អន្តរជាតិ
ប្រមុខ UN ប្រាប់រុស្ស៊ីមិនត្រូវធ្វើតាមតែចិត្ត ហើយត្រូវគោរពធម្មនុញ្ញ UN ឱ្យបានពេញលេញ 23, Feb 2022 , 12:19 pm
អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស។ រូបថត Xinhua
× អគ្គលេខាធិការអង្គការសហប្រជាជាតិ (UN) អាន់តូនីញ៉ូ ហ្គូតេរ៉េស នៅថ្ងៃទី២២ ខែកុម្ភៈបានជំរុញឱ្យរុស្ស៊ីគោរពតាមធម្មនុញ្ញរបស់អង្គការសហប្រជាជាតិ ក្រោយប្រទេសនេះទទួលស្គាល់តំបន់ផ្ដាច់ខ្លួនពីរនៅអ៊ុយក្រែនជារដ្ឋឯករាជ្យ។ លោក ហ្គូតេរ៉េស ក៏បានថ្កោលទោសរុស្ស៊ីចំពោះការទទួលស្គាល់ឯករាជ្យនេះដែរ។
«គោលការណ៍នៃធម្មនុញ្ញអង្គការសហប្រជាជាតិ មិនមែនជាមុខម្ហូបអាហារឡើយ។ អគ្គលេខធិការអង្គការសហប្រជាជាតិ អាន់តូនីញ៉ូ ហ្គូតេរ៉េស លើកឡើងបែបនេះដោយសំដៅរុស្ស៊ីដែលទើបទទួលស្គាល់តំបន់ផ្ដាច់ខ្លួនពីរនៅអ៊ុយក្រែនជារដ្ឋឯករាជ្យមានសាធារណរដ្ឋប្រជាមានិតដូណេត្ស និងសាធារណរដ្ឋលូហាន។ លោកក៏សង្កត់ធ្ងន់ដោយសំដៅលើរុស្ស៊ីថា រដ្ឋសមាជិកបានទទួលយកគោលការណ៍នៃធម្មនុញ្ញទាំងអស់ ដូចច្នេះពួកគេត្រូវតែអនុវត្តគោលការណ៍នោះទាំងអស់ផងដែរ។
បន្ថែមពីនេះ អគ្គលេខាធិការ UN រូបនេះ ក៏បានហៅការទទួលស្គាល់តំបន់ផ្ដាច់ខ្លួន អ៊ុយក្រែនដោយរុស្ស៊ី ជាការរំលោភលើបូរណភាពទឹកដី និងអធិបតេយ្យភាពរបស់អ៊ុយក្រែន និងជាការបញ្ចប់កិច្ចព្រមព្រៀង Minsk ដ៏សំខាន់ដែលអនុម័តដោយក្រុមប្រឹក្សាសន្តិសុខ UN។ កិច្ចព្រមព្រៀង Minsk ឆ្នាំ ២០១៤ ជាយន្តការស្វែងរកដំណោះស្រាយដោយសន្តិវិធីចំពោះជម្លោះនៅភាគខាងកើតអ៊ុយក្រែន។
ជុំវិញការបញ្ជូនទ័ពទ័ពទៅតំបន់ផ្ដាច់ខ្លួនដោយរុស្ស៊ី លោក ហ្គូតេរ៉េស បានរិះគន់ចំណាត់ការមួយនេះថា បានបំផ្លើសគោលគំនិតនៃការរក្សាសន្តិភាព។ ប្រមុខ UN បញ្ជាក់ទៀតថា នៅពេលដែលកងទ័ពប្រទេសមួយចូលទឹកដីនៃប្រទេសមួយផ្សេងទៀតដោយគ្មានការយល់ព្រម នោះពួកគេមិនមែនជាអ្នករក្សាសន្តិភាពដោយមិនលំអៀងនោះទេ។ ពួកគេមិនមែនជាអ្នករក្សាសន្តិភាពទាល់តែសោះ។ លោក ហ្គូតេរ៉េស ក៏បានអំពាវនាវឱ្យមានបទឈប់បាញ់ជាបន្ទាន់ ហើយភាគីទាំងអស់ត្រូវវិលទៅរកផ្លូវនៃការចរចាគ្នាឡើងវិញ។
គួរបញ្ជាក់ថា អាម៉េរិក និងសម្ព័ន្ធមិត្តបានចាប់ផ្ដើមប្រកាសដាក់ទណ្ឌកម្មសេដ្ឋកិច្ចលើរុស្ស៊ី ខណៈដែលពួកគេមើលឃើញថាស្ថានការណ៍ហាក់មិនថមថយ ហើយរុស្ស៊ីក៏ទំនងជាចាប់ផ្ដើមឈ្លានពានអ៊ុយក្រែនផងដែរ៕
© រក្សាសិទ្ធិដោយ thmeythmey.com