សហភាពសហព័ន្ធយុវជនកម្ពុជា (ស.ស.យ.ក.) នាយប់ថ្ងៃទី២៩ ខែកក្កដា បានចេញសេចក្តីថ្លែងការណ៍ គាំទ្រចំពោះការសម្រេចអនុម័តរបស់អង្គរដ្ឋសភា លើការធ្វើវិសោធនកម្មរដ្ឋធម្មនុញ្ញលើកទី១០។

«ការធ្វើវិសោធនកម្មរដ្ឋធម្មនុញ្ញលើកទី១០នេះ គឺជាការគិតគូរគ្រប់ជ្រុងជ្រោយប្រកបដោយគតិបណ្ឌិត សំដៅបំពេញបន្ថែមចន្លោះខ្វះខាតនៃរដ្ឋធម្មនុញ្ញ ដើម្បីធានាការពារនូវស្ថិរភាពនយោបាយ ភាពមិនជាប់គាំងនៃស្ថាប័នជាតិ»។ នេះជាការវាយតម្លៃរបស់ ស.ស.យ.ក. ដែលជាស្ថាប័នយុវជនមួយមានកំណើតតាំងពីថ្ងៃទី២ ខែធ្នូ ឆ្នាំ១៩៧៨។

កាលពីថ្ងៃទី២៨ ខែកក្កដា សម័យប្រជុំរដ្ឋសភាលើកទី៧ បានសម្រេចអនុម័តសំឡេងលើសពីរភាគបីនៃចំនួនសមាជិកសភាទាំងមូលលើសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រា១៩ ថ្មី (មួយ) មាត្រា៨៩ មាត្រា៩៨ថ្មី មាត្រា១០២ថ្មី មាត្រា១១៩ថ្មី (មួយ) និងមាត្រា១២៥ថ្មី (មួយ) នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ថ្មី មាត្រា៤ថ្មី នៃច្បាប់រដ្ឋធម្មនុញ្ញបន្ថែម។

ក្រៅពីស.ស.យ.ក. បណ្តាគណបក្សនយោបាយមួយចំនួន ដូចជាគណបក្សហ៊្វុនស៊ិនប៉ិច គណបក្សខ្មែររួបរួមជាតិ គណបក្សសញ្ជាតិកម្ពុជា គណបក្សសំបុកឃ្មុំសង្គមប្រជាធិបតេយ្យ គណបក្សយុវជនកម្ពុជា គណបក្សខ្មែតែមួយ គណបក្សធម្មាធិបតេយ្យ គណបក្សកម្លាំងប្រជាធិបតេយ្យ ជាដើម ក៏បានចេញសេចក្តីថ្លែងការណ៍បង្ហាញជំហរគាំទ្រផងដែរ។

ប៉ុន្តែសម្រាប់គណបក្សភ្លើងទៀន និងអ្នករិះគន់មួយចំនួន បានប្រតិកម្មថា ការធ្វើវិសោធនកម្មរដ្ឋធម្មនុញ្ញលើកទី១០នេះ គឺដើម្បីតែការពារអំណាចមនុស្សមួយក្រុមប៉ុណ្ណោះ។ គណបក្សភ្លើងទៀន គណបក្សឆន្ទះខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន សុទ្ធតែបានបង្ហាញជំហរមិនគាំទ្រ។

ទាក់ទងនឹងបញ្ហានេះដែរ នាយប់ថ្ងៃទី២៩កក្កដា ក្រសួងយុត្តិធម៌ បានចេញសេចក្ដីប្រកាសព័ត៌មាន អញ្ជើញឲ្យគណបក្សនយោបាយ និងសង្គមស៊ីវិលទាំងអស់ដែលអះអាងថា ការកែរដ្ឋធម្មនុញ្ញប៉ះពាល់ដល់ប្រជាធិបតេយ្យ ទៅបំភ្លឺដោយផ្ទាល់ជាមួយគ្នានៅទីស្ដីការក្រសួង។ ក្រុមអ្នកសារព័ត៌មាន ក៏ត្រូវបានអញ្ជើញឲ្យតាមដានយកព័ត៌មាន នៃជំនួបនេះផងដែរ៕