ជាតិ
សម្ដេច ហ៊ុន សែន បញ្ជាឱ្យអភិបាលខេត្តមណ្ឌលគិរី បើកយុទ្ធនាការបោសសម្អាតទ្រង់ទ្រាយធំ លើករណីទន្ទ្រានដីរដ្ឋ
×![]()
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បញ្ជាឱ្យអភិបាលខេត្តមណ្ឌលគិរី បើកយុទ្ធនាការបោសសម្អាតទ្រង់ទ្រាយធំ លើករណីរំលោភទន្ទ្រានដីរដ្ឋខុសច្បាប់។ សម្ដេចចេញបញ្ជាបែបនេះ ក្រោយពី មានករណីរំលោភដីសម្បទានក្រុមហ៊ុនចំនួន២ និងដីចម្ការស្រល់រដ្ឋ នេះបើតាមលិខិតទីស្តីការគណៈរដ្ឋមន្ត្រី ចុះថ្ងៃទី២១ មករា។
សម្ដេច ហ៊ុន សែន បានបញ្ជាឱ្យអភិបាលខេត្តមណ្ឌលគិរី ដកហូតដីកាន់កាប់ខុសច្បាប់ទាំងអស់ មករក្សាទុកជាសម្បត្តិរដ្ឋវិញ។ តាមរយៈទីស្តីការគណៈរដ្ឋមន្ត្រី ដែលទទួលបានចំណាររបស់សម្ដេច ហ៊ុន សែន នោះ បានផ្ញើទៅក្រសួងកសិកម្ម និងអភិបាលខេត្តមណ្ឌលគិរីនោះ បានបញ្ជាក់ដូច្នេះថា៖«រដ្ឋបាលខេត្តត្រូវរៀបចំផែនការសកម្មភាព ដើម្បីបើកយុទ្ធនាការបោសសម្អាតទ្រងទ្រាយធំ លើការរំលោភទន្ទ្រានហ៊ុមព័ទ្ធយកដីរដ្ឋខុសច្បាប់តាមគ្រប់រូបភាព ដោយមានកិច្ចសហការគាំទ្រចូលរួមពីកម្លាំងចម្រុះថ្នាក់ជាតិ»។
មិនតែប៉ុណ្ណោះសម្ដេច ហ៊ុន សែន ក៏បានបញ្ជាឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ពិនិត្យលទ្ធភាពធ្វើនិយ័តកម្ម ឬប្ដឹងទៅតុលាការមោឃភាព ចំពោះវិញ្ញាបនបត្រសម្គាល់អចលនវត្ថុ ដែលមិនបានបំពេញនីតិវិធីពេញលេញផងដែរ។
កាលពីថ្ងៃទី១៣ មករា រដ្ឋមន្ត្រីក្រសួងកសិកម្ម លោក វេង សាខុន បានផ្ញើលិខិតទៅសម្ដេច ហ៊ុន សែន រៀបរាប់ពីករណីរំលោភកាន់កាប់ដីសម្បទានសេដ្ឋកិច្ចរបស់ក្រុមហ៊ុន រ៉ូជីសាន និងក្រុមហ៊ុន ហូរលីង លើដីចម្ការស្រល់រដ្ឋ និងដីចម្ការស្រល់រុក្ខាទិវាជាតិ នៅមណ្ឌលគិរី។
ក្រោយពីទទួលបានលិខិតនេះ សម្ដេច ហ៊ុន សែន តាមរយៈទីស្តីការគណៈរដ្ឋមន្ត្រី បានបញ្ជាឱ្យរដ្ឋបាលខេត្តមណ្ឌលគិរី ចេញលិខិតនិរាករណ៍លើលិខិតទាំងឡាយណា ដែលចេញដោយអាជ្ញាធរភូមិ ឃុំ ស្រុក ខេត្ត ដែលមានភាពមិនស្របតាមនីតិវិធីពេញលេញកន្លងមក និងត្រូវចេញដីកាដកហូតដីទាំងនោះ មកជាសម្បត្តិរដ្ឋវិញ។
ជាមួយគ្នានេះសម្ដេច ហ៊ុន សែន ក៏បញ្ជាឱ្យចេញចំណាត់ការផ្លូវច្បាប់ចំពោះបុគ្គលពាក់ព័ន្ធនឹងការរៀបចំឯកសារក្លែងក្លាយ។ ជាពិសេសបុគ្គលដែលរឹងទទឹង ឬពុំព្រមអនុវត្តស្របតាមវិធាននានា ដែលអាជ្ញាធរចេញកន្លងមកជាធរមាន។
