អន្តរជាតិ
ឧត្តមសេនីយ៍កំពូលអាម៉េរិក Milley ថា ចិនបានតេស្តមីស៊ីលល្បឿនលឿនជាងសំឡេង 28, Oct 2021 , 7:29 pm
ប្រធានសេធានាធិការកងទ័ពអាម៉េរិក Mark Milley ។ រូបថត AFP
× ប្រធានសេនាធិការកងទ័ពអាម៉េរិក ឧត្តមសេនីយ៍ Mark Milley នៅថ្ងៃទី២៧ ខែតុលា បានទទួលស្គាល់ថា ចិនពិតជាបានសាកល្បងបាញ់មីស៊ីលល្បឿនលឿនជាងសំឡេងប្រាកដមែន។ លោក Milley ចាត់ទុកការសាកល្បងនេះជារឿងគួរឱ្យបារម្ភ។
កាលពីថ្ងៃទី១៦ ខែតុលា កាសែត The Financial Times បានរាយការណ៍ថា ក្នុងខែសីហា ទីក្រុងប៉េកាំងបានបាញ់មីស៊ីលល្បឿនលឿនជាងសំឡេងដែលអាចធ្វើដំណើរតាមគន្លងផែនដីមុនពេល វាយប្រហារគោលដៅ។ យ៉ាងណាមិញ ពីរថ្ងៃបន្ទាប់ ក្រសួងការបរទេសចិនបាន បដិសេធថា ខ្លួនបាញ់មីស៊ីលលឿនជាងសំឡេង តែជាការបាញ់យានអវកាសប៉ុណ្ណោះ។
ជុំវិញភាពមិនប្រាកដប្រជានេះ ឧត្តមសេនីយ៍ Mark Milley ប្រធានសេនាធិការយោធាម៉េរិក នៅថ្ងៃទី ២៧ ខែតុលា និយាយច្បាស់ៗថា ចិនពិតជាបានសាកល្បងមីស៊ីលលឿនជាងសំឡេងមែន។ លោក Milley ប្រដូចការសាកល្បងនេះទៅនឹងការបង្ហោះផ្កាយរណប Sputnik របស់សូវៀត។ លោក ចង់សំដៅលើការបង្ហោះប្រព័ន្ធផ្កាយរណបបង្កើតដោយមនុស្សជាលើកដំបូងដោយសូវៀតនៅឆ្នាំ១៩៥៧ ដែលធ្វើអោយទីក្រុងមូស្គូឈានមុខគេលើការប្រណាំងផ្នែកអវកាសក្នុងសម័យសង្គ្រាមត្រជាក់។
«អ្វីដែលយើងបានឃើញជាព្រឹត្តិការណ៍ដ៏សំខាន់មួយនៃការសាកល្បងអាវុធលឿនជាងសំឡេង ហើយវាពិតជាគួរឱ្យបារម្ភខ្លាំងណាស់»។ ឧត្តមសេនីយ៍ Milley បានសង្កត់ធ្ងន់បែបនេះក្នុងកិច្ចសម្ភាសជាមួយទូរទស្សន៍ Bloomberg ដែលផ្សាយនៅថ្ងៃទី២៧ ខែតុលា ។
អ្នកជំនាញផ្នែកសព្វាវុធ ជឿថា ការសាកល្បងអាវុធរបស់ចិន ទំនងជាត្រូវបានរៀបចំឡើងដើម្បីគេចពីប្រព័ន្ធការពាររបស់អាម៉េរិក។ នេះក៏ព្រោះមីស៊ីលនេះផ្លាស់ទីក្នុងល្បឿនលឿនជាងល្បឿនសំឡេង ប្រាំដង ឬប្រហែល៦,២០០គីឡូម៉ែត្រក្នុងមួយម៉ោង ដែលធ្វើឲ្យប្រព័ន្ធការពារ អាម៉េរិកពិបាកចាប់បាន។ លើសពីនេះ អាម៉េរិកជឿជាក់ថា ការសាកល្បងរបស់ចិនធ្វើតាមការបាញ់ផ្លោងទម្លាក់គ្រាប់បែកតាមគន្លងប្រភាគ។ នេះបើយោងតាមទីភ្នាក់ងារព័ត៌មាន Reuters ។
ការបាញ់ផ្លោងទម្លាក់គ្រាប់បែកតាមគន្លងប្រភាគ វិធីសាស្រ្តមួយដែលមីស៊ីលចិនអាចគេចផុតពីប្រព័ន្ធការពារមីស៊ីលរបស់អាម៉េរិកដូចជានៅ Alaska ជាដើមដែលត្រូវបានពង្រាយឡើងដើម្បីទប់ទល់នឹងអាវុធផ្សេងៗបាញ់ពីកូរ៉េខាងជើងជាដើម៕
© រក្សាសិទ្ធិដោយ thmeythmey.com