ថ្លែងប្រាប់សារព័ត៌មានថ្មីៗ តាមរយៈកម្មវិធី «គំនិតថ្មី» ស្រ្តីសម្បុរសស្តើង ម្ចាស់ហាង Moss Only ទាំងពីរសាខា ពន្យល់ថា បច្ចុប្បន្នហាងអ្នកស្រី ផ្តោតលើការលក់សម្លៀកបំពាក់ដែលនាំចូលពីបរទេស និងផ្គត់ផ្គង់ទឹកមាត់ត្រចៀកកាំ ដែលជាផលិតផលខ្មែរ ផលិត និងនាំចូលពីស្រុកស្រែអំបិល ខេត្តកោះកុង។

 

ចាប់ផ្តើមអាជីវកម្មលក់សម្លៀកបំពាក់ ចេញពីការថតរូបម៉ូតសម្លៀកបំពាក់ ផ្សព្វផ្សាយលក់ក្នុងបណ្តាញសង្គមហ្វេសប៊ុក អ្នកស្រី ឃួន ជីងជីង ​ម្ចាស់ហាង Moss Only មានមោទកភាពយ៉ាងចំពោះកិច្ចខិតខំប្រឹងរបស់ខ្លួនរយៈពេល៧ឆ្នាំមកនេះ។ មានវ័យ ៣១ឆ្នាំ អ្នកស្រី ជីងជីង ដែលបានរៀនត្រឹមបាក់ឌុបនោះ មិននឹកស្មានខ្លួន អាចជម្នះពាក្យថា «ធ្វើមិនបាន» នោះឡើយ។ អ្នកស្រី ឃួន ជីងជីង បានលើកទឹកចិត្តដល់បងប្អូនស្រ្តី ដែលជាមេផ្ទះក្តី ឬ អ្នកដែលរៀនសូត្រនៅសាលាមិនបានខ្ពស់ខ្ពស់ដូច្នេះ៖ « បើបងប្អូនស្រលាញ់មុខរបរអី បងប្អូនដាក់ចិត្តធ្វើវាទៅ ហើយខំធ្វើឱ្យបានល្អ នោះបងប្អូននឹងមានកម្លាំងចិត្ត ដើម្បីជម្នះវាជាមិនខានឡើយ»។ 

 

ទោះបីរៀនចប់ត្រឹមថ្នាក់វិទ្យាល័យ តែម្ចាស់ហាងរូបនេះ តែងដកយកបទពិសោធន៍ថ្មីៗ និងរបៀបគ្រប់គ្រងហាងជាបន្តបន្ទាប់ពីស្វាមីរបស់ខ្លួន ដែលជាអ្នកជំនួញមានវ័យចាស់ជាងខ្លួនបន្តិច។ រាប់ទាំងការឡាយលក់ទំនិញតាមប្រព័ន្ធអនឡាញន៍ និងការបញ្ចុះតម្លៃទំនិញតាមរដូវកាល ព្រមទាំងភាពស្មោះត្រង់ជាមួយអតិថិជនខ្លួន ទើបហាងទាំងពីរនេះហាក់មានការពេញនិយមពីសំណាក់យុវជនខ្មែរ។ លើសពីនេះ ប្តីប្រពន្ធម្ចាស់ហាង Moss Only ក៏បានផលិតទឹកមាត់ត្រចៀកកាំ ដែលដើម្បីបំពេញតម្រូវការទីផ្សារជូនអតិថិជនផងដែរ៕