លទ្ធផលនៃការស្ទង់មតិរបស់ទំព័រ Ipsos ជាមួយសាធារណជនលើបញ្ហាសង្គម និងនយោបាយ ដែលកំពុងព្រួយបារម្ភនៅទូទាំង​ប្រទេសជឿនលឿនចំនួន ២៨ បានបង្ហាញថា ការរាលដាលជំងឺកូវីដ-១៩ ជាវិបត្តិដែលត្រូវ​ព្រួយ​បារម្ភ​ធំជាងគេ។ មនុស្សចូលរួមប្រមាណ ៣៧ភាគរយឯណោះ បានព្រួយបារម្ភពី​បញ្ហាជំងឺ​កូវីដ-១៩ និងធ្វើឱ្យវាឈរនៅលំដាប់ទី១ ក្នុងតារាងនៃបញ្ហាពិភពលោក។

 

វិបត្តិគួរឱ្យព្រួយបារម្ភបន្ទាប់ពីជំងឺកូវីដ-១៩ គឺវិបត្តិគ្មានការងារធ្វើ។ ជាមួយគ្នា​នេះ ភាពក្រីក្រ និងវិសមភាពសង្គមក៏ស្ថិតនៅលំដាប់ទី២ ស្មើនឹងបញ្ហាគ្មានការងារធ្វើ​ដែរ។ វិបត្តិទី៣ គឺអំពីពុករលួយផ្នែកហិរញ្ញវត្ថុ និងនយោបាយ ខណៈវិបត្តិអំពើហិង្សា​ និងឧក្រិដ្ឋ​កម្មឈនៅលំដាប់ទី៤។ វិបត្តិដែលពិភពលោកព្រួយបារម្ភលំដាប់ទី៥ គឺបញ្ហា​សុខភាព។ 

 

ការធ្វើចំណាត់ថ្នាក់បញ្ហាដែលប្រជាជនព្រួយបារម្ភនេះ ផ្អែកលើលទ្ធផលរួមទាំងអស់​ដែលប្រមូល​បាន តែវាមានភាពខុសគ្នាទៅតាមប្រទេសនីមួយៗដែលមានបញ្ហាប្រឈម​ខុសគ្នា។ ជាក់ស្តែងដូចជានៅ ម៉ាឡេស៊ី ទទួលបានលទ្ធផលស្ទង់មតិប្រជាជនថា វាមានការ​ព្រួយបារម្ភ​ខ្លាំងចំពោះវិបត្តិជំងឺកូវីដ-១៩។ ដោយឡែក ស៊ុយអែត វិញមានការព្រួយបារម្ភ​ខ្លាំងលើវិបត្តិ​ឧក្រិដ្ឋកម្ម និងអំពើហិង្សា។ 

 

គួររំលឹកថា វិបត្តិបម្រែបម្រួលអាកាសធាតុ ក៏ជាវិបត្តិប្រឈមខ្លាំងក្នុងប្រទេសមួយចំនួនដែរ ដែលបានស្ថិតនៅលំដាប់ទី៨ នៃតារាងបញ្ហាពិភពលោកដែលមានការព្រួយបារម្ភ។ វាបានឈរនៅលំដាប់ស្មើជាមួយបញ្ហាពន្ធ។ បញ្ហាអាកាស​ធាតុនេះត្រូវបានព្រួយបារម្ភ និងយកចិត្តទុកដាក់​ជាខ្លាំងពីសំណាក់ប្រជាជនរបស់ប្រទេសមួយចំនួន ​ពិសេសអាល្លឺម៉ង់ អូស្ត្រាលី និងកាណាដា៕