អន្តរជាតិ
នយោបាយអន្តរជាតិ
លោក ថងលួន ស៊ីសូលីត ត្រូវជ្រើសតាំងជាប្រធានាធិបតីឡាវថ្មី 22, Mar 2021 , 12:18 pm
× នាយករដ្ឋមន្ត្រីឡាវ ថងលួន ស៊ីសូលីត នៅថ្ងៃទី២២ ខែមីនា ត្រូវបានសភាឡាវបោះឆ្នោតក្លាយជាប្រធានាធិបតីថ្មី។ លោក ថងលួន ជំនួសលោក ប៊ុនញ៉ាង វរាជិត ដែលចូលនិវត្តន៍។
នាកិច្ចប្រជុំលើកដំបូង សភាឡាវអាណត្តិទី៩ បានបោះឆ្នោតដោយសំឡេងលើសលប់គាំទ្រលោក ថងលួន ស៊ីសូលីត ឱ្យធ្វើជាប្រធានាធិបតីថ្មី ជំនួសលោក ប៊ុនញ៉ាង វរាជិត ។ នេះជារឿងដែលត្រូវបានរំពឹងទុក ខណៈលោក ថងលួន វ័យ៧៥ឆ្នាំ កំពុងកាន់តំណែងអគ្គលេខាធិការបក្សកុម្មុយនីស្តឡាវ ដែលជាទម្លាប់ ក៏ត្រូវអង្គុយកៅអីប្រធានាធិបតីផងដែរ។
ចំណែកតំណែងនាយករដ្ឋមន្ត្រីវិញ បានទៅលើលោក ផាន់ខាំ វិផាវណ្ណ ដែលជាអនុប្រធានាធិបតី។ លោក ផាន់ខាំ វ័យ៧០ឆ្នាំ ជាឥស្សរជនជាន់ខ្ពស់ក្នុងជួរសមាជិកការិយាល័យនយោបាយបក្ស បន្ទាប់ពីលោក ថងលួន ទៀតផង។
អនុប្រធានាធិបតីមានពីរនាក់ គឺលោកស្រី ផានី យ៉ាធូទូ ដែលជាអតីតប្រធានសភា និងលោក ប៊ុនថង ជិតម៉ានី ដែលជាឧបនាយករដ្ឋមន្រ្តី។ ប្រធានសភាថ្មី គឺលោក សៃសំផន ភូមិវិហាន ៕
© រក្សាសិទ្ធិដោយ thmeythmey.com