ចំណែកដីនៅដែនសមត្ថកិច្ចក្រសួងកសិកម្ម ដែលត្រូវជនខិលខូចបំលែងពីរដ្ឋ ទៅជាដីកម្មសិទ្ធឯកជន រួមទាំងចេញវិញ្ញាបនបត្រសម្គាល់អចលនវត្ថុមិនប្រក្រតីនោះ ក៏ត្រូវចាត់វិធានការផ្លូវច្បាប់ដែរ។ នេះជាការបញ្ជាក់របស់សម្ដេច ហ៊ុន សែន។
សារព័ត៌មានថ្មីៗ មិនអាចសុំការបកស្រាយលម្អិតពី លោក ស្រី វុឌ្ឍនី អ្នកនាំពាក្យក្រសួងកសិកម្ម បានឡើយ ដោយលោកស្នើឲ្យសារសួរទៅខាងក្រសួងមហាផ្ទៃ និងរដ្ឋបាលព្រៃឈើខេត្តមណ្ឌលគិរី។ ប៉ុន្តែលោកបានបញ្ជាក់ថា វិវាទនៅតំបន់ចម្ការស្រល់នេះ ឃើញកើតមានយូរហើយ។
លោក ថ្លែងយ៉ាងដូច្នេះថា៖ «ដីប៉ុន្មានហិកតា គេទន្ទ្រានយកប៉ុន្មានហិកតា(ដីសម្បទាបចម្ការស្រល់)ខ្ញុំអត់ដឹងដែរ ទាល់សួរមេព្រៃទៅ។ រឿងហ្នឹង(សំណុំរឿងដីដែលសម្ដេច ស ខេង ឲ្យអន្តរក្រសួងចុះអន្តរាគមន៍កន្លងមកនៅមណ្ឌលគិរីនិងសំណុំរឿងដីចម្ការស្រល់ដែលស្នើសុំការអន្តរាគមន៍ពីសម្ដេច ហ៊ុន សែន) ជាប់ពាក់គ្នាឬអត់ទាល់សួរក្រសួងមហាផ្ទៃ។ តាមពិតទៅយើងធ្វើការដោះស្រាយជាហូរហែហ្នឹង គ្រាន់តែថាយើងស្នើឲ្យមានការពិនិត្យមើលបន្ថែមទៀត ពិនិត្យលិខិតបទដ្ឋានណាខុសពិនិត្យឡើងវិញ។ ហើយកន្លងមកក៏ខាងខេត្តសហការជាមួយដែរ។ តិចទៀតបានក្រុមការងារចុះទៅ តែខ្ញុំអត់ដឹងក្នុងខែឬអត់ទេ»។
សារព័ត៌មានថ្មីៗ មិនទាន់អាចទាក់ទងលោក ស្វាយ សំអ៊ាង អភិបាលខេត្តមណ្ឌលគិរីបានឡើយ។
អត្ថបទទាក់ទង
ដីតំបន់មណ្ឌលគិរី ភាគច្រើនសុទ្ធតែអ្នកមានអំណាច និងដំណែងធំ សម្រុកនាំគ្នាទៅកាន់កាប់ និងចាប់យកធ្វើជាកម្មសិទ្ធិ ខណៈខេត្តនេះ កំពុងក្លាយប៉ូលសេដ្ឋកិច្ចដ៏សំខាន់របស់កម្ពុជា នាពេលខាងមុខ។ នេះបើតាមសម្ដេច ស ខេង រដ្ឋមន្ត្រី ធ្លាប់លើកឡើងកន្លងមក។
កន្លងមកសម្ដេច ហ៊ុន សែន នាយករដ្ឋមន្រី្តបានសម្រេចបញ្ចប់តំណែងអភិបាលស្រុកកោះញែក ខេត្តមណ្ឌលគិរី ក្រោយមន្រី្តជំនាញរកឃើញថាជាប់ពាក់ព័ន្ធនឹងការទន្ទ្រានដីខុសច្បាប់។ការបញ្ចប់មុខតំណែងនេះ ធ្វើឡើងតាមការស្នើសុំរបស់ក្រសួងមហាផ្ទៃ ក្រោយក្រុមការងារអន្តរក្រសួងបានចុះស្រាវជ្រាវពីការទន្ទ្រានកាន់កាប់ដីខុសច្បាប់នៅតំបន់ការពារធម្មជាតិខេត្តមណ្ឌលគិរី៕
Tag:
ហ៊ុន សែន
ដីធ្លី
© រក្សាសិទ្ធិដោយ thmeythmey.com
