ជាតិ
អភិបាលខេត្តកំពង់ឆ្នាំង ចង់ពង្រឹងវារីវប្បកម្មក្នុងខេត្តឱ្យខ្លាំង! 03, Feb 2023 , 6:59 pm
× ភ្នំពេញ៖ «យើងចង់ពង្រឹងវារីវប្បកម្ម ដោយសារខេត្តកំពង់ឆ្នាំងនៅកណ្ដាលគេ។ ចក្ខុវិស័យរបស់ខេត្ត គឺយើងចង់ពង្រឹងវារីវប្បកម្មឱ្យខ្លាំង ព្រោះប្រជាជនកំពង់ឆ្នាំងចិញ្ចឹមត្រីបានច្រើន ទាំងស្រះ និងបែ»។ លោក ស៊ុន សុវណ្ណារិទិ្ធ អភិបាលខេត្តកំពង់ឆ្នាំង លើកឡើងបែបនេះ នៅក្នុងសន្និសីទសារព័ត៌មាន «ភាពជោគជ័យក្នុងរយៈពេល ៥ឆ្នាំកន្លងមករបស់ខេត្តកំពង់ឆ្នាំង» កាលពីចុងខែ មករា។
ខេត្តកំពង់ឆ្នាំង ស្ថិតនៅភាគពាយ័ព្យនៃប្រទេសកម្ពុជា។ កំពង់ឆ្នាំង មានប្រជាជនសរុប ៥៧១ ០៦២នាក់ ក្នុងនោះពលរដ្ឋដែលប្រកបរបរកសិកម្មមានចំនួន ៧២,២ភាគរយ។ ខេត្តកំពង់ឆ្នាំង ក៏ជាខេត្តដែលមានបឹងទន្លេសាប និងអំណោយផលលើការចិញ្ចឹមត្រីផងដែរ។
បើតាមលោក ស៊ុន សុវណ្ណារិទិ្ធ អភិបាលខេត្តកំពង់ឆ្នាំង ត្រីដែលចិញ្ចឹមនៅខេត្តកំពង់ឆ្នាំង ក្រៅពីផ្គត់ផ្គង់ក្នុងប្រទេស ក៏បាននាំចេញទៅថៃ និងវៀតណាម។ បច្ចុប្បន្ន ក្នុងខេត្តកំពង់ឆ្នាំង មានស្រះចិញ្ចឹមជាង ៨០០ស្រះ និងបែត្រី មានជាង ៧០០បែ។
ដើម្បីឱ្យផ្នែកវារីវប្បកម្មក្នុងខេត្តកំពង់ឆ្នាំង មានភាពរីកចម្រើន និងផ្ដល់ភាពងាយស្រួលដល់វារីវប្បករក្នុងខេត្ត និងខេត្តជាប់បឹងទន្លេសាប រដ្ឋបាលខេត្ត នឹងសហការជាមួយប្រទេសជិតខាង ក្នុងការភ្ញាស់កូនត្រី។ ក្នុងសន្និសីទសារព័ត៌មាន «ភាពជោគជ័យក្នុងរយៈពេល ៥ឆ្នាំកន្លងមករបស់ខេត្តកំពង់ឆ្នាំង» អភិបាលខេត្តកំពង់ឆ្នាំង បញ្ជាក់ដូច្នេះ៖ «ខេត្តបានធ្វើការងារច្រើនឆ្នាំដែរ ជាភាគីមិត្តយើង។ ប៉ុន្តែបញ្ហាកូវីដ-១៩ យើងក៏ផ្អាកការទំនាក់ទំនងគ្នា។ ក្រោយកូវីដ-១៩ ភាគីមិត្តយើង នឹងជួយបច្ចេកទេសភ្ញាស់កូនត្រី ដើម្បីលក់ឱ្យពលរដ្ឋក្នុងខេត្តផង និងខេត្តជុំវិញបឹងទន្លេសាប»។
សូមបញ្ជាក់ថា ថ្មីៗនេះ រដ្ឋាភិបាលកម្ពុជា បានកាត់ដី២២២ហិកតាដល់រដ្ឋបាលខេត្តកំពង់ឆ្នាំង។ តាមរយៈដីដែលរដ្ឋាភិបាលបានកាត់នេះ រដ្ឋបាលខេត្តកំពង់ឆ្នាំង នឹងប្រើប្រាស់សម្រាប់ពង្រឹងផ្នែកវារីវប្បកម្ម និងវារីកសិ-ទេសចរណ៍ផងដែរ៕
Tag:
កំពង់ឆ្នាំង
ត្រី
វារីវប្បកម្ម
© រក្សាសិទ្ធិដោយ thmeythmey.com