នាពិធីដាក់បង្ហាញនៅរោងចក្ររបស់ក្រុមហ៊ុន Northrop Grumman ក្នុងក្រុង Palmdale រដ្ឋកាលីហ្វ័រញ្ញ៉ា យន្តហោះទម្លាក់គ្រាប់បែក B-21 Raider ត្រូវបានដាក់បង្ហាញ ដោយមានមនុស្សជាច្រើនចូលរួម ក្នុងនោះរួមទាំងមន្រ្តីជាន់ខ្ពស់អាម៉េរិកផង។ 

 

«យន្តហោះ B-21 Raider ជាយន្តហោះទម្លាក់គ្រាប់បែកយុទ្ធសាស្រ្តដំបូងបំផុត ក្នុងរយៈច្រើនជាង ៣ទសវត្សរ៍»។ លោក ឡយ អូស្ទីន រដ្ឋមន្រ្តីការពារជាតិអាម៉េរិក បានសង្កត់ធ្ងន់បែបនេះ នៅក្នុងពិធីដាក់បង្ហាញយន្តហោះ ក្នុងថ្ងៃទី២ ខែធ្នូ។ 

 

ដោយមិនបានបង្ហាញពីសមត្ថភាពលម្អិតរបស់យន្តហោះ លោកអូស្ទីនបានសរសើរយន្តហោះ B-21 Raider ថា គ្មានយន្តហោះទម្លាក់គ្រាប់បែកណា អាចប្រៀបបាននឹងយន្តហោះទម្លាក់គ្រាប់បែកនេះឡើយ។ 

 

ដូចយន្តហោះ F-22 និងF-35 ដែរ យន្តហោះទម្លាក់គ្រាប់បែក ដែលអាចមានតម្លៃ ៧០០លានដុល្លារក្នុងមួយគ្រឿងនេះ មានសមត្ថភាពកំបាំងខ្លួនពីរ៉ាដារបស់សត្រូវ ហើយថែមទាំងអាចបំពាក់អាវុធនុយក្លេអ៊ែរ និងអាវុធផ្សេងទៀតបានផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

បើតាមប្រមុខការពារជាតិអាម៉េរិក បើទោះប្រព័ន្ធការពារអាកាសមានភាពទំនើបក៏ដោយ ប៉ុន្តែវាពិបាកក្នុងការចាប់សញ្ញាយន្តហោះ B-21 Raider នៅលើអាកាសណាស់៕