ជាតិ
ថ្នងមូល៖ ហាក់នៅពេញនិយមប្រើប្រាស់ នៅតាមបណ្តោយដងស្ទឹងពោធិសាត់ 18, Dec 2022 , 7:00 pm
![អ្នកនេសាទ កំពុងនេសាទត្រី ដោយប្រើ «ថ្នងមូល» នៅក្នុងស្ទឹងពោធិសាត់ ក្នុងស្រុកក្រគរ ខេត្តពោធិសាត់។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ](https://image.thmeythmey.com/pictures/2022/12/18/thumb2/wt.jpg)
អ្នកនេសាទ កំពុងនេសាទត្រី ដោយប្រើ «ថ្នងមូល» នៅក្នុងស្ទឹងពោធិសាត់ ក្នុងស្រុកក្រគរ ខេត្តពោធិសាត់។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
×![]()
ដោយ៖ ឈុត ឈាណា / Wonders of the Mekong
ពោធិសាត់៖ ជារៀងរាល់ឆ្នាំ ឧបករណ៍នេសាទបែបបុរាណជាច្រើនប្រភេទ ហាក់ត្រូវបានគេបោះបង់ចោលជាបណ្តើរៗ។ ដោយសារប្រសិទ្ធភាព ចាប់ត្រីបានតិច ចំណាយកម្លាំងច្រើន និងប្រើពេលវេលាយូរ បានបណ្តាលឱ្យឧបករណ៍នេសាទបែបបុរាណទាំងនោះ បាត់មុខពីឧបករណ៍នេសាទចាំបាច់ប្រចាំថ្ងៃ ដែលធ្លាប់តែពេញនិយមពីអតីកាល។
ជាជំនួសមកវិញ ឧបករណ៍នេសាទទាន់សម័យ ទំនើប មានប្រសិទ្ធភាពខ្ពស់ ចាប់ត្រីច្រើន ប្រើពេលវេលាតិច ត្រូវបានអ្នកនេសាទយកមកប្រើប្រាស់ យ៉ាងទូលំទូលាយ។
![](https://image.thmeythmey.com/pictures/2022/12/18/p.jpg)
ត្រីចម្រុះប្រភេទ ដែលអ្នកនេសាទ ចាប់បានដោយ «ថ្នងមូល» នៅក្នុងស្ទឹងពោធិសាត់ ក្នុងស្រុកក្រគរ ខេត្តពោធិសាត់។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
បច្ចុប្បន្ននេះ យើងអាចឃើញមានការប្រើប្រាស់ឧបករណ៍នេសាទ បែបបុរាណគ្រប់ប្រភេទ ដោយកម្រ។ ជាក់ស្តែង ឧបករណ៍នេសាទ «ថ្នងមូល» បើយើងសង្កេតជុំវិញបឹងទន្លេសាប យើងអាចឃើញមានការពេញនិយមប្រើប្រាស់ តែនៅតាមបណ្តោយដងស្ទឹងពោធិសាត់ ក្នុងស្រុកក្រគរ ខេត្តពោធិសាត់ប៉ុណ្ណោះ។ អ្នកនេសាទប្រើប្រាស់ឧបករណ៍នេះ ដើម្បីចាប់ត្រីចម្រុះប្រភេទ ដែលធ្វើចរាចរផ្លាស់ទីចេញពីបឹងទន្លេសាប ចាប់ពីពាក់កណ្តាលខែកក្កដា ដល់ចុងខែកញ្ញា។
![](https://image.thmeythmey.com/pictures/2022/12/18/o.jpg)
អ្នកនេសាទ កំពុងនេសាទត្រី ដោយប្រើ «ថ្នងមូល» នៅក្នុងស្ទឹងពោធិសាត់ ក្នុងស្រុកក្រគរ ខេត្តពោធិសាត់។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
ឧបករណ៍នេសាទ «ថ្នងមូល» គឺជាឧបករណ៍នេសាទបែបបុរាណខ្នាតតូច។ វាត្រូវបានផលិតឡើងពីស៊ុមឫស្សីរាងមូល ឬពងក្រពើ សម្រាប់បំពាក់សំណាញ់ ដូចមានរូបភាពបង្ហាញស្រាប់។ ទំហំ និងរូបរាងនៃស៊ុមរបស់ថ្នង មានភាពខុសប្លែកគ្នាទៅតាមអ្នកប្រើប្រាស់ចង់បាន។ វាមានប្រវែងសរុប ប្រហែល ៣ ម៉ែត្រ។ អ្នកនេសាទប្រើប្រាស់ថ្នងមូលនេះ នៅតាមច្រាំងទន្លេ ស្ទឹង ខណៈពេលដែលមានទឹកជំនន់រដូវវស្សា ហូរចេញ ឬចូល ដើម្បីចាប់ប្រភេទត្រីចម្រុះ ដែលធ្វើចរាចរផ្លាស់ទីទៅខ្សែទឹកខាងលើ។ សូមកុំប្រើប្រាស់ឧបករណ៍នេសាទទំនើបៗ ដែលខុសនឹងច្បាប់ជលផល៕
© រក្សាសិទ្ធិដោយ thmeythmey.com