Lukaku រកបានគ្រាប់ទី៣០០ ជួយ Inter ឡើងកំពូលតារាង Serie A

កីឡាអន្តរជាតិ

អន្តរជាតិ

Lukaku រកបានគ្រាប់ទី៣០០ ជួយ Inter ឡើងកំពូលតារាង Serie A

15, Feb 2021 , 9:19 pm

រូបភាព

ដោយ៖ជា យូគៀង

Romelu Lukaku ស៊ុតបាល់បញ្ចូលទីពីរគ្រាប់ម្នាក់ឯងដើម្បីជួយ Inter Milan ឈ្នះ Lazio ៣-១ និងជាការប្រកួតដែលរូបគេអាចរកបានគ្រាប់ទី៣០០ក្នុងអាជីពផងដែរ។ តាមរយៈជ័យជម្នះនេះ Inter ឡើងទៅឈរកំពូលតារាង Serie A ជំនួស AC Milan វិញ។

ចុចទីនេះដើម្បីទទួលបានព័ត៌មានរហ័ស

Lukaku បង្ហាញខ្លួនបានយ៉ាងល្អឱ្យក្លិបអ៊ីតាលីមួយនេះ បន្ទាប់ពីចាកចេញពីក្រុមចាស់ Manchester United ដែលជាក្រុមដែលរូបគេផ្តល់ភាពអស្ចារ្យកន្លងមកនោះ។ នៅក្នុងជំនួបក្របខណ្ឌលីគកំពូលអង់គ្លេស Serie A នៅយប់ថ្ងៃទី១៥ ខែកុម្ភៈ ខ្សែប្រយុទ្ធសញ្ជាតិបែលហ្ស៊ិករូបនេះរកបាន២គ្រាប់ពោលក្នុងនាទី២២ និង៤៥ មុនពេល Sergej Milinkovic-Savic រកបាន១គ្រាប់វិញឱ្យ Lazio នៅនាទី៦១។ ៣នាទីបន្ទាប់ Lautaro Martinez បន្ថែមគ្រាប់ទី៣ ដើម្បីជួយក្រុមលោក Antonio Conte ឈ្នះ Lazio ៣-១។

Lukaku បានពង្រឹងតួនាទីជាខ្សែប្រយុទ្ធដ៏ល្អនៅក្នុងចំណោមកីឡាករខ្សែប្រយុទ្ធឆ្នើមនៅអឺរ៉ុបតាមរយៈការរកបានគ្រាប់បាល់ទី ៣០០ ក្នុងអាជីព ហើយព្រមទាំងបានជួយ Inter Milan ឡើងឈរកំពូលតារាងផងដែរ។

២គ្រាប់នេះផងដែរ ក៏បានជួយអតីតសមាជិកក្រុមបិសាចក្រហមតាមស្មើគ្រាប់ស៊ុតរបស់ Cristiano Ronaldo ចំនួន១៦គ្រាប់ នៅក្របខណ្ឌអ៊ីតាលីក្នុងរដូវកាល ២០២០-២០២១នេះ។ Lukaku បានបង្ហាញទម្រង់លេងបានយ៉ាងល្អជាមួយ Inter ដោយរកបាន ៥៦គ្រាប់ហើយ ក្នុងចំណោម ៨០ ប្រកួត។

លោក Antonio Conte អ្នកចាត់ការទូទៅ Inter Milan បាននិយាយពីចំណាប់អារម្មណ៍ក្រោយចប់ការប្រកួតតប្រាប់ទូរទស្សន៍ Sky Italia ថា៖ «អ្នកខ្លះបានរអ៊ូរទាំមកលើ Lukaku ក្រោយពេលចាញ់នៅការប្រកួត Coppa Italia វាបានធ្វើឲ្យរូបគេមានការប៉ះទង្គិចផ្លូវចិត្តបន្តិចបន្តួចប៉ុន្តែ Lukaku បានត្រឡប់មកវិញនៅទម្រង់លេងដ៏ល្អបំផុតសម្រាប់ក្រុម ហើយក្រុមទាំងមូលត្រូវការ Romelu។ យើងត្រូវការការប្តេជ្ញាចិត្ត និងចំណងចំណូលចិត្តរបស់ក្រុមទាំងមូល»។

គិតត្រឹមសប្តាហ៍ទី២២ Inter Milan បានប្រជែងតំណែងកំពូលតារាងពី AC Milan ដោយនាំមុខចំនួន១ពិន្ទុ។ Inter រកបាន៥០ពិន្ទុ ឯ AC Milan មាន៤៩ពិន្ទុ ខណៈ Roma នៅលេខ៣មាន៤៣ពិន្ទុ និង Juventus នៅលេខ៤ រកបាន៤២ពិន្ទុ៕

Tag:

Romelu Lukaku

Inter Milan