កីឡាអន្តរជាតិ
អន្តរជាតិ
Ronaldo, Messi និង Ribéry ក្នុងបញ្ជីចុងក្រោយសម្រាប់ពាន FIFA Ballon d’Or 10, Dec 2013 , 4:31 am
× សហព័ន្ធកីឡាបាល់ទាត់អន្តរជាតិ (FIFA) និងទស្សនាវដ្តីបារាំង France Football កាលពីថ្ងៃទី៩ ខែធ្នូ បានបញ្ចេញបញ្ជីឈ្មោះកីឡាករបាល់ទាត់បីរូបចុងក្រោយដែលត្រូវប្រជែងយកពានរង្វាន់ FIFA Ballon d’Or ប្រចាំឆ្នាំ២០១៣ ដែលក្នុងនោះមាន Cristiano Ronaldo (ខ្សែប្រយុទ្ធព័រទុយហ្គាល់ និងក្លិប Real Madrid) Lionel Messi (ខ្សែប្រយុទ្ធអាហ្សង់ទីន និងក្លិប FC Barcelona) និង Franck Ribéry (ខ្សែបម្រើបារាំង និងក្លិប Bayern Munich)។
កីឡាករទាំងបីរូបនេះ ត្រូវបានជ្រើសរើសពីក្នុងចំណោមកីឡាករចំនួន២៣នាក់។ Messi បានឈ្នះតំណែងនេះបួនឆ្នាំជាប់គ្នាកន្លងមក ខណៈ Ronaldo និង Ribéry រំពឹងប្រមាញ់បានពានរង្វាន់ដ៏មានកិត្យានុភាពនេះជាលើកដំបូង។
សម្រាប់បេក្ខភាពគ្រូបង្វឹកឆ្នើមប្រចាំឆ្នាំវិញ គ្រូបង្វឹកក្រុម Borussia Dortmund លោក Jurgen Klopp ត្រូវប្រជែងជាមួយគ្រូបង្វឹកចូលនិវត្តន៍ពីររូបផ្សេងៗ គឺ Sir Alex Ferguson នៃក្លិប Manchester United និងលោក Jupp Heynckes នៃក្លិប Bayern Munich។
រីឯបេក្ខភាពខាងផ្នែកកីឡាការិនីវិញ មាន Nadine Angerer (អាល្លឺម៉ង់) Marta (ប្រេស៊ីល) និង Abby Wambach (សហរដ្ឋអាមេរិក) ខណៈគ្រូបង្វឹកផ្នែកស្ត្រីរួមមាន Ralf Kellerman (អាល្លឺម៉ង់/ក្លិប Vfl Wolfsburg) Silvia Neid (ជម្រើសជាតិអាល្លឺម៉ង់) និង Pia Sundhage (ជម្រើសជាតិស៊ុយអែត)។
ដោយឡែក កីឡាករបីរូបដែលជាប់ក្នុងបញ្ជីសម្រាប់ពានរង្វាន់ Puskas (គ្រាប់បាល់បញ្ចូលទីដ៏អស្ចារ្យ) មានខ្សែប្រយុទ្ធស៊ុយអែត Zlatan Ibrahimovic សម្រាប់គ្រាប់បាល់បញ្ចូលទីនាការប្រកួតមិត្តភាពអន្តរជាតិរវាងស៊ុយអែត និងអង់គ្លេស នាថ្ងៃទី១៣ ខែវិច្ឆិកា ឆ្នាំ២០១២ ខ្សែប្រយុទ្ធ Namja Matic (ក្លិប SL Benfica) នាការប្រកួតក្នុងលីកព័រទុយហ្គាល់ជាមួយក្លិប FC Porto កាលពីថ្ងៃទី១៣ ខែមករា ឆ្នាំ២០១៣ និង Neymar របស់ប្រេស៊ីលនាការប្រកួត FIFA Confederations Cup ជាមួយជប៉ុនកាលពីថ្ងៃទី១៥ ខែមិថុនា ឆ្នាំ២០១៣។
ជ័យលាភីនៃពានរង្វាន់ FIFA Ballon d’Or នឹងត្រូវប្រកាសនៅថ្ងៃចន្ទ ទី១៣ ខែមករា ឆ្នាំ២០១៤ នៅក្នុងពិធីផ្លូវការមួយនៅទីក្រុងហ្សួរិច ប្រទេសស៊្វីស៕ © រក្សាសិទ្ធិដោយ thmeythmey.com