លោក ឯក ឃុនដឿន អភិបាលខណ្ឌទួលគោក បានបញ្ជាក់ថា មូលហេតុឈានដល់ការយកសំណាកពលរដ្ឋជាង៣០០នាក់នោះ គឺដោយសារតែពួកគេជាប់ពាក់ព័ន្ធផ្ទាល់ និងប្រយាលជាមួយអ្នកជំងឺកូវីដ-១៩បំប្លែងថ្មី Delta ម្នាក់ដែលជាបុគ្គលិកអនាម័យក្នុងមន្ទីរពេទ្យខ្មែរសូវៀតដែលកំពុងសម្រាកព្យាបាលនៅផ្ទះ ក្នុងភូមិ៥ សង្កាត់បឹងសាឡាង។ 

 

«មានបុគ្គលិកពេទ្យរុស្សីម្នាក់ គឺគាត់ឈឺ ហើយគាត់សុំសម្រាកព្យាបាលនៅផ្ទះ។ ក៏ប៉ុន្តែលទ្ធផលចេញមក គឺគាត់មានវិជ្ជមានកូវីដ-១៩ បំប្លែងថ្មី»។ នេះជាការលើកឡើងរបស់លោកអភិបាលខណ្ឌទួលគោក ដោយបញ្ជាក់ថា ក្នុងចំណោមអ្នកពាក់ព័ន្ធទាំងអស់ ដែលធ្វើតេស្តរហ័សកាលពីយប់ថ្ងៃទី១ ខែសីហា គឺមាន៥នាក់ មានវិជ្ជមានកូវីដ-១៩។

 

បើតាមលោកអភិបាលខណ្ឌទួលគោក សំណាករបស់ពួកគេទាំងអស់ ក៏នឹងយកទៅត្រួតពិនិត្យ នៅវិទ្យាស្ថានប៉ាស្ទ័រកម្ពុជាបន្តទៀត ដើម្បីបញ្ជាក់ថា មានវីរុសកូវីដ-១៩បំប្លែងថ្មី ដែលតា ឬអត់។ 

 

អភិបាលខណ្ឌទួលគោក គូសបញ្ជាក់ដែរថា អាជ្ញាធរបានបិទខ្ទប់ផ្ទះរបស់អ្នកពាក់ព័ន្ធទាំងអស់ជិត២០០គ្រួសារ និងតម្រូវឲ្យធ្វើចត្តាឡីស័ក១៤ថ្ងៃ។ ក្នុងអំឡុងបិទខ្ទប់ភូមិ៥ សង្កាត់បឹងសាឡាងនេះ អាជ្ញាធរ នឹងចុះចែកស្បៀងអាហារដល់ពួកគេផងដែរ។ នេះជាលើកឡើងរបស់លោកអភិបាលខណ្ឌទួលគោក ដោយរៀបរាប់ដូច្នេះថា៖ «ខាងខណ្ឌ កំពុងតែរៀបចំចែកស្បៀងជូនពួកគាត់ ដូចជាអង្ករ ត្រីខ មី និងទឹកស៊ីអ៊ីវ»៕