កីឡាអន្តរជាតិ
អន្តរជាតិ
គ្រូវៀតណាមថ្មី៖ ASEAN Cup ជាឱកាសសងសឹក ឥណ្ឌូណេស៊ី 23, May 2024 , 8:39 am
លោក Kim Sang-sik គ្រូជម្រើសជាតិវៀតណាម ផ្តល់បទសម្ភាសដល់អ្នកសារព័ត៌មាន
× គ្រូបង្វឹកថ្មីក្រុមកីឡាបាល់ទាត់ជម្រើសជាតិវៀតណាម លោក Kim Sang-sik មានទំនុកចិត្តក្នុងការក្រុម សងសឹកឥណ្ឌូណេស៊ី ក្នុងការប្រកួត ASEAN Mitsubishi Electric Cup ឆ្នាំ២០២៤ ពូល B ទោះបីជាវៀតណាម រងបរាជ័យបន្តបន្ទាប់ អំឡុងការដឹកនាំរបស់គ្រូបង្វឹកមុន លក Philippe Troussier។
ឥណ្ឌូណេស៊ី ក្រោមការដឹកនាំរបស់គ្រូកូរ៉េខាងត្បូងលោក Shin Tae-yong ជាគូប្រជែងដ៏ខ្លាំងបំផុតរបស់វៀតណាមក្នុងពូល B នៃវគ្គសន្សំពិន្ទុជើងឯកថ្នាក់តំបន់អាស៊ីអាគ្នេយ៍ រួមជាមួយពីហ្វីលីពីន មីយ៉ាន់ម៉ា និងឡាវ បន្ទាប់ពីការចាប់ឆ្នោតរើសពូល នៅក្រុងហាណូយ កាលពីថ្ងៃទី២១ ខែឧសភា។
ក្នុងការជួបគ្នា៣លើកចុងក្រោយ វៀតណាមក្រោមការដឹកនាំរបស់ Troussier បានចាញ់ឥណ្ឌូណេស៊ី ទាំង ៣លើក ក្នុងនោះចាញ់ ៣-០ និង ១-០ ក្នុងវគ្គជម្រុះជុំទីពីរ FIFA World Cup ឆ្នាំ២០២៦ និង ១-០ ក្នុងវគ្គចែកពូល Asian Cup ឆ្នាំ ២០២៣។ ដោយឡែកក្នុងពានរង្វាន់ AFF Cup ពីមុន (ឥឡូវជា ASEAN Cup) វៀតណាម អំឡុងក្រោមការដឹកនាំរបស់គ្រូបង្វឹក Park Hang-seo មិនដែលចាញ់ឥណ្ឌូណេស៊ីឡើយ ដោយបញ្ចប់ត្រឹមស្មើ និងឈ្នះ។
ដោយឡែក សម្រាប់លោក Kim Sang-sik ដែលទើបចូលកាន់តំណែងគ្រូវៀតណាម បង្ហាញទំនុកចិត្តក្នុងការដឹកនាំក្រុមទទួលលទ្ធផលផ្លែផ្កានៅពេលជួប ឥណ្ឌូណេស៊ី នៅវគ្គសន្សំពិន្ទុ ASEAN Cup។
«ប្រសិនបើខ្ញុំត្រៀមខ្លួនឲ្យបានល្អចាប់ពីពេលនេះ ខ្ញុំគិតថា យើងពិតជាអាចធ្វើបានល្អទល់នឹងឥណ្ឌូណេស៊ី។ យើងនឹងកែកុនពីការប្រកួតមុនៗ ហើយព្យាយាមឱ្យអស់ពីសមត្ថភាពដើម្បីឈ្នះឥណ្ឌូណេស៊ី។ នេះជាការអះអាងរបស់គ្រូសញ្ជាតិកូរ៉េខាងត្បូង នៅក្រោយការចាប់ឆ្នោតរើសពូល ក្នុងក្រុងហាណូយ។
សហព័ន្ធកីឡាបាល់ទាត់វៀតណាម បានតែងតាំងលោក Kim ជំនួសលោក Troussier នៅដើមខែឧសភា។ លោក Kim ត្រូវទទួលបន្ទុកធ្វើយ៉ាងណានាំវៀតឆ្លងផុតវគ្គចែកពូល និងឈានដល់វគ្គផ្តាច់ព្រ័ត្រ ASEAN Cup ឆ្នាំ២០២៤។
ទទួលភារកិច្ចនេះ គ្រូកូរ៉េខាងត្បូង ប្តេជ្ញាព្យាយាមឱ្យអស់ពីសមត្ថភាពសម្រាប់ក្រុមបាល់ទាត់វៀតណាម និងអ្នកគាំទ្រ ដោយលោកនឹងសុំយោបល់ពីអតីតគ្រូបង្វឹកលោក Park ដើម្បីបង្កើតក្រុមឱ្យល្អបំផុតតាមដែលអាចធ្វើទៅបាន។
ព្រឹត្តិការណ៍ ASEAN Cup 2024 ដែលទើបប្តូរឈ្មោះពី AFF Cup នឹងប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី២១ ខែធ្នូ។ នេះជាលើកទី២ ហើយដែលការប្រកួតបានប្តូរឈ្មោះពីមុនពី Tiger Cup, Suzuki Cup ទៅ Mitsubishi Cup ដែលលើកដំបូងនៅឆ្នាំ២០២២ ហើយថៃជាជើងឯក៕
Tag:
ASEAN Mitsubishi Cup
© រក្សាសិទ្ធិដោយ thmeythmey.com