មិនបំភ្លេចឡើយ! សង្ឃជប៉ុនបន្តអង្គាសបានជាង១ម៉ឺនដុល្លារជួយដល់គ្រួសារសពដែលជនជាតិខ្លួនសម្លាប់

ជាតិ

សង្គមជាតិ

មិនបំភ្លេចឡើយ! សង្ឃជប៉ុនបន្តអង្គាសបានជាង១ម៉ឺនដុល្លារជួយដល់គ្រួសារសពដែលជនជាតិខ្លួនសម្លាប់

17, May 2019 , 12:44 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ សមាគមមិត្តភាពអ៊ិមពិគុ (The Enpuku Friendship Association/EFA) ដឹកនាំដោយព្រះតេជព្រះគុណ Kosei Fujimoto រៃអង្គាសប្រាក់បានចំនួន១១,០០០ដុល្លារ ជូនគ្រួសារសព លោក ហ៊ឹម ចាន់ ដែលជនជាតិជប៉ុន២នាក់ប្លន់សម្លាប់ កាលពីខែមីនា ឆ្នាំ២០១៩ កន្លងទៅនៅភូមិសាស្ត្រស្រុកពួក ខេត្តសៀមរាប។ ព្រះសង្ឃ Fujimoto ជាមួយសមាជិក១៦រូប បានប្រគល់ឱ្យគ្រួសារសព នៅថ្ងៃទី១៦ ខែឧសភា។ ជាមួយគ្នានេះ ព្រះអង្គ និងព្រះសង្ឃខ្មែរ ក៏បាននិមន្ត ដើម្បីសូត្រមន្តបង្សុកូល ឧទ្ទិសកុសល ជូនដល់ដួងវិញ្ញាណក្ខន្ធសពផងដែរ។

អត្ថបទទាក់ទង

តំណាងទូតជប៉ុន ទៅគោរពសពអ្នករត់តាក់ស៊ីដែលត្រូវជនជាតិជប៉ុនប្លន់សម្លាប់

ឯកអគ្គរាជទូតជប៉ុនរំលែកទុក្ខគ្រួសារអ្នករត់តាក់ស៊ី ដែលជនជាតិខ្លួនប្លន់សម្លាប់

តុលាការសម្រេចឃុំខ្លួនជនជាតិជប៉ុន២នាក់ ដែលប្លន់សម្លាប់អ្នករត់តាក់ស៊ីនៅស្រុកពួក

ករណីឃាតកម្ម៖ ជនជាតិជប៉ុននៅកម្ពុជាបន្តកៀងគរគ្នាជួយដល់គ្រួសារអ្នករត់តាក់ស៊ី

«ថវិកានេះ បានមកពីការរៃអង្គាសពីជនជាតិជប៉ុនប្រមាណ២០០នាក់នៅរស់នៅជប៉ុន ដោយពួកគាត់មានទឹកចិត្តអាណិតអាសូរ សោកស្តាយ និងចង់សុំការអភ័យទោសពីគ្រួសារសព»។ នេះជាដីកាអះអាងរបស់ព្រះអង្គ Kosei Fukimoto តាមរយៈអ្នកបកប្រែភាសា ក្នុងបទសម្ភាសតាមទូរសព្ទជាមួយសារព័ត៌មាន ThmeyThmey ។

ប្រធានសមាគមមិត្តភាពអ៊ិមពិគុអង្គនេះ រំពឹងថា ថវិកាជាង១ម៉ឺនដុល្លារបន្ថែមទៀតនេះ អាចជួយសម្រួលដល់ជីវភាពគ្រួសារសព ជាពិសេសការរៀនសូត្ររបស់កូនៗពួកគាត់។ ព្រះអង្គ Fujimoto បានអះអាងថា ព្រះសង្ឃ ក៏ដូចជាជនជាតិជប៉ុនផ្សេងទៀត នឹងបន្តយកចិត្តទុកដាក់លើគ្រួសារសព។

ព្រះអង្គមានសង្ឃដីកាយ៉ាងដូច្នេះ៖ «ការប្រមូលថវិកា វាមិនមែនជាបញ្ហានោះទេ។ អ្វីជាបញ្ហានោះ តើថវិកាដែលខ្ញុំប្រមូលបានឱ្យគ្រួសារសពបន្តទៀតនោះ...តើភរិយាសពប្រើប្រាស់ថវិកាទាំងនេះដោយរបៀបណាដើម្បីឱ្យមានប្រសិទ្ធភាព ឬសម្រាប់ឱ្យកូនចៅបន្តការសិក្សាដល់កម្រិតណា។ ថ្វីដ្បិត ការប្រមូលប្រាក់នេះ មិនអាចឱ្យជនរងគ្រោះរស់ឡើងវិញ ក៏ដោយ ប៉ុន្តែវានឹងជួយឱ្យគ្រួសារសពរស់នៅបានល្អប្រសើរក្នុងរយៈពេលណាមួយ»។

សូមរម្លឹកថា ក្រោយមានករណីប្លន់សម្លាប់ ដែលបង្កឡើងដោយជនជាតិជប៉ុន២រូប នៅក្នុងទឹកដីខេត្តសៀមរាបកាលពីថ្ងៃទី១៧មីនា ឆ្នាំ២០១៩ មានសប្បុរសជនជប៉ុន អង្គការ សមាគមជប៉ុន ស្ថានទូតជប៉ុនប្រចាំកម្ពុជា ក្លិបកីឡាបាលទាត់ បានចូលរួមរំលែកទុក្ខ និងជួយឧបត្ថម្ភថវិកា ដល់គ្រួសារសពជាហូរហែរ ។

រូបភាពផ្តល់ដោយ លោកSophat Keo។

ដោយឡែក ជនជាតិជប៉ុនទាំងពីរនាក់ ដែលបានប្លន់សម្លាប់ លោក ហ៊ឹម ចាន់ មានឈ្មោះថា Reimon Ishi មកពី Chiba និង ឈ្មោះ Ryuji Nakakuki មកពី Fukushima បានសារភាពថា ពូកគេប្លន់សម្លាប់អ្នកបើកតាក់ស៊ីដើម្បីរកលុយដោះបំណុលធនាគារនៅជប៉ុន៕