រដ្ឋលេខាធិការក្រសួងអប់រំរូបនេះ បាននិយាយដូច្នេះថា៖«បណ្ដាគ្រឹះស្ថានឧត្តមសិក្សា និងមធ្យមសិក្សាបច្ចេកទេសទាំងអស់ ព្យាយាមបង្កើននូវកម្មវិធីអប់រំកាយ និងកីឡា ជាពិសេសគឺត្រូវយកចិត្តទុកដាក់ក្នុងការថែមកម្មវិធីកីឡា ក្រៅម៉ោងសិក្សាជូនដល់និស្សិត របស់យើង ដែលជាថ្នាល អនាគតនៃកីឡាករ-កីឡាការិនីប្រចាំប្រទេស។»។
 

ក្នុងពិធីបើកនេះដែរ លោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា នៃក្រសួងអប់រំ យុវជន និងកីឡា បានថ្លែងពីគោលបំណង នៃព្រឹត្តិការណ៍នេះ គឺដើម្បីការជួបជុំ ផ្លាស់ប្ដូរបទពិសោធន៍រវាងគ្រឹះស្ថានឧត្តមសិក្សា និងមធ្យមសិក្សាបច្ចេកទេស ក្នុងបរិបទនាំមកនូវវប្បធម៌ និងការអប់រំសកម្មភាពកីឡា។ ប្រធាននាយកដ្ឋានរូបនេះ បន្ថែមទៀតជាមួយនិងការជួបជុំយ៉ាងសប្បាយរីករាយក្នុងសកម្មភាពកីឡា ប៉ុន្ដែជាឱកាសសម្រាប់ពង្រឹងកាយសម្បទាមាំមួន។ 
 

ដោយឡែក លោក សេងទ្រី ណែនាំ ឲ្យកីឡាករ-កីឡាការិនី ប្រកួតប្រជែងឈរលើស្មារតីទទួលខុសត្រូវ ការគោរពវិន័យ និងគោរពបទបញ្ជាបច្ចេកទេស ការចេះយោគយល់គ្នា អធ្យាស្រ័យ ទើបអាចផ្សារភ្ជាប់នូវចំណងមិត្តភាព សាមគ្គីភាព និងភាតរភាព ដែលជាគម្រូដ៏ល្អមួយ ប្រសើរសម្រាប់ប្រទេសជាតិយើង និងជៀសផុតពីអំពើអសកម្មផ្សេងៗ ក្នុងសង្គម៕