លោក ដូណាល់ ត្រាំ បេក្ខជនបក្សសាធារណរដ្ឋ បានទទូចឲ្យឈប់រាប់សន្លឹកឆ្នោតផ្ញើមកយឺតក្រោយមណ្ឌលបោះឆ្នោតបិទ ដែលលោកចាត់ទុកថាខុសច្បាប់។ ចំណែក លោក បៃឌិន បេក្ខជនបក្សប្រជាធិបតេយ្យ ជឿជាក់ខ្ពស់ថា នឹងផ្ដួលលោកត្រាំ ខណៈទទូចឲ្យអ្នកបោះឆ្នោតអាមេរិកអត់ធ្មត់ រង់ចាំរាប់សន្លឹកឆ្នោតឲ្យអស់សិន ។
ការរាប់សន្លឹកឆ្នោត ក្លាយជាប្រធានបទចម្រូងចម្រាសក្នុងការបោះឆ្នោតអាមេរិកឆ្នាំ២០២០រវាងលោក ដូណាល់ ត្រាំ និងលោក ចូ បៃឌិន ហើយនោះក៏ព្រោះតែជំងឺកូវីដ-១៩ ដែលបង្ខំឲ្យពលរដ្ឋអាមេរិករាប់លាននាក់បោះឆ្នោតតាមប្រៃសណីយ៍។ ពលរដ្ឋអាមេរិកជាង១០០លាននាក់ បានបោះឆ្នោតមុនកំណត់ ដែលច្រើនជាង២ដងបើធៀបនឹងឆ្នាំ២០១៦។ ក្នុងយុទ្ធនាការ លោក ត្រាំ បញ្ចេញជំហរប្រឆាំងការបោះឆ្នោតតាមប្រៃសណីយ៍ ព្រោះអាចមានការកេងបន្លំកើតឡើង។
«ប្រសិនបើអ្នករាប់់តែសន្លឹកឆ្នោតស្របច្បាប់ ខ្ញុំឈ្នះយ៉ាងស្រួល»។ លោក ត្រាំ បញ្ជាក់បែបនេះក្នុងសុន្ទរកថាលើកញ្ចក់ទូរទស្សន៍លើកដំបូងនៅថ្ងៃទី ៥ ខែវិច្ឆិកា មុននឹងសង្កត់ធ្ងន់ទៀតថា បើរាប់សន្លឹកឆ្នោតខុសច្បាប់ បក្សប្រជាធិបតេយ្យអាចព្យាយាមលួចការបោះឆ្នោត។
សម្រាប់លោក ត្រាំ សន្លឹកឆ្នោតដែលលោកចាត់ទុកខុសច្បាប់នេះ គឺជាសន្លឹកឆ្នោតដែលបានផ្ញើចូលមណ្ឌលបោះឆ្នោតយឺត។ ត្រង់ចំណុចនេះ លោកលើកឡើងថា លោកកំពុងតាមដានសន្លឹកឆ្នោតទាំងនេះយ៉ាងល្អិតល្អន់បំផុត តែកត់សម្គាល់ថា មានសន្លឹកឆ្នោតផ្ញើមកយឺតច្រើន។
ពីសេតវិមាន លោក ត្រាំ ក៏បានបញ្ជាក់ថា លោកបានឈ្នះរដ្ឋសំខាន់ៗជាច្រើន ដូចជា រដ្ឋ Florida, Iowa, Indiana និង Ohio ។ បើតាមលោកត្រាំ ជោគជ័យក្នុងរដ្ឋទាំងនេះ និងដទៃទៀត បានកើតឡើងទោះមានការជ្រៀតជ្រែកក្នុងការបោះឆ្នោតអាមេរិក ដែលពុំធ្លាប់កើតមានពីមុន ពីសំណាក់ក្រុមហ៊ុនបច្ចេកវិទ្យាធំៗ និងបណ្ដាញប្រព័ន្ធផ្សព្វផ្សាយអាមេរិកធំៗ។
ត្រង់នេះ លោក ត្រាំ ទំនងសំដៅលើ ការបិទបាំងព័ត៌មានមួយចំនួនពាក់ព័ន្ធការបោះឆ្នោតដែលលោកបង្ហោះលើ់បណ្ដាញសង្គម Twitter និងការចុះផ្សាយពីសំណាក់ប្រព័ន្ធផ្សព្វផ្សាយដែលមានទំនោរប្រឆាំងលោកជាដើម។
នៅពេលមុនថ្លែងសុន្ទរកថានៅសេតវិមាននេះ លោក ត្រាំ ក៏បានសរសេរលើ Twitter ដូច្នេះថា៖«សន្លឹកឆ្នោតណាដែលចូល [មណ្ឌលបោះឆ្នោត] ក្រោយថ្ងៃបោះឆ្នោត នឹងមិនត្រូវរាប់ឡើយ»។ ហើយលោកក៏បន្តទាមទារឲ្យបញ្ឈប់ការរាប់សន្លឹកឆ្នោតទាំងនោះផងដែរ។
ដោយឡែក លោក ចូ បៃឌិន នៅថ្ងៃទី ៥ ខែវិច្ឆិកា បានបញ្ជាក់ថា លោកច្បាស់ក្នុងចិត្តថា កាលណាសន្លឹកឆ្នោតរាប់ចប់ លោកនិងអ្នកស្រី Kamala Harris បេក្ខជនអនុប្រធានាធិបតី នឹងត្រូវប្រកាសជាអ្នកឈ្នះ។
ប្រាប់អ្នកសារព័ត៌មានក្នុងស្រុកកំណើតលោកនាទីក្រុង Wilmington នៃរដ្ឋ Delaware លោក បៃឌិន ស្នើសុំឲ្យពលរដ្ឋអាមេរិកអត់ធ្មត់ រង់ចាំការរាប់សន្លឹកឆ្នោតចប់សព្វគ្រប់សិន ហើយគ្រប់គ្នានឹងដឹងលទ្ធផលឆ្នោតនាពេលឆាប់ៗខាងមុខ។
ក្រោយក្ដាប់បានរដ្ឋប្រទាញប្រទង់២ រួមមាន Michigan និងWisconsin លោក បៃឌិន កើនសំឡេងប្រតិភូដល់ ២៦៤ ខណៈលោកត្រាំមានត្រឹម២១៤ ក្នុងដៃប៉ុណ្ណោះ ។ ដើម្បីក្លាយជាម្ចាស់សេតវិមាន បេក្ខជនទាំងពីរ ត្រូវការសំឡេងប្រតិភូយ៉ាងតិច ២៧០ ។ ដូច្នេះ លោក ត្រាំ ត្រូវការឈ្នះរដ្ឋគន្លឹះដែលសស់សល់តែ៤ រួមមាន Pennsylvania, North Carolina, Georgia និង Nevada ទើបរក្សាតំណែងប្រធានាធិបតីមួយអាណត្តិទៀតបាន។
ការដាក់ពាក្យបណ្ដឹងតវ៉ាពីសំណាក់ក្រុមឃោសនាលោកត្រាំក្នុងរដ្ឋប្រទាញប្រទង់ Georgia និង Michigan ត្រូវបានចៅក្រមបដិសេធ។ ទោះចាញ់មែន ពួកគេបានប្តេជ្ញាដាក់ពាក្យបណ្ដឹងថ្មីប្រឆាំងភាពមិនប្រក្រតីនៃការបោះឆ្នោតក្នុងរដ្ឋ Nevada ផងដែរ ហើយកាលពីថ្ងៃទី៤ ខែវិច្ឆិកា ក្រុមឃោសនាលោកត្រាំ ក៏បានទាមទារឲ្យរាប់សន្លឹកឆ្នោតឡើងវិញក្នុងរដ្ឋ Wisconsin ផងដែរ។
ការរាប់សន្លឹកឆ្នោតឆ្នាំនេះ មានភាពយឺតយ៉ាវ
ជំងឺកូវីដ-១៩ ធ្វើឲ្យពលរដ្ឋអាមេរិកកាន់តែច្រើនលើសពេលណាៗទាំងអស់ បោះឆ្នោតមុនកំណត់ ដោយតាមរយៈប្រៃសណីយ៍ ឬដោយផ្ទាល់នៅមណ្ឌលឆ្នោត។ ការបោះឆ្នោតតាមប្រៃសណីយ៍ ជាទូទៅ ត្រូវការពេលយូរដើម្បីរាប់ ដ្បិតថា ពួកវាត្រូវឆ្លងកាត់ជំហានច្រើនដើម្បីបញ្ជាក់ ដូចជា ហត្ថលេខា និងអាសយដ្ឋានជាដើម។
រដ្ឋអាមេរិកខ្លះ ដូចជា រដ្ឋ Florida និងរដ្ឋ Ohio អនុញ្ញាតឲ្យបើកដំណើរការបោះឆ្នោតបែបនេះច្រើនសប្ដាហ៍មុនថ្ងៃបោះឆ្នោតធំ ដូច្នេះសន្លឹកឆ្នោត អាចរាប់ទាន់ពេល។ ក៏ប៉ុន្តែ រដ្ឋផ្សេងទៀត ដូចជា រដ្ឋ Pennsylvania Navada និងរដ្ឋ Wisconsin មិនអនុញ្ញាតឲ្យអនុវត្តដំណើរការបោះឆ្នោតមុនពេលកំណត់ឡើយ។ រដ្ឋទាំងនេះគឺសំខាន់ក្នុងកំណត់ជោគវាសនាម្ចាស់សេតវិមាន ហើយខាងមន្ត្រីរៀបចំការបោះឆ្នោតអាមេរិក អះអាងថា ការរាប់សន្លឹកឆ្នោតក្នុងរដ្ឋទាំងនេះ អាចប្រើពេលរាប់ថ្ងៃ។
ក៏មានកត្ដាផ្សេងទៀត ដែលធ្វើឲ្យការរាប់សន្លឹកឆ្នោតយឺតយ៉ាវផងដែរ។ ប្រមាណពាក់កណ្ដាលនៃរដ្ឋទាំងអស់របស់អាមេរិក ទទួលយកការផ្ញើសន្លឹកឆ្នោតតាមប្រៃសណីយ៍ ដែលមកដល់ក្រោយថ្ងៃបោះឆ្នោតធំផងដែរ ដរាបណាសន្លឹកឆ្នោតទាំងនេះ បានចុះត្រាប្រៃសណីយ៍ក្នុងថ្ងៃទី៣ ខែវិច្ឆិកា។ ដូច្នេះ សន្លឹកឆ្នោតខ្លះ នឹងពុំត្រូវបានរាប់ឡើយរហូតដល់ប៉ុន្មានថ្ងៃក្រោយបោះឆ្នោតចប់៕