ជាតិ
រថយន្ត
ឡានរូឡូចាស់មួយគ្រឿងត្រូវបានដាក់តាំងនៅតាមផ្លូវ ដើម្បីជួយលម្អក្រុងស្វាយរៀង
× ស្វាយរៀង៖ មន្ទីរសាធារណការ និងដឹកជញ្ជូនខេត្តស្វាយរៀង បានយកឡានរូឡូចាស់ ម៉ាកសូវៀត ДЧ ប្រភេទ 48 ម៉ូឌែល БТ ១គ្រឿង ទៅដាក់តាំងនៅផ្លូវបំបែកជាបួន ផ្លូវ១០៧ និងផ្លូវ៣១៤ ក្នុងក្រុងស្វាយរៀង ក្រោយបានប្រើប្រាស់ឡាននេះអស់ពេលជាយូរ ហើយក៏មានសភាពចាស់ផងដែរ។ ឥឡូវនេះ ឡានបុរាណនេះ បានក្លាយជាយានយន្តដែលជួយលម្អទីក្រុងស្វាយរៀង។
ដើម្បីជ្រាបកាន់តែច្បាស់ សូមលោកអ្នកនាង ទស្សនាបទយកការណ៍ដែលរៀបចំដោយនាយ យ៉ាន នៃសារព័ត៌មានថ្មីៗដូចតទៅ៖
ត្រីចក្រយានប្រភេទនេះ មានរូឡូតូចតែទូលាយ (១៨៥សង់ទីម៉ែត្រ) មួយខាងមុខនៅកណ្ដាល និងរូឡូធំតែស្ដើងពីរឆ្វេងស្ដាំខាងក្រោយ។ រូឡូខាងមុខ និងខាងក្រោយ មានចន្លោះ ដើម្បីរូឡូខាងក្រោយ ជាន់ត្រឹមស្នាមរូឡូខាងមុខ។ រូឡូខាងមុខទទេ មានទម្ងន់ ១០តោន។ វាធ្ងន់ណាស់ ដើម្បីជាន់ និងរាបស្មើបានល្អ។ ДЧ-48 មានម៉ាស៊ីន Д-37Е ដែលប្រើម៉ាស៊ូត ហើយមានកម្លាំង ៥០សេស។
ДЧ បានផលិតរថយន្ដការដ្ឋាន ប្រភេទ 48 នៅរុស្សី ពីឆ្នាំ១៩៧៤ រហូតដល់ឆ្នាំ១៩៩២។ មានម៉ូឌែល២ ដូចជា: 48А និង 48Б ។ ДЧ-48Б មានស៊េរី៣ ដូចជា 48Б ដើម 48Б-РС និង 48БТ។ ДЧ-48БТ គឺសម្រាប់នាំចេញ ជាពិសេសទៅប្រទេសកុម្មុយនីស្ត។ នេះជាមូលហេតុ ដែលធ្វើឱ្យ ДЧ-48БТ របស់មន្ទីរសាធារណការ និងដឹកជញ្ជូនខេត្តស្វាយរៀង មានផ្លាកដែកជាសេចក្ដីណែនាំសរសេរជាភាសាបារាំង។ ពាក្យរូឡូជាពាក្យខ្ចីពីភាសាបារាំង ដែលវាមានន័យថា ស៊ីឡាំងដែលវិល៕
Tag:
យានយន្ត
ឡានបុរាណ
ឡានរូឡូ
ស្វាយរៀង
© រក្សាសិទ្ធិដោយ thmeythmey.com