អន្តរជាតិ
នយោបាយអន្តរជាតិ
អាមេរិកសម្ពោធការិយាល័យថ្មី CDC ប្រចាំអាស៊ីអាគ្នេយ៍ ដែលមានទីតាំងនៅហាណូយ
26, Aug 2021 , 9:29 am
លោកស្រីអនុប្រធានាធិបតីអាមេរិក Kamala D. Harris នាពិធីសម្ពោធការិយាល័យប្រចាំតំបន់អាស៊ីអាគ្នេយ៍ (CDC) នៅក្រុងហាណូយ។ រូបថត AFP
×![]()
ដោយ: សារព័ត៌មានថ្មីៗ
លោកស្រីអនុប្រធានាធិបតីអាមេរិក Kamala D. Harris នាថ្ងៃនេះ បានសម្ពោធការិយាល័យប្រចាំតំបន់អាស៊ីអាគ្នេយ៍ នៃមជ្ឈមណ្ឌលបង្ការនិងកម្ចាត់ជំងឺឆ្លង (CDC) របស់សហរដ្ឋអាមេរិក នៅក្រុងហាណូយ ប្រទេសវៀតណាម ដោយមានការចូលរួមពីមន្រ្តីជាន់ខ្ពស់ផ្នែកសុខាភិបាលមកពីប្រទេសចំនួន១១។ 
ការិយាល័យថ្មី CDC ប្រចាំអាស៊ីអាគ្នេយ៍ ជាចំណែកមួយនៃការពង្រឹងសមត្ថភាពរបស់ CDC អាមេរិក ក្នុងការបំពេញបេសកកម្មរបស់ខ្លួនក្នុងការការពារជនជាតិអាមេរិក និងប្រជាជននៅក្នុងតំបន់ ដោយធ្វើការឆ្លើយតបបានឆាប់រហ័សទៅនឹងការគំរាមកំហែងផ្នែកសុខភាព។ នេះបើតាមសេចក្តីប្រកាសព័ត៌មានដែលផ្តល់ដោយស្ថានទូតអាមេរិកប្រចាំនៅកម្ពុជា។
នាពិធីសម្ពោធ លោកស្រី Harris បានបញ្ជាក់បន្ថែមលើការប្តេជ្ញាចិត្តរបស់សហរដ្ឋអាមេរិក ចំពោះកិច្ចសហប្រតិបត្តិការផ្នែកសន្តិសុខនៃសុខភាពនៅក្នុងតំបន់ ហើយបានបន្តធ្វើការអំពាវនាវឲ្យមានសកម្មភាព ក្នុងការឆ្លើយតប និងការត្រៀមខ្លួនជាស្រេច ចំពោះរោគរាតត្បាតនេះ។
«តាមរយៈការិយាល័យនេះ យើងនឹងធ្វើការជិតស្និទ្ធជាមួយដៃគូក្នុងតំបន់ ដើម្បីចែករំលែកយុទ្ធសាស្រ្ត និងពង្រឹងសមត្ថភាពគ្នាទៅវិញទៅមក ដើម្បីធ្វើការបង្ការ តាមដាន និងឆ្លើយតបទៅនឹងការគំរាមកំហែងនៃជំងឺឆ្លង សម្រាប់ពេលនេះ និងពេលអនាគត»។ នេះជាការបញ្ជាក់របស់រដ្ឋមន្រ្តីក្រសួងសុខាភិបាលសហរដ្ឋអាមេរិក លោក Xavier Becerra ។
បើតាមលោកស្រីវេជ្ជបណ្ឌិត Rochelle Walensky ប្រធានទីភ្នាក់ងារ CDC ភាពជាដៃគូយូរអង្វែងរបស់ CDCជាមួយប្រទេសនៅតំបន់អាស៊ាន បានពង្រឹងមន្ទីរពិសោធន៍ផ្នែកសុខភាពសាធារណៈ មជ្ឈមណ្ឌលប្រតិបត្តិការសម្រាប់គ្រាបន្ទាន់ ប្រព័ន្ធតាមដាន ដែលសុទ្ធតែជាមធ្យោបាយចាំបាច់ នៅក្នុងអំឡុងពេលនៃការមានរោគរាតត្បាត ក្នុងពេលនេះ។
លោកវេជ្ជបណ្ឌិត John MacArthur គឺជាប្រធានថ្មីនៃទីភ្នាក់ងារ CDC ប្រចាំតំបន់អាស៊ីអាគ្នេយ៍ ដែលធ្វើការងារគាំទ្រដល់ដំណើរការ និងសកម្មភាពនៅក្នុងប្រទេសចំនួន ១១ រួមបញ្ចូលទាំងប្រទេសកម្ពុជាផងដែរ។ ការិយាល័យ CDC អាមេរិក នៅកម្ពុជា គឺជាផ្នែកមួយរបស់ស្ថានទូតសហរដ្ឋអាមេរិក នៅភ្នំពេញ ដែលមានប្រធាន គឺអ្នកស្រីវេជ្ជបណ្ឌិត Rachel Albalak ហើយដើរតួនាទីសំខាន់ក្នុងវិស័យសុខភាពសាធារណៈ តាំងពីឆ្នាំ ២០០២ ដែលធ្វើការងារយ៉ាងសកម្មក្នុងការងារប្រយុទ្ធប្រឆាំងនឹងជំងឺឆ្លង រួមទាំងជំងឺគ្រុនចាញ់ ជំងឺអេដស៍ និងជំងឺកូវីដ ១៩៕
Tag:
CDC
© រក្សាសិទ្ធិដោយ thmeythmey.com
