អន្តរជាតិ
ចិន មិនសុំទោសអូស្ត្រាលីជុំវិញការបង្ហោះរូបថតមិនល្អរបស់ទាហានអូស្ត្រាលីនៅអាហ្វហ្កានីស្ថាន
លោកស្រី Hua Chunying អ្នកនាំពាក្យក្រសួងការបរទេសចិនក្នុងសន្និសីទសារព័ត៌មានថ្ងៃទី៣០ ខែវិច្ឆិកា។ រូបភាពពីក្រសួងការបរទេសចិន
×![]()
ទំនាក់ទំនងទ្វេភាគីរវាងចិន និងអូស្ត្រាលីកាន់តែធ្លាក់ចុះត្រដាប់ត្រដួសបន្ថែមទៀត ក្រោយចិន បដិសេធមិនសុំទោសតាមការទាមទាររបស់នាយករដ្ឋមន្ត្រីអូស្ត្រាលីពាក់ព័ន្ធការបង្ហោះរូបថតសកម្មភាពទាហានអូស្ត្រាលីលើកុមារអាហ្វហ្កានីស្ថានពីអ្នកនាំពាក្យក្រសួងការបរទេសចិនកាលពីថ្ងៃ៣០ វិច្ឆិកា។ ក្រសួងការបរទេសចិន ប្រាប់ឲ្យអូស្ត្រាលីទៅសុំទោសអាហ្វហ្កានីស្ថានចំពោះទង្វើអមនុស្សធម៌របស់ខ្លួនវិញ។
នាយករដ្ឋមន្ត្រីអូស្ត្រាលីស្កុត ម៉ូរីសុន នៅថ្ងៃទី៣០ វិច្ឆិកា បានទាមទារឲ្យចិន សុំទោសជាផ្លូវការចំពោះការបង្ហោះសំណេរ និងរូបគំនូរទាហានអូស្ត្រាលីយកកាំបិតដាក់លើកកុមារអាហ្វហ្កានីស្ថានម្នាក់ដោយលោក Zhao Lijian អ្នកនាំពាក្យក្រសួងការបរទេសចិន។ លោកអះអាងថា ការបង្ហោះគំនូរបែបនេះ គឺជារឿងដែលគួរឲ្យខឹងសម្បារ មិនអាចរកហេតុផលអ្វីមកកែតម្រូវបាន និងជាការប្រមាថប្រជាជន និងកងទ័ពអូស្ត្រាលីផង ហើយទំនាក់ទំនងទ្វេភាគី នឹងកាន់តែយ៉ាប់យ៉ឺន។
លោក ម៉ូរីសុន ក៏ដូចជាទាមទារឲ្យក្រុមហ៊ុន Twitter លុបសារដែលបង្ហោះដោយលោក Zhao ផងដែរ។ ប៉ុន្តែបណ្តាញសង្គមមួយនេះ មិនបានលុបចោលសារ និងរូបភាពដែលបានបង្ហោះនោះឡើយ ដោយគ្រាន់តែដាក់សញ្ញាសម្គាល់ថា គណនីរបស់លោក Zhao ជាគណនីមានទំនាក់ទំនងរដ្ឋាភិបាលចិន និងប្រាប់អ្នកប្រើប្រាស់ឲ្យប្រយ័ត្នប្រយែងមុននឹងចុចមើលរូបនោះ។
ឆ្លើយតបនឹងការទាមទារបស់អូស្ត្រាលី លោកស្រី Hua Chunying អ្នកនាំពាក្យមួយរូបផ្សេងទៀតនៃក្រសួងការបរទេសចិន លើកឡើងក្នុងសន្និសីទសារព័តមានថ្ងៃដដែលថា ភាគីអូស្ត្រាលីប្រតិកម្មខ្លាំងពេកចំពោះការបង្ហោះរបស់សហសេវិករបស់លោកស្រី។ លោកស្រី ក៏ប្រាប់ឲ្យអូស្ត្រាលីពិចារណកំហុសខ្លួនឯង និងកែប្រែកំហុសនេះ។
មិនតែប៉ុណ្ណោះ លោកស្រី Hua ថែមទាំងបានរិះគន់ទៀតថា អូស្ត្រាលីគួរណាស់តែអាម៉ាស់ចំពោះទង្វើកងទ័ពរបស់ខ្លួន ក៏ដូចជាសុំទោសជាផ្លូវការទៅកាន់ប្រជាជនអាហ្វហ្កានីស្ថាន។ លោកស្រី Hua អះអាងថា អំពើដែលប្រព្រឹត្តដោយទាហាមអូស្ត្រាលីគឺជារឿងគួរឲ្យរន្ធត់ និងស្រងាកចិត្ត។
មែនទែនទៅ អគ្គមេបញ្ជាការកងទ័ពអូស្ត្រាលី ឧត្តមសេនីយ៍ Angus Campbell បាននិយាយសុំទោសជាសាធារណៈរួចមកហើយកាលពីថ្ងៃទី១៩ វិច្ឆិកា។ ចំណែកលោក ម៉ូរីសុន ក៏សុំទោសមេដឹកនាំអាហ្វហ្កានីស្ថានតាមទូរសព្ទរួចហើយដែរ។
កាលពីថ្ងៃទី១៩ វិច្ឆិកា អគ្គមេបញ្ជាការកងទ័ពអូស្ត្រាលី អះអាងថាទាហានខ្លួនចំនួន១៩រូបមានជាប់សង្ស័យក្នុងការសម្លាប់ដោយខុសច្បាប់ជនស៊ីវិល និងអ្នកទោសចំនួន៣៩នាក់នៅអាហ្វហ្កានីស្ថាន។ ក្រោយការទទួលស្គាល់នេះ អូស្ត្រាលីបានចាប់ផ្តើមនីតិវិធីរដ្ឋបាល និងតុលាការក្នុងការកាត់ក្តីទាហានរបស់ខ្លួន ក៏ដូចជាបានបណ្តេញទាហាន១៣នាក់ចេញពីកងកម្លាំងរបស់ខ្លួន។
ទំនាក់ទំនងរវាងអូស្ត្រាលី និងចិន ចាប់ផ្តើមអាប់អួរក្រោយពេលអូស្ត្រាលីចេញមុខទាមទារឲ្យអង្គការសុខភាពពិភពលោក(WHO) បើកការស៊ើបអង្កេតពីប្រភពនៃជំងឺកូវីដ-១៩ ដោយសង្ស័យថាមានប្រភពចេញមកពីចិន។ ចាប់តាំងពីពេលនោះមក ប្រទេសទាំង២ចាប់ផ្តើមប៉ះទង្គិចគ្នាលើបញ្ហាសិទ្ធិមនុស្ស ចោទគ្នារឿងចារកិច្ច ក៏ដូចជាបញ្ហាអ្នកកាសែត។ នៅពេលថ្មីៗនេះ ចិនបានដាក់ពន្ធចំនួន២១២ភាគរយបន្ថែមលើស្រារបស់អូស្ត្រាលី ក៏ដូចជាកាត់បន្ថយការនាំចូលធ្យូងថ្មពីប្រទេសនេះផងដែរ៕
Tag:
ចិន
អូស្ត្រាលី
© រក្សាសិទ្ធិដោយ thmeythmey.com
