ដោយ៖​ ឡាយ ស្រីពេជ្រ

 

 

ព័ត៌មាននៃវត្តមានយោធាអាម៉េរិកនៅកោះតៃវ៉ាន់ ត្រូវបានរាយការណ៍ដោយប្រព័ន្ធផ្សព្វផ្សាយជាច្រើននៅដើមខែតុលានេះ។ មេដឹកនាំតៃវ៉ាន់ Tsai Ing-wen ក៏បានបញ្ជាក់រឿងនេះក្នុងកិច្ចសម្ភាសជាមួយទូរទស្សន៍ CNN ដែលផ្សាយនៅថ្ងៃទី២៧ ខែតុលា។ ប៉ុន្តែលោកស្រីលើកឡើងថា ចំនួនយោធាអាម៉េរិក មានមិនច្រើនច្រើនឡើយ។

 

ការសារភាពរបស់លោកស្រី Tsai ជាលើកដំបូងដែលមេដឹកនាំតៃវ៉ាន់បញ្ជាក់ពីវត្តមានកងទ័ពអាម៉េរិកលើដែនកោះមួយនេះ ចាប់តាំងពីយោធាអាម៉េរិកដកចេញពីតៃវ៉ាន់នៅឆ្នាំ១៩៧៩ ក្រោយអាម៉េរិកភ្ជាប់ទំនាក់ទំនងជាមួយចិនជំនួសតៃវ៉ាន់។ មេដឹកនាំតៃវ៉ាន់រូបនេះ បញ្ជាក់ថា តៃវ៉ាន់មានកិច្ចសហប្រតិបត្តិការយ៉ាងទូលំទូលាយជាមួយអាម៉េរិកក្នុងគោលបំណងបង្កើនសមត្ថភាពការពារជាតិរបស់តៃវ៉ាន់ ហើយថា អាម៉េរិកនឹងចេញមួយតៃវ៉ាន់ផងដែរ។

 

«ខ្ញុំ​ពិតជាមាន​ជំនឿថា អាម៉េរិកនឹងជួយការពារកោះតៃវ៉ាន់»។ លោកស្រី Tsai លើកឡើងបែបនេះក្នុងបទសម្ភាសន៍ជាមួយប៉ុស្តិ៍ទូរទស្សន៍ CNN ។

 

ជុំវិញវត្តមានយោធាអាម៉េរិក រដ្ឋមន្រ្តីការពារជាតិតៃវ៉ាន់ Chiu Kuo-cheng ប្រាប់សមាជិកសភាថា យោធាតៃវ៉ាន់ និងអាម៉េរិកមានទំនាក់ទំនងរវាងគ្នាជាយូរមកហើយ។ បើតាមលោក Chiu កងទ័ពតៃវ៉ាន់ បានទទួលការបណ្ដុះបណ្ដាលនៅអាម៉េរិក ហើយយោធាអាម៉េរិកក៏បង្ហាត់កងទ័ពវិញដែរ។ ត្រង់នេះ ប្រមុខការពារជាតិតៃវ៉ាន់បញ្ជាក់ថា វាមិនមែនជាការតាំងមូលដ្ឋានទ័ពឡើយ។ 

 

ជាមួយគ្នានេះដែរ លើទំនាក់ទំនងជាមួយចិន ទោះបីជាមានការគំរាមកំហែងនិងការរំលោភបំពានជាបន្តបន្ទាប់ពីសំណាក់ទីក្រុងប៉េកាំង លោកស្រី Tsai នៅតែសង្ឃឹមថា ចិននិងតៃវ៉ាន់អាចសហការគ្នាដោយសន្តិវិធី ទោះបីជាបរិយាកាសរវាងតៃវ៉ាន់និងចិននៅបច្ចុប្បន្នកំពុងអាប់អួរក៏ដោយ៕