ព្រឹកថ្ងៃទី០៧ ខែកក្កដា ឆ្នាំ២០២២- ធនាគារ ព្រីនស៍ បានប្រកាសបើកសម្ពោធធនាគារ ព្រីនស៍ ម.ក សាខាខណ្ឌទួលគោក-សង្កាត់បឹងកក់ទី១ នៅជាន់ផ្ទាល់ដីនៃអគារ ធីខេ ស្តារ អ៊ីធើណេសិនណល។ ពិធីបើកសម្ពោធជាផ្លូវការនេះ ត្រូវបានប្រារព្ធឡើងដោយ ឯកឧត្តម រ័ត្ន សុវណ្ណានរៈ ឧបការីទេសាភិបាល និងជាអគ្គនាយកត្រួតពិនិត្យនៃធនាគារជាតិនៃកម្ពុជា គណៈគ្រប់គ្រងជាន់ខ្ពស់នៃធនាគារ ព្រីនស៍ ដៃគូពាណិជ្ជកម្ម និងអតិថិជនវីអាយភី។
ជាមួយនឹងការបើកដំណើរការសាខានេះ ធនាគារ ព្រីនស៍ ក្នុងពេលបច្ចុប្បន្នមានសាខាសរុបចំនួន ៣៣ទីតាំង សាលរង់ចាំសេវាធនាគារអាទិភាពមានចំនួន០៤ទីតាំង និងម៉ាស៊ីនអេធីអឹមមានចំនួន ៨២ទីតាំង នៅក្នុងទូទាំងប្រទេសកម្ពុជា។
![](https://image.thmeythmey.com/pictures/2022/07/07/7720221623a__1_.jpg)
សាខានេះនឹងបំពេញនូវរាល់ប្រតិបត្តិការធនាគារមូលដ្ឋាន និងតម្រូវការជាក់លាក់របស់អតិថិជន ដោយផ្តល់ជូននូវវិសាលគមនៃផលិតផលធនាគារ និងសេវាកម្មហិរញ្ញវត្ថុទាំងមូលដែលគ្របដណ្តប់លើសេវាធនាគារបុគ្គល សេវាធនាគារអាជីវកម្ម និងសេវាធនាគារអាទិភាព។ មិនត្រឹមតែបណ្តាញរូបវ័ន្តប៉ុណ្ណោះទេ ប៉ុន្តែកម្មវិធីសេវាធនាគារតាមទូរស័ព្ទទាំងបី ដែលឈ្នះរង្វាន់ជាច្រើនរបស់ធនាគារ ព្រីនស៍ បាននឹងកំពុងផ្តល់ភាពងាយស្រួលដល់អតិថិជនបុគ្គល និងអតិថិជនអាជីវកម្មផងដែរ។
អតិថិជនបុគ្គលអាចចូលប្រើប្រាស់កម្មវិធីPRINCE Mobile សម្រាប់តម្រូវការធនាគាររបស់ពួកគេ ខណៈដែលអតិថិជនអាជីវកម្មក៏អាចចូលប្រើប្រាស់កម្មវិធីសេវាធនាគារតាមទូរស័ព្ទពីរផ្សេងទៀតគឺ កម្មវិធីPRINCE MobileBiz និងកម្មវិធីPRINCE Merchant ដែលបម្រើនូវតម្រូវការពិសេស និងជាក់លាក់សម្រាប់ម្ចាស់អាជីវកម្ម ២៤/៧។
![](https://image.thmeythmey.com/pictures/2022/07/07/a__3_.jpg)
ការថ្លែងមតិក្នុងពិធីបើកសម្ពោធសាខាថ្មីនេះ ឯកឧត្តម រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យនៃធនាគារជាតិនៃកម្ពុជា បានមានប្រសាសន៍ថា “អបអរសាទរ និងវាយតម្លៃខ្ពស់ដល់ការខិតខំប្រឹងប្រែងរបស់ថ្នាក់ដឹកនាំធនាគារ ព្រីនស៍ ម.ក ជាពិសេស ការបេ្តជ្ញាគាំទ្ររបស់ភាគទុនិក ក្នុងការពង្រីកបណ្តាញប្រតិបត្តិការអាជីវកម្មរបស់ខ្លួន ជាបន្តបន្ទាប់។ ខ្ញុំសង្ឃឹមយ៉ាងមុតមាំថា ធនាគារ ព្រីនស៍ ម.ក នឹងនាំមកនូវបច្ចេកវិទ្យាទំនើបៗ និងផលិតផលសេវាហិរញ្ញវត្ថុថ្មីៗ ឱ្យកាន់តែសម្បូរបែប ដើម្បីបំពេញសេចក្តីត្រូវការរបស់អតិថិជនបច្ចុប្បន្ន ក៏ដូចជានាពេលអនាគត និងបន្តគាំទ្រដល់ការអភិវឌ្ឍវិស័យធនាគារនៅកម្ពុជាបន្ថែមទៀត។”
លោក ហ៊ន់ សុរចនា អភិបាលគ្រប់គ្រង និងប្រធាននាយកប្រតិបត្តិនៃធនាគារ ព្រីនស៍ ម.ក បានថ្លែងមតិថា “គិតមកដល់ពេលនេះ ធនាគារ ព្រីនស៍ ម.ក បានផ្តល់សេវាកម្មជូនប្រជាជនកម្ពុជា និងដំណើរការអស់ រយៈពេលជិត ៤ឆ្នាំមកហើយ ដែលយើងបានសម្រេចនូវសមិទ្ធិផលជាច្រើន។ កាលពីឆ្នាំ២០១៨ យើងមានសាខាចំនួនត្រឹមតែ ០៩ទីតាំងតែប៉ុណ្ណោះ ហើយថ្ងៃនេះ យើងនៅទីនេះប្រកាស និងប្រារព្ធពិធីសម្ពោធជាផ្លូវការនូវធនាគារ ព្រីនស៍ ម.ក សាខាខណ្ឌទួលគោក ដែលជាសាខាទី៣៣ របស់យើង។”
![](https://image.thmeythmey.com/pictures/2022/07/07/7720221623a__2_.jpg)
លោកបានមានប្រសាសន៍បន្ថែមទៀតថា “សាខាធនាគារនៅពេលបច្ចុប្បន្ន មានភាពខុសគ្នាពីសម័យមុន ដោយសារតែភាពជឿនលឿននៃបច្ចេកវិទ្យាជាមួយនឹងការប្រើប្រាស់កម្មវិធីសេវាធនាគារតាមទូរស័ព្ទ សេវាធនាគារតាមអ៊ីនធើណិត និងម៉ាស៊ីនអេធីអឹម តួនាទីរបស់សាខាធនាគារបានវិវត្តទៅជាកន្លែងដែលភ្ជាប់ទំនាក់ទំនងរវាងមនុស្សក្នុងពេលធ្វើប្រតិបត្តិការធនាគារ។ ក្រៅពីការធ្វើប្រតិបត្តិការធនាគារ សាខាធនាគារនឹងដើរតួនាទីកាន់តែសំខាន់ក្នុងការបម្រើសេវាកម្មផ្សេងៗ ដូចជាសេវាធនាគារអាទិភាព ការដាក់ពង្រាយបុគ្គលិកជំនាញសម្រាប់ផលិតផលដែលមានភាពស្មុគស្មាញ ដូចជា ផលិតផលប៊េងកាសូរេន ការទាក់ទងនឹងការចូលរួមនៃម៉ាកយីហោ (Brand Engagement) ដែលម៉ាកយីហោមានភាពរស់រវើក និងជាកន្លែងសម្រាប់ទំនាក់ទំនង ដោយផ្ទាល់រវាងមនុស្សនៅក្នុងសហគមន៍មូលដ្ឋាន។ ដូច្នេះហើយ បើទោះបីជាយើងអាចសម្របខ្លួនបានយ៉ាងរហ័សទៅនឹងប្រព័ន្ធធនាគារឌីជីថលអនឡាញក៏ដោយ ក៏យើងនៅតែមានតម្រូវការចាំបាច់ក្នុងការមកកាន់សាខាធនាគារដោយផ្ទាល់ផងដែរ។”
ធនាគារ ព្រីនស៍ បានធ្វើការយ៉ាងសកម្មបំផុត ដើម្បីក្លាយជាធនាគារឌីជីថលឈានមុខ ហើយមានបំណងយ៉ាងមុតមាំក្នុងការក្លាយជាធនាគារជម្រើសទី១សម្រាប់ប្រជាជនកម្ពុជា។ ដើម្បីសម្រេចបាននូវគោលដៅនេះ ធនាគារ ព្រីនស៍ បានបន្ត និងប្តេជ្ញាក្នុងការពង្រីកយុទ្ធសាស្រ្តភាពជាដៃគូ និងពង្រឹងប្រព័ន្ធអ៊ីកូទាំងក្នុងស្រុក និងអន្តរជាតិ ដើម្បីផ្តល់ជូននូវបទពិសោធន៍ធនាគារដ៏ពេញលេញ និងទាន់សម័យ ជាមួយនឹងការថែទាំពិសេសប្រកបដោយវិជ្ជាជីវៈ និងអត្ថប្រយោជន៍ផ្សេងៗសម្រាប់អតិថិជនមានស្រាប់ និងអតិថិជនសក្តានុពល។
![](https://image.thmeythmey.com/pictures/2022/07/07/a__4_.jpg)
នៅពាក់កណ្តាលឆ្នាំកន្លងទៅនេះ ធនាគារ ព្រីនស៍ បានដាក់ដំណើរការផលិតផល និងសេវាកម្មថ្មីៗសំខាន់ៗជាច្រើនសម្រាប់អតិថិជនរបស់យើង ដែលរួមមាន ផលិតផលប៊េងកាសូរេន ជាមួយក្រុមហ៊ុនធានារ៉ាប់រង អេអាយអេ ប័ណ្ណឥណទានអន្តរជាតិ UnionPay សេវាផ្ទេរប្រាក់Ria និងការទូទាត់ប្រាក់ឆ្លងធនាគារតាមរយៈKHQR ព្រមទាំងផលិតផល និងសេវាកម្មជាច្រើនទៀត។
ក្នុងការអបអរសាទរការបើកសម្ពោធសាខាថ្មី ធនាគារ ព្រីនស៍ បានដាក់ដំណើរការនូវការផ្តល់ជូនពិសេសចំនួនបីផ្សេងគ្នា ស្របតាមប្រភេទអតិថិជន៖ អតិថិជនបុគ្គល អតិថិជនអាជីវកម្ម និងអតិថិជនសេវាធនាគារអាទិភាព។ សម្រាប់អតិថិជនថ្មីដែលបើកគណនីនៅធនាគារ ព្រីនស៍ ម.ក សាខាខណ្ឌទួលគោក-សង្កាត់បឹងកក់ទី១ នឹងទទួលបានអត្ថប្រយោជន៍ និងឯកសិទ្ធិភាពជាច្រើនដូចជា ពិន្ទុរង្វាន់ព្រីនស៍ ប្រាក់ត្រឡប់ សំបុត្រកុន កូប៉ុង និងរង្វាន់ជាច្រើនផ្សេងទៀត អាស្រ័យលើប្រភេទគណនីដែលអតិថិជនជ្រើសរើស។
ដើម្បីទទួលបានព័ត៌មានថ្មីៗជាប្រចាំអំពីការផ្តល់ជូនពិសេសរបស់ធនាគារ ព្រីនស៍ អតិថិជនអាចតាមដាន Facebook Page/ Instagram/ Telegram ផ្លូវការរបស់ធនាគារ ព្រីនស៍។
សម្រាប់ព័ត៌មានបន្ថែម សូមចូលទៅកាន់គេហទំព័រ
www.princebank.com.kh ឬទាក់ទងមកកាន់សេវាទំនាក់ទំនងអតិថិជនរបស់យើងតាមរយៈលេខ ១៨០០ ២០ ៨៨៨៨ (មិនគិតថ្លៃ)៕
![](https://image.thmeythmey.com/pictures/2022/07/07/a__5_.jpg)
(អត្ថបទពាណិជ្ជកម្ម)