបទទាក់ទង
លោក ផែង វណ្ណៈ បានបញ្ជាក់ថា ការរិះគន់ និងប្រមាថលើព្រះអង្គ ពិន សែម ដែលប្រើអំពើហិង្សានោះ គឺលោក គ្មានចេតនាប្រមាថដល់ព្រះសង្ឃគ្រប់អង្គ នៅទូទាំងប្រទេស ឬធ្វើឱ្យប៉ះពាល់ដល់ព្រះពុទ្ធសាសនាទេ ដោយគ្រាន់ចង់បានយុត្តិធម៌សម្រាប់ជនរងគ្រោះតែប៉ុណ្ណោះ។
ក្រសួងព័ត៌មាន សម្រេចលុបអាជ្ញាបណ្ណអាជីវកម្មគេហទំព័រលោក ផែង វណ្ណៈនេះ ជាការវិនិច្ឆយដោយផ្ទាល់ របស់លោក ខៀវ កាញ់ រិទ្ធ រដ្ឋមន្រ្តីក្រសួងព័ត៌មាន ដោយមើលឃើញថា ការជេរប្រមាថររបស់ លោកផែង វណ្ណៈ ទៅលើព្រះមហាវិមលធម្ម ពិន សែម គឺជាការរំលោភបំពាន និងធ្វើឱ្យប៉ះពាល់ដល់សាសនា។ លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មានវិទ្យា និងសោតទស្សន៍នៃក្រសួងព័ត៌មាន មានប្រសាសន៍ដូច្នេះប្រាប់សារព័ត៌មានថ្មីៗ ដោយបានលើកឡើងថា៖«ការពិតទៅយើងធ្លាប់ទទួលពាក្យបណ្តឹងពីស្ថាប័នផ្សេងៗចំពោះគេហទំព័ររបស់លោកផែង វណ្ណៈហ្នឹង ប៉ុន្តែក្រសួងមិនដែលចាត់ការទេ។ ប៉ុន្តែលើកនេះ[លុបអាជ្ញាបណ្ណរបស់លោក ផែង វណ្ណៈ] មិនមែនជាការអនុវត្តតាមពាក្យបណ្តឹងរបស់អ្នកណាទេ គឺទៅតាមឆន្ទានុសិទ្ធ់របស់រដ្ឋមន្ត្រីក្រសួងព័ត៌មានផ្ទាល់»។
សូមជម្រាបថា លោក ផែង វណ្ណៈ ក្រៅពីក្រសួងព័ត៌មានដកអាជ្ញាបណ្ណលើអាជីវកម្មគេហទំព័រ ក៏ត្រូវបាន ព្រះអង្គ ជុំ គឹមឡេង មេគណខេត្តសៀមរាប បានសរសេរលិខិតថ្វាយសម្តេច នន្ទ ង៉ែត ព្រះសង្ឃនាយកនៃព្រះរាជាណាចក្រកម្ពុជា ឱ្យជួយស្នើសុំទៅរដ្ឋាភិបាលដើម្បីមានចំណាត់ការលើលោក ផែង វណ្ណៈ បន្ទាប់ពីអ្នកប្រើប្រាស់បណ្តាញសង្គមរូបនេះ បាននិយាយពាក្យមិនសមរម្យសំដៅទៅព្រះគ្រូចៅអធិការវត្តរាជបូណ៌ ព្រះអង្គ ពិន សែម ជុំវិញសកម្មភាពប្រៀនប្រដៅលើសិស្សគណដែលបានធ្វើខុសវិន័យ កាលពីថ្ងៃទី១៧ ខែមីនា ម្សិលមិញ ផងដែរ៕
Tag:
ផែង វណ្ណៈ
ព្រះសង្ឃ
សាសនា
© រក្សាសិទ្ធិដោយ thmeythmey.com
