សម្រាប់ឆ្នាំ២០២៤ សាលាភូមិន្ទរដ្ឋបាលបានបើកវគ្គបណ្តុះបណ្តាលបន្តសម្រាប់​កម្ម​សិក្សាការី មន្ត្រីជាន់ខ្ពស់, មន្ត្រីគ្រប់គ្រងរដ្ឋបាល, មន្ត្រីមធ្យម, មន្ត្រីក្រមការ ដែលមាន​ចំនួនសរុប ៣៩៣អង្គ/នាក់ (នារី ៨២នាក់)។ ក្រៅពីនេះ ក៏មាន​ការ​បណ្តុះបណ្តាលតម្រង់ទិសមន្ត្រីក្របខណ្ឌថ្មី, រដ្ឋបាល​ថ្នាក់ក្រោមជាតិ, វគ្គខ្លី និង​វគ្គផ្សេងៗទៀតក្នុងក្របខណ្ឌជាមួយក្រសួង-ស្ថាប័នថ្នាក់ជាតិ គ្រឹះស្ថានបណ្តុះ​បណ្តាល​អន្តរជាតិ និងដៃគូអភិវឌ្ឍផងដែរ។

 

លោក ហ៊ុន ម៉ានី បាន​បញ្ជាក់ថា ក្នុងចំណោមការបណ្តុះបណ្តាលរយៈពេលខ្លី សាលាភូមិន្ទរដ្ឋបាលបានរៀបចំវគ្គ​បណ្តុះ​បណ្តាលពិសេសចំនួន៣ ក្នុងត្រីមាសទី១ ឆ្នាំ២០២៤ មានដូចជា វគ្គ​​បណ្តុះ​​បណ្តាលថ្នាក់ដឹកនាំ និងគ្រប់គ្រងនៃក្រសួង-ស្ថាប័ន (សម្រាប់តំណែងរដ្ឋលេខា​ធិការ អនុរដ្ឋលេខាធិការ