តុលាការ ត្រៀមកាត់ក្តីលោក សម រង្ស៊ី ពីបទញុះញង់កងទ័ព

ជាតិ

នយោបាយជាតិ

តុលាការ ត្រៀមកាត់ក្តីលោក សម រង្ស៊ី ពីបទញុះញង់កងទ័ព

18, Feb 2019 , 10:19 pm

រូបភាព

រូបពី AFP៖ លោក សម រង្ស៊ី ដាក់កម្រងផ្កានៅមុខរូបសំណាកលោក ជា វិជ្ជា កាលពីថ្ងៃទី២២ ខែមករា ឆ្នាំ២0១៥ ដែលជាថ្ងៃរម្លឹកខួប១១ឆ្នាំនៃការបាញ់សម្លាប់លោក ជា វិជ្ជា

ដោយ: ថ្មីៗ

លោក ហម ម៉េងសែ ចៅក្រមស៊ើបសួរនៃសាលាដំបូងរាជធានីភ្នំពេញ បានចេញលិខិតជូនដំណឹងពីរផ្សេងគ្នា កាលពីចុងខែមករា ឆ្នាំ២0១៩ ស្តីពីការបិទបញ្ចប់ការស៊ើបសួរលើបទល្មើសប្រមាថព្រះមហាក្សត្រ និងបទល្មើសញុះញង់មិនឲ្យយោធាស្តាប់បញ្ជា ដែលមានលោក សម រង្ស៊ី ជាជនត្រូវចោទ។ លិខិតជូនដំណឹងទាំងនេះ ត្រូវបានសមត្ថកិច្ច យកទៅបិទនៅទីស្នាក់កាលកណ្តាលនៃអតីតគណបក្សសង្គ្រោះជាតិ នៅថ្ងៃ១៨ ខែកុម្ភៈ ឆ្នាំ២0១៩នេះ។

លោក សំ សុគង់ មេធាវីរបស់លោក សម រង្ស៊ី បានប្រាប់សារព័ត៌មានថ្មីៗ តាមទូរសព្ទថា សម្រាប់សំណុំរឿងញុះញង់យោធាមិនឲ្យស្តាប់បញ្ជា ក្រៅពីចេញសេចក្តីជូនដំណឹងស្តីពីការបញ្ចប់ការស៊ើបសួរហើយ ចៅក្រមស៊ើបសួរ ក៏បានចេញដីកាដំណោះស្រាយដែរ ដោយសម្រេចបញ្ជូនសំណុំរឿង ទៅជំនុំជម្រះ។ ប៉ុន្តែ លោក អះអាងថា ដីកាដំណោះស្រាយនោះ មិនទាន់កំណត់កាលបរិច្ឆេទនៃការជំនុំជម្រះឡើយ។

ទាក់ទងនឹងបទល្មើសប្រមាថព្រះមហាក្សត្រ លោកមេធាវី លើកឡើងថា លោក សម រង្ស៊ី ពុំបានពឹងពាក់លោកឲ្យការពារក្តីនោះទេ។ លោកមេធាវី និយាយយ៉ាងដូច្នេះថា៖«ប្រហែលជាគាត់ គិតថាសំណុំរឿងច្រើននិងរញេរញៃពេក ទើបគាត់ខ្ជិលខ្វាយខ្វល់នឹងតុលាការ»។

យ៉ាងណាក៏ដោយ ចៅក្រមស៊ើបសួរ បានចេញលិខិតជូនដំណឹងស្តីពីការបិទការស៊ើបសួរលើសំណុំរឿង ដែលលោក សម រង្ស៊ី ប្រមាថព្រះមហាក្សត្រ។ តែ គេ មិនទាន់ឃើញចៅក្រមស៊ើបសួរ ចេញដីកាដំណោះស្រាយ ដែលត្រូវបញ្ជូនទៅជំនុំជម្រះនៅឡើយទេ។

លោក សម រង្ស៊ី រងបទចោទញុះញង់យោធា កាលពីអំឡុងខែធ្នូ ឆ្នាំ២០១៧ និងរងបទចោទប្រមាថព្រះមហាក្សត្រ កាលអំឡុងខែកក្កដា ឆ្នាំ២០១៨។

បើសរុបទៅ លោក សម រង្ស៊ី បានរងបណ្តឹងមិនតិចជាង១០ទេ ពីសំណាក់ថ្នាក់ដឹកនាំនិងសកម្មជនគណបក្សប្រជាជនកម្ពុជា ដោយក្នុងនោះ មានបណ្តឹងខ្លះ ត្រូវបានជំនុំជម្រះរួចហើយ ហើយបណ្តឹងខ្លះទៀត កំពុងស្ថិតក្នុងចំណាត់ការរបស់តុលាការ៕

អត្ថបទទាក់ទង

ព្រះរាជអាជ្ញា ហៅលោក សម រង្ស៊ី ទៅសួរ ពីបទប្រមាថព្រះមហាក្សត្រ

រដ្ឋមន្ត្រីយុត្តិធម៌ បញ្ជាឲ្យតុលាការចាត់ការលោក សម រង្ស៊ី ពីបទប្រមាថព្រះមហាក្សត្រ

អ្នកនាំពាក្យ៖ លោក សម រង្ស៊ី ប្រមាថព្រះមហាក្សត្រ ដែលត្រូវជាប់ទោសពី១ទៅ៥ឆ្នាំ

លោក សម រង្ស៊ី ខកខានការចូលបំភ្លឺនៅតុលាការ ពីបណ្តឹងកងទ័ព

មេទ័ពប្រកាសប្តឹង, លោក សម រង្ស៊ី ប្រកាសស្វាគមន៍

បណ្តឹង៨ របស់បក្សកាន់អំណាចហ៊ុមព័ទ្ធឯកឧត្តម សម រង្ស៊ី