ប្រធានាធិបតីរុស្ស៊ី លោក វ៉ា្លឌីមៀ ពូទីន បានចេញមុខការពារសមភាគីអាមេរិក ដោយអះអាងថា ការការចោទប្រកាន់ជាផ្លូវការដែលឈានដល់ការដកហូតតំណែងលោក ដូណាល់ ត្រាំ គឺផ្អែកលើ «ហេតុផលប្រឌិត» ។ ទន្ទឹមនេះ មេដឹកនាំរូបនេះ ក៏មិនជឿទេថា លោក ត្រាំ នឹងត្រូវបណ្ដេញចេញពីតំណែងកំពូលនេះឡើយ។
«ខ្ញុំ ពិតជាមិនជឿថា អាណត្តិប្រធានាធិបតី [លោកត្រាំ] បញ្ចប់ត្រឹមនេះឡើយ»។ លោក វ៉ា្លឌីមៀ ពូទីន លើកឡើងបែបនេះក្នុងសន្និសីទព័ត៌មានមួយ នៅថ្ងៃព្រហស្បតិ៍ ១៩ ធ្នូ ដោយឆ្លើយនឹងសំណួរថាតើរុស្ស៊ីមានយុទ្ធសាស្ត្រសម្រាប់បន្តកិច្ចសន្ទនាជាមួយសហរដ្ឋអាមេរិករហូតដល់បញ្ចប់អាណត្តិប្រធានាធិបតីរបស់លោក ត្រាំ ឬ យ៉ាងណា។
លោក បញ្ជាក់ថា សំណុំរឿងដកហូតតំណែងនេះ នឹងត្រូវឆ្លងកាត់ព្រឹទ្ធសភា ដែលបក្សសាធារណរដ្ឋមានមតិភាគច្រើន ម្ល៉ោះហើយ វាមិនទំនងទេថា ពួកគេនឹងចង់ដកហូតអ្នកតំណាងបក្សពួកគេ ដោយផ្អែកលើ «ហេតុផលប្រឌិត» នោះឡើយ។
តាមការចុះផ្សាយរបស់សារព័ត៌មានអាមេរិក CNN មេដឹកនាំរុស្ស៊ីអាយុ៦៧ឆ្នាំរូបនេះ អះអាងទៀតថា «នេះ គឺគ្រាន់ការបន្តសង្គ្រាមនយោបាយផ្ទៃក្នុង បក្សមួយដែលចាញ់ការបោះឆ្នោត នោះគឺបក្សប្រជាធិបតេយ្យ ហើយពួកគេកំពុងព្យាយាមស្វែងរកវិធីថ្មី ដោយចោទប្រកាន់លោកត្រាំថា គប់គិតជាមួយរុស្ស៊ី»។
យ៉ាងណាមិញ ក្រោយមក វាបង្ហាញច្បាស់ថាគ្មានឡើយការគប់គិតណាមួយជាមួយទីក្រុងម៉ូស្គូកើតឡើងទេ ហើយនេះពុំអាចក្លាយជាមូលដ្ឋានសម្រាប់ការប្តឹងដកហូតតំណែងលោកប្រធានាធិបតី ត្រាំ ។ លោក ពូទីន បកស្រាយបែបនេះ ដោយសង្កត់ធ្ងន់ថា ឥឡូវនេះ បក្សប្រជាធិបតេយ្យបានបង្កើតរឿងរ៉ាវពាក់ព័ន្ធនឹងអ៊ុយក្រែនឡើង។
ការចេញមុខការពារលោកដូណាល់ ត្រាំបែបនេះ កើតឡើងខណៈមេដឹកនាំទាំងពីរមានភាពស្អិតល្មួតខុសធម្មតា ដែលត្រូវបានគេមើលឃើញចាប់តាំងពីឆ្នាំ២០១៧មក។ លោក ត្រាំ ធ្លាប់បានឈរខាងលោកប្រធានាធិបតី ពូទីន ដោយបដិសេធការវាយតម្លៃរបស់ភ្នាក់ងារអាមេរិកថា រុស្ស៊ីបានជ្រែតជ្រៀកក្នុងការបោះឆ្នោតអាមេរិកកាលពីឆ្នាំ២០១៦។ ទន្ទឹមនេះ លោក ត្រាំ ក៏បានទាត់ចោលការចោទប្រកាន់ថា លោក ពូទីន ប្រើប្រាស់អំពើហិង្សាប្រឆាំងគូប្រជែងនយោបាយខ្លួន ដោយនិយាយក្នុងឆ្នាំ២០១៥ ថា លោក មិនធ្លាប់បានឃើញភស្តុតាងណាមួយដែលបង្ហាញថា លោកពូទីនសម្លាប់មនុស្សណាម្នាក់ឡើយ។
សូមបញ្ជាក់ថា សភាតំណាង កាលពីថ្ងៃពុធសប្តាហ៍នេះ បានបោះឆ្នោតចោទប្រកាន់ជាផ្លូវការដែលអាចឈានដល់ការដកហូតតំណែងលោកប្រធានាធិបតី ក្រោមបទចោទ រំលោភអំណាច និងរារាំងដំណើការសភា ។ ជាមួយលទ្ធផលបោះឆ្នោតនេះ លោក ត្រាំ បានក្លាយជាប្រធានាធិបតីទី៣ ក្នុងប្រវត្តិសាស្ត្រ ដែលត្រូវបានចោទប្រកាន់ជាផ្លូវការ ហើយឥឡូវនេះ លោក នឹងត្រូវប្រឈមការជំនុំជម្រះក្តីក្នុងព្រឹទ្ធសភាអាមេរិក ដែលរំពឹងនឹងចាប់ផ្តើមនាខែមករា ២០២០ ខាងមុខ។
ការបោះឆ្នោតរបស់សភាតំណាងអាមេរិកនៅថ្ងៃពុធនេះ ធ្វើឡើង៤ខែក្រោយពី មន្ត្រីចារកិច្ចអាមេរិកមួយរូបដែលមិនបញ្ចេញឈ្មោះ (whistleblower) បានដាក់ពាក្យបណ្តឹងទៅសភាក្នុងខែកញ្ញា អំពីការជជែកគ្នាតាមទូរសព្ទរវាងលោក ត្រាំ និងប្រធានាធិបតីអ៊ុយក្រែន។ អំឡុងការជជែកគ្នាតាមរយៈទូរសព្ទក្នុងខែកក្កដានេះ លោក ត្រាំ បានដាក់សម្ពាធលោក Zelensky បើកការស៊ើបអង្កេតលើលោក ចូ បៃឌិន ដែលបច្ចុប្បន្នជាបេក្ខជនបក្សប្រជាធិបតេយ្យឈានមុខម្នាក់ក្នុងការបោះឆ្នោតឆ្នាំក្រោយ ដោយភ្ជាប់ទៅនឹងជំនួយយោធា៕