«ល្បឿនដ៏មហន្តរាយដែលវីរុសបានបង្កផលប៉ះនៅទូទាំងប្រទេស ត្រូវតែមានការឆ្លើយតបវិញដោយសកម្មភាពរហ័ស និងទូលំទូលាយ។» ទេសាភិបាលធនាគារកណ្ដាលឥណ្ឌា Shaktikanta Das និយាយបែបនេះនៅថ្ងៃទី៥ ខែឧសភា ពេលលោកប្រកាសវិធានការថ្មីរបស់ធនាគារកណ្ដាលដើម្បីចាក់បញ្ចូលលុយជួយភាគីពាក់ព័ន្ធក្នុងការទបល់ទល់ជំងឺកូវីដ-១៩ ដែលកំពុងរាលដាលខ្លាំងនៅប្រទេសអាស៊ីខាងត្បូងមួយនេះ។

 

នៅថ្ងៃទី៥ ខែឧសភា ឥណ្ឌា កត់ត្រាករណីឆ្លងប្រចាំថ្ងៃជាង៣៨ម៉ឺននាក់ទៀត ជាមួយចំនួនអ្នកស្លាប់ជាង៣៧០០នាក់នៅ២៤ម៉ោងចុងក្រោយ។ តួលេខឆ្លងនេះ ថយចុះបន្តិចធៀបនឹងប៉ុន្មានថ្ងៃមុនដែលករណីឆ្លងហក់ឡើងដល់៤០ម៉ឺននាក់ឯណោះ។

 

ក្នុងវិធានការថ្មី ធនាគារជាតិឥណ្ឌា នឹងបញ្ចេញកម្ចីងាយស្រួលដែលមានការប្រាក់ទាបសម្រាប់ឱ្យក្រុមហ៊ុនផលិតវ៉ាក់សាំង ឬឱសថ ក្រុមហ៊ុនផលិតអុកស៊ីសែនយកទៅប្រើប្រាស់ សំដៅបង្កើនសមត្ថភាពទប់ទល់ជំងឺនេះ។ មន្ទីរពេទ្យ ឬអ្នកជំងឺក៏អាចខ្ចីលុយពីកញ្ចប់នេះដើម្បីដោះស្រាយបញ្ហាផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។

 

បើតាមលោក Das ធនាគារកណ្ដាល ក៏ផ្ដល់ពេលបន្ថែមដល់អ្នកខ្ចីប្រាក់ទូទៅក្នុងការសងប្រាក់វិញផងដែរ ដើម្បីសម្រាលបន្ទុក និងជំរុញសកម្មភាពសេដ្ឋកិច្ច។ លោកបញ្ជាក់ថា គោលដៅបន្ទាន់ពេលនេះ គឺការពារជីវិតមនុស្ស និងស្ដារឡើងវិញជីវភាពរស់នៅរបស់ប្រជាជន។ 

 

ប្រព័ន្ធសុខាភិបាលឥណ្ឌាដែលខ្វះខាតតាំងពីដើមមកនោះ កំពុងទ្រទ្រង់អ្នកជំងឺរាប់លាននាក់ដែលកើនឡើងយ៉ាងគំហុកដោយសារជំងឺកូវីដ-១៩ ។ នៅតាមមន្ទីរពេទ្យនានា អ្នកជំងឺប្រឈមការខ្វះខាតគ្រែសម្រាក និងអុកស៊ីសែន។ កាន់តែសោកស្ដាយ អ្នកជំងឺខ្លះ ក៏មិនអាចទទួលបានការព្យាបាលពេញលេញទៅទៀត ព្រោះតែកើនឡើងខ្លាំងចំនួនអ្នកឆ្លង។ ជំនួយបន្ទាន់ពីបរទេស បានទៅដល់ឥណ្ឌាជាបន្តបន្ទាប់ដើម្បីដោះស្រាយបញ្ហាក្នុងគ្រានេះ។

 

គិតត្រឹមថ្ងៃទី៥ ខែឧសភា ឥណ្ឌាមានអ្នកឆ្លងជំងឺកូវីដ-១៩ ជាង២០លាននាក់ និងអ្នកស្លាប់ជាង២២ម៉ឺននាក់។ ឥណ្ឌា ជាប្រទេសទីពីរបន្ទាប់ពីអាមេរិកដែលមានអ្នកឆ្លងលើស២០លាននាក់បែបនេះ៕