ជាតិ
Facebook ជាឧបករណ៍ទំនាក់ទំនងយ៉ាងល្អ តែបើប្រើខុសមុខងារនឹងមានផលប៉ះពាល់ដល់សង្គម
16, Jun 2023 , 4:29 pm
×![]()
អ្នកមានប្រជាប្រិយភាពលើបណ្ដាញផ្សព្វផ្សាយ អ្នកបង្កើតមាតិកា និងអ្នកមកពីអង្គភាពបម្រើការងាររអភិវឌ្ឍសហគមន៍ បានពិភាក្សាគ្នាអំពីការបង្កើតមាតិកា ដែលមានអត្ថប្រយោជន៍ជាមួយមុខងារសុវត្ថិភាព និងស្តង់ដាសហគមន៍របស់ក្រុមហ៊ុន Meta។ ទន្ទឹមនឹងនេះ អ្នកបង្កើតមាតិកា បានលើកឡើងថា ហ្វេសប៊ុក គឺជាឧបករណ៍ដ៏ល្អមួយសម្រាប់អ្នកប្រើប្រាស់ ប៉ុន្តែបើប្រើមិនបានត្រឹមត្រូវ តាមតួនាទី និងមុខងាររបស់វា ធ្វើឱ្យមានផលប៉ះពាល់ដល់ខ្លួន និងសង្គម
ក្រុមហ៊ុន Meta នៅថ្ងៃទី១៥ ខែមិថុនា បានបង្ហាញអំពីសកម្មភាពថ្មីៗ និងការសង្ខេបមុខងារស្តង់ដាសហគមន៍ «Community Standards» រួមទាំងឧបករណ៍ និងមុខងាររបស់ហ្វេសប៊ុក ដើម្បីរក្សាគណនីឱ្យមានសុវត្ថិភាព និងប្រយុទ្ធប្រឆាំងការគំរាមកំហែង និងការយាយីតាមអ៊ីនធឺណិត។
អ្នកស្រី ហង្ស សម្ផស្ស ប្រធានក្រុមបណ្តាញអ្នកសារព័ត៌មានស្ត្រីកម្ពុជា(CFJ) បានមានប្រសាសន៍ថា ការធ្វើសិក្ខាសាលារបស់ក្រុមហ៊ុន Meta ផ្ដល់អត្ថប្រយោជន៍ច្រើនដល់អ្នកប្រើប្រាស់បណ្ដាញសង្គម ដើម្បីឱ្យពួកគេមានការប្រុងប្រយ័ត្ន ក្នុងការផ្ទៀងផ្ទាត់ព័ត៌មានមុនពេលចែករំលែក។ Meta ក៏មានគោលនយោបាយថ្មី ដែលអាចរុញមាតិកាផ្សេងៗ ទាក់ទងគោលនយោបាយ និងការបោះឆ្នោតផងដែរ។
អ្នកស្រីបានបន្តថា បើក្រុមហ៊ុនហ្វេសប៊ុក មានវគ្គបណ្ដុះបណ្ដាលពីរបៀបប្រើប្រាស់គឺល្អ ព្រោះអ្នកប្រើប្រាស់មួយចំនួន ពួកគេមិនបានដឹងថាមួយណាប្រើមានផលប្រយោជន៍ ហើយមួយណាធ្វើឱ្យរងផលប៉ះពាក់ដល់សង្គម និងខ្លួនឯងនោះទេ។
អ្នកស្រី ហង្ស សម្ផស្ស បានបញ្ជាក់ថា៖«ហ្វេសប៊ុក គឺជាឧបករណ៍ដ៏ល្អមួយសម្រាប់អ្នកសារព័ត៌មានស្ត្រី ព្រោះវាសម្រាប់មនុស្សគ្រប់រូប។ ប៉ុន្តែក្នុងនាមជាអ្នកកាសែតស្ត្រី ខ្ញុំត្រូវតែដឹងអំពីតួនាទីរបស់ខ្ញុំនៅលើបណ្ដាញសង្គម និងអ្វីដែលអាចមើលឃើញនៅលើបណ្ដាញសង្គម។ ខ្ញុំណែនាំអ្នកសារព័ត៌មានស្ត្រីទាំងអស់ឱ្យយល់ដឹងអំពីបញ្ហាសុវត្ថិភាពដែលអាចរកបានតាមរយៈប្លេតហ្វមទាំងអស់របស់ Meta»។
