ថៃ៖ អ្នកបើកបរលើសល្បឿនកំណត់ និងមានជាតិស្រវឹង ប្រឈមនឹងបទចោទមនុស្សឃាត

អន្តរជាតិ

ថៃ៖ អ្នកបើកបរលើសល្បឿនកំណត់ និងមានជាតិស្រវឹង ប្រឈមនឹងបទចោទមនុស្សឃាត

05, Apr 2019 , 9:59 pm

រូបភាព

រូបថត៖ Bangkok Post

ដោយ:

ឧបនាយករដ្ឋមន្ត្រីថៃ ឧត្តមសេនីយ៍ Prawit Wongsuwon បាននិយាយថា លោកបានចេញបញ្ជាឲ្យសមត្ថកិច្ចចោទប្រកាន់បទល្មើសមនុស្សឃាត ចំពោះអ្នកបើកបរជិះលើសល្បឿនកំណត់ និងមានជាតិស្រវឹង ដែលបង្កឲ្យអ្នកដទៃស្លាប់ក្នុងអំឡុងពេលថ្ងៃចូលឆ្នាំថ្មីខាងមុខនេះ។

ថ្លែងនៅឯក្រសួងការពារជាតិថៃ នៅថ្ងៃសុក្រទី៥ ខែមេសា លោក Prawit លើកឡើងថា៖«ខ្ញុំព្រួយបារម្ភថា ការបើកបរដោយមានផ្ទុកជាតិស្រវឹង និងលឿសល្បឿនកំណត់ អាចសម្លាប់អ្នកដទៃ។ យើងត្រូវព្យាយាមកាត់បន្ថយការស្លាប់ដោយសារមូលហេតុទាំងនេះ។ ដូច្នេះហើយ មនុស្សគ្រប់គ្នាដែលល្មើសនឹងល្បឿនកំណត់ ឬបើកបរស្ថិតក្រោមឥទ្ធិពលនៃគ្រឿងស្រវឹង ហើយធ្វើឲ្យអ្នកដទៃស្លាប់នោះ ពួកគេនឹងទទួលខុសត្រូវចំពោះបទល្មើសមនុស្សឃាត»។

ចំណាត់ការថ្មីនេះ នឹងដាក់បន្ថែមជាមួយចំណាត់ការដទៃទៀត ដែលត្រូវបានដាក់ចេញកាលពីថ្មីៗនេះ ក្នុងគោលដៅពង្រឹងសុវត្ថិភាពផ្លូវថ្នល់អំឡុងពេលចូលឆ្នាំថ្មី។ នេះបើតាមការបញ្ជាក់របស់លោក Prawit ដោយបន្ថែមថា ចំណាត់ការផ្សេងទៀតនោះគឺរួមមាន ដកហូតយានជំនិះរបស់អ្នកបើកបរដែលមានផ្ទុកជាតិស្រវឹងជាដើម។

យោងតាមការចុះផ្សាយរបស់សារព័ត៌មាន Bangkok Post លោក Prawit ដែលមានតួនាទីជារដ្ឋមន្ត្រីការពារជាតិថៃផងនោះ បានបញ្ជាក់ជាថ្មីថា អ្នកចូលចិត្តធ្វើដំណើរកម្សាន្តក្នុងពេលចូលឆ្នាំថ្មី នឹងត្រូវអនុញ្ញាតឲ្យធ្វើដំណើរនៅពីបាំងក្រោយនៃរថយន្ត Pickup ដូចធម្មតា។

អត្ថបទទាក់ទង

ពេលចូលឆ្នាំ ថៃអនុញ្ញាតឲ្យអ្នកដំណើរអង្គុយនៅបាំងក្រោយរថយន្ត Pickup វិញហើយ

នៅតៃវ៉ាន់ បើកបរក្នុងពេលស្រវឹងហើយបង្កគ្រោះថ្នាក់ដល់ជីវិត អាចជាប់ទោសប្រហារជីវិត

ថៃពិចារណាដាក់បម្រាមលក់គ្រឿងស្រវឹងនៅថ្ងៃសង្ក្រាន្តដើម្បីបន្ថយគ្រោះថ្នាក់ចរាចរណ៍

សួមបញ្ជាក់ថា ទោះបីជាមានយុទ្ធនាការធានាសុវត្ថិភាពផ្លូវថ្នល់សម្រាប់ឱកាសពិធីបុណ្យចូលឆ្នាំថ្មីក៏ដោយក្តី គ្រោះថ្នាក់ចរាចរណ៍ នៅតែកើតឡើងដល់ ៣៧២៤ ករណី កាលពីឆ្នាំមុន ដែលសម្លាប់មនុស្ស ៤១៨នាក់ និងរបួស ៣៨៩៧នាក់ផ្សេងទៀត។

មូលហេតុនៃគ្រោះថ្នាក់ចរាចរណ៍នេះ គឺបណ្តាលពីមកបើកបរដោយមានផ្ទុកជាតិស្រវឹង និងហួសល្បឿនកំណត់។ យោងតាមស្ថិតិរបស់រដ្ឋាភិបាលថៃ គ្រោះថ្នាក់ចរាចរណ៍ បានសម្លាប់មនុស្ស ២០ ១៦៩នាក់ កាលពីឆ្នាំ២០១៨៕