កាលពីឆ្នាំ២០២០ ខែធ្នូក្លិបនៅ Premier League ស្នើឱ្យលីគអង់គ្លេសប្រើប្រាស់ច្បាប់ប្តូរកីឡាករ៥រូបក្នុងពេលប្រកួត។ ការបោះឆ្នោតពេលនោះ ក៏រងបរាជ័យដោយក្នុងចំណោម២០ក្រុមនោះមានតែ១៤ក្រុមប៉ុណ្ណោះ បានយល់ព្រមនិង៦ផ្សេងទៀតបដិសេធ។ លីគកំពូលធំៗក្នុងតំបន់អឺរ៉ុបរួមមាន Serie A, La Liga, Ligue1, Bundesliga បានប្រើប្រាស់ច្បាប់ដែលប្តូរកីឡាករ៥នាក់ក្នុងពេលប្រកួតដូចគ្នាទៅនឹងការប្រកួត Champions League និងពាន EFL Cup ដែរ។
 

«វាជាបញ្ហាដ៏ធំនៅលីគកំពូលធំជាងគេក្នុងពិភពលោកមួយនេះ។ យើងត្រូវលេង៣៨ប្រកួតបូករួមពានរង្វាន់ពីរផ្សេងទៀត ដែលនេះនៅមិនទាន់រាប់បញ្ចូល Champions League គឺវាច្រើនលើសលុប។ កីឡាករក៏រងរបួសច្រើន បន្ទាប់ពីកូវីដ-១៩ឆ្លងថ្មីមិនថាក្នុងក្លិបខ្ញុំ ឬក្លិបគេផ្សេង ហើយយើងលេងគ្មានពេលសម្រាកសោះ។»លោក Klopp និយាយប្រាប់អ្នកកាសែតបែបនេះថ្ងៃទី២៨ខែធ្នូ។
 

អតីតគ្រូ Dortmund រូបនេះក៏រិះគន់ចំៗទៅលើកាលវិភាគរបស់ Premier League ដែលនាំឱ្យក្រុមលោកមានភាពមមាញឹកខ្លាំងជាងក្លិបដទៃដែលមានពេលសម្រាកគ្រប់គ្រាន់។


 

«ជាលីគកំពូលលេខ១ក្នុងពិភពលោកនិងតំបន់អឺរ៉ុប ច្បាប់ប្តូរកីឡាករនៅតែ៣នាក់ដដែល វាមិនស្មើភាពសោះ ក្រុមយើងលេង៣ប្រកួតក្នុងមួយសប្តាហ៍ ហើយក្រុមដទៃគ្មានការប្រកួតសោះ។ ខ្ញុំសង្ឃឹមថា យើងនឹងជជែកគ្នាជាថ្មីជាមួយ Premier League ហើយគួរតែផ្លាស់ប្តូរវា។» លោក Klopp បានបន្ថែម។
 

អ្នកចាត់ការ​ Chelsea លោក Tuchel បានអំពាវនាវក្រោយចប់ប្រកួតជាមួយ Aston Villa ទៅកាន់ Premier League ឱ្យមានកាលវិភាគដែលស្មើភាពគ្នា និងចូលរួមការពារកីឡាករអំឡុងពេលកូវីដ-១៩ ហើយប្តូរកីឡាករ៥រូបដើម្បីរក្សាកម្លាំងកីឡាករពីជំងឺនិងរងរបួស។ 
 

មិនតែប៉ុណ្ណោះ លោក Rangnick វិញ បានលើកឡើងការប្តូរកីឡាករ៥រូបថា ជារឿងដ៏ត្រឹមត្រូវអំឡុងពេលកូវីដ។ វានឹងជួយដល់កីឡាករបានច្រើនពិសេសអាចទុកពេលដល់កីឡាករធូរស្បើយពីជំងឺកូវីដ-១៩៕