ដោយ ៖ ធន់ សេងហុង
ធនាគារអភិវឌ្ឍន៍អាស៊ី (ADB) បានបន្ទាបការព្យាករកំណើនសេដ្ឋកិច្ច នៅតំបន់អាស៊ីនិងប៉ាស៊ីហ្វិកកំពុងអភិវឌ្ឍ ពី៥,២ភាគរយ មកត្រឹម៤,៦ភាគរយ នៅឆ្នាំនេះ ដោយសារការធ្លាក់ចុះនៃសេដ្ឋកិច្ចចិន និងការរឹតបន្តឹងរូបិយវត្ថុរបស់ប្រទេស ដែលមានសេដ្ឋកិច្ចជឿនលឿន ។ជាពិសេសការអូសបន្លាយនៃសង្គ្រាមរវាងរុស្ស៊ីនិងអ៊ុយក្រែន។
ធនាគារអភិវឌ្ឍន៍អាស៊ី បានចេញសេចក្តីប្រកាសព័ត៌មានមួយ នៅថ្ងៃទី ២១កក្កដា ជុំវិញការព្យាករកំណើនសេដ្ឋកិច្ចនៅតំបន់អាស៊ី និងប៉ាស៊ីហ្វិក។ ក្នុងនោះ ADB បានបន្ទាបការព្យាកររបស់ខ្លួនពី ៥,២ភាគរយ កាលពីមេសាកន្លងទៅ មកត្រឹម ៤,៦ភាគរយវិញ។
លោក Albert Park ប្រធានសេដ្ឋវិទូរបស់ ADB បានលើកឡើងថា ៖ «ផលប៉ះពាល់សេដ្ឋកិច្ចនៃជំងឺកូវីដ-១៩ បានថមថយខ្លះដែលភាគច្រើននៅតំបន់អាស៊ី ប៉ុន្តែយើងនៅឆ្ងាយពីការងើបឡើងវិញពេញលេញ និងប្រកបដោយនិរន្តរភាព»។
ប្រធានសេដ្ឋវិទូរបស់ ADB បានបន្តថា ៖«ក្រៅពីការធ្លាក់ចុះនៃសេដ្ឋកិច្ចចិន ឥទ្ធិពលនៃសង្រ្គាមនៅក្នុងប្រទេសអ៊ុយក្រែន បានបន្ថែមសម្ពាធអតិផរណាដែលបណ្តាលឱ្យធនាគារកណ្តាលនៅជុំវិញពិភពលោកដំឡើងអត្រាការប្រាក់ជាហេតុនាំឱ្យកំណើនធ្លាក់ចុះបន្តិច។ វាមានសារៈសំខាន់ណាស់ក្នុងការដោះស្រាយ ភាពមិនប្រាកដប្រជាជាសកលទាំងអស់នេះ ដែលបន្តបង្កហានិភ័យដល់ការងើបឡើងវិញនៃតំបន់»។
កំណើនសេដ្ឋកិច្ចរបស់ចិន បានកើនត្រឹម ៤ភាគរយ ក្នុងឆ្នាំនេះ ធៀបនឹងការព្យាករពីមុន ៥ភាគរយ។ ADB ក៏បានទម្លាក់ការព្យាកររបស់ខ្លួន ចំពោះឥណ្ឌាពី ៧,៥ភាគរយ មកត្រឹម ៧,២ភាគរយ ដោយសារមានអតិផរណាខ្ពស់ជាងការរំពឹងទុក និងការរឹតបន្តឹងរូបិយវត្ថុ។
ចំណែក អតិផរណានៅក្នុងតំបន់កំពុងអភិវឌ្ឍនៅអាស៊ី និងប៉ាស៊ីហ្វិក ត្រូវបានព្យាករថានឹងកើនឡើងដល់ ៤,២ភាគរយ នៅឆ្នាំនេះ ធៀបនឹងការព្យាករពីមុន ៣,៧ភាគរយ។ ប៉ុន្តែកម្រិតអតិផរណានៅក្នុងតំបន់នេះ នៅតែទាបជាងតំបន់ផ្សេងទៀតនៅក្នុងពិភពលោក។
ដោយឡែក ADB ក៏បានព្យាករពីតំបន់អាស៊ីអាគ្នេយ៍ ដែលទំហំសេដ្ឋកិច្ចនៅតំបន់នេះ មានការកើនពី ៤,៩ភាគរយដល់ ៥,0ភាគរយ នៅឆ្នាំនេះ ដោយសារមានការកើនឡើងនៃតម្រូវការក្នុងស្រុក ស្របពេលការរឹតត្បិតកូវីដ១៩ កាន់តែធូរស្រាល។
គួរបញ្ជាក់ថា សម្រាប់ឆ្នាំ ២០២៣ ADB បានបន្ទាបការព្យាករកំណើនសេដ្ឋកិច្ចរបស់ខ្លួននៅតំបន់នេះពី ៥,៣ភាគរយ មកត្រឹម ៥,២ភាគរយ ខណៈការអតិផរណានឹងកើនពី ៣,១ភាគរយ ទៅដល់ ៣,៥ភាគរយ។
ធនាគារអភិវឌ្ឍន៍អាស៊ី ប្តេជ្ញាថានឹងសម្រេចឱ្យបាននូវ វិបុលភាព បរិយាប័ន្ន ភាពធន់និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង៕