អ្នកបង្កើតមាតិកា លោក ជី សុផាត តែងតែបណ្តុះបណ្តាលអ្នកសារព័ត៌មាន និងអង្គភាពនានាអំពីរបៀបប្រើប្រាស់ ហ្វេសប៊ុក សម្រាប់ផ្សារភ្ជាប់ទំនាក់ទំនងជាមួយមហាជន។ លោក សុផាត បាននិយាយថា៖ «ហ្វេសប៊ុក គឺជាឧបករណ៍ទំនាក់ទំនងដ៏មានឥទ្ធិពលបំផុត ដែលអាចឱ្យអ្នកប្រើប្រាស់ទាក់ទង និងរក្សាទំនាក់ទំនងជាមួយប្រិយមិត្ដរបស់ពួកគេ។ ទោះជាយ៉ាងណាក៏ដោយ អ្នកប្រើប្រាស់ប្លេតហ្វមនេះគួរតែដឹងពីមុខងារជាច្រើនដែល Meta ផ្តល់ឱ្យ ដើម្បីពួកគេទទួលជោគជ័យតាមគោលបំណង»។
លោក ហេង ភក្តី ប្រធានផ្នែកគោលនយោបាយសាធារណៈរបស់ក្រុមហ៊ុនMeta ប្រចាំប្រទេសកម្ពុជាមានប្រសាសន៍ថា Meta ប្រកាន់ភ្ជាប់វិធីសាស្ត្រដ៏ទូលំទូលាយ ក្នុងការធ្វើឱ្យ Flatform ក្លាយជាកន្លែងមានសុវត្ថិភាពជាងមុន សម្រាប់អ្នកប្រើប្រាស់ រួមទាំងការសរសេរគោលការណ៍ច្បាស់លាស់ ការចូលរួមជាមួយអ្នកជំនាញ និងការអភិវឌ្ឍបច្ចេកវិទ្យាទំនើប ដើម្បីជួយការពារការរំលោភបំពានមិនឱ្យកើតឡើង។
លោក ហេង ភក្តី ប្រធានផ្នែកគោលនយោបាយសាធារណៈរបស់ក្រុមហ៊ុនMeta ប្រចាំប្រទេសកម្ពុជា។ រូបភាព៖ ញឹក សំអូន
លោក ហេង ភក្ដី បានបញ្ជាក់ថា៖ «Meta ប្តេជ្ញាជួយអ្នកបង្កើតមាតិកា និងអង្គភាពផ្សេងៗ បង្កើតមាតិកា ដែលគួរឱ្យចាប់អារម្មណ៍។ ក្រុមហ៊ុនMeta ក៏ចង់ធានាដល់អ្នកប្រើប្រាស់ទាំងអស់របស់យើងថា សុវត្ថិភាព និងឯកជនភាពគឺជាអាទិភាពចម្បងមួយរបស់យើង»។
លោក ហេង ភក្ដី បានបន្ថែមថា Meta តែងតែពិនិត្យរាល់ពេលរព័ត៌មានណា ដែលផ្សព្វផ្សាយមិនគោរពតាមគោលការណ៍របស់ក្រុមហ៊ុន ដូចជា ការផុសរឿងអាសអាភាស ជេរប្រមាថ កាយវិការមិនសមរម្យ និងការផ្សព្វផ្សាយដែលមានជាប់ឈាមជាដើម គឺក្រុមហ៊ុន Meta នឹងពិចារណាលុបទំព័រ ឬគណនីបុគ្គលទាំងនោះ៕
Tag:
ការបង្កើតមាតិកា
Meta
© រក្សាសិទ្ធិដោយ thmeythmey.com
