កីឡាអន្តរជាតិ
អន្តរជាតិ
Xavi ពីវីរបុរសក្នុងនាមជាកីឡាករទៅជាគ្រូបង្វឹកក្លិប Barcelona 06, Nov 2021 , 1:14 pm
![](https://image.thmeythmey.com/pictures/2021/11/06/thumb2/front__8_.jpg)
×![]()
FC Barcelona បានប្រកាសពីការឈានដល់កិច្ចព្រមព្រៀងជាមួយលោក Xavi Hernandez ក្នុងតំណែងជាគ្រូបង្វឹកសម្រាប់រដូវកាលបច្ចុប្បន្ន និង២រដូវកាលទៀត។ វីរបុរសដែលចេញពីឈុតយុវជនក្លិបអ្នកមានបុណ្យអេស្ប៉ាញរូបនេះ បានចាកចេញពីក្លិប Al-Sadd របស់កាតា ដែលលោកបានចាប់អាជីពជាគ្រូបង្វឹកលើកដំបូងបំផុតពីឆ្នាំ២០១៩មក។
លោក Xavi អាយុ៤១ឆ្នាំ នឹងទៅដល់ក្រុងបាសេឡូណានាចុងសប្តាហ៍នេះ ហើយពិធីបង្ហាញខ្លួនផ្លូវការនៅ Camp Nou នឹងប្រព្រឹត្តទៅនាថ្ងៃទី៨ ខែវិច្ឆិកា។ លោកត្រូវចូលជំនួសតំណែងលោក Ronald Koeman ដែលត្រូវបានក្លិបបញ្ចប់កិច្ចសន្យាកាលពីថ្ងៃទីថ្ងៃទី២៨ ខែតុលា ដោយសារតែលទ្ធផលមិនគាប់ប្រសើរកន្លងមក។
Xavi គឺជាអតីតកីឡាករថ្នាលរបស់ Barcelona ចាប់តាំងពីឆ្នាំ១៩៩១មក។ សម្រាប់ឈុតធំ អតីតខ្សែបម្រើឆ្នើមលំដាប់ពិភពលោករូបនេះ លេងបាន៧៦៧ប្រកួត និងឈ្នះពានផ្សេងៗគ្នារហូតដល់ទៅ២៥ នារយៈពេល១៧ឆ្នាំជាមួយក្លិប ពោលគឺចន្លោះពីឆ្នាំ១៩៩៨ ដល់ឆ្នាំ២០១៥។
![](https://image.thmeythmey.com/pictures/2021/11/06/thumb2/1__2_.jpg)
ពីឆ្នាំ២០១៥ ដល់ឆ្នាំ២០១៩ Xavi បានលេងឲ្យក្លិប Al Asadd ដោយបានឈ្នះពានក្នុងស្រុកចំនួន៤ ហើយបានជួយឲ្យក្លិបកាតាមួយនេះ ឈ្នះពានផ្សេងៗគ្នាចំនួន៥បន្ថែមទៀត ក្នុងតួនាទីលោកជាគ្រូបង្វឹកចន្លោះពីឆ្នាំ២០១៩ ដល់ខែវិច្ឆិកា ឆ្នាំ២០២១ នេះ។
ក្នុងក្រុមជម្រើសជាតិវិញ Xavi ជាប់ឈុតយុវជនអេស្ប៉ាញគ្រប់កម្រិតចន្លោះពីឆ្នាំ១៩៩៧ ដល់ឆ្នាំ២០០០ និងជាប់ឈុតធំនពីឆ្នាំ២០០០ដល់ឆ្នាំ២០១៤។ គេបានឈ្នះពានជើងឯក FIFA ជាមួយ U20 នៅឆ្នាំ១៩៩ ឈ្នះមេដាយប្រាក់អូឡាំពិកជាមួយ U23 នៅឆ្នាំ២០០០ និងឈ្នះ World Cup នៅឆ្នាំ២០១០ ឈ្នះពានយូរ៉ូ ឆ្នាំ២០០៨, ឆ្នាំ២០១២ ជាមួយជម្រើសជាតិឈុតធំ។ រីឯពានឯកត្តជនវិញ Xavi ទទួលបានយ៉ាងច្រើនសន្ធឹកសន្ធាប់ផងដែរ។
នៅ Barcelona លោក Xavi នឹងត្រូវដឹកបង្វឹកអតីតមិត្តរួមក្រុមរបស់ខ្លួនមួយចំនួន ដូចជា Sergio Busquets, Gerard Piqué, Sergi Roberto, Jordi Alba និង Ter Stegen ជាដើម៕
© រក្សាសិទ្ធិដោយ thmeythmey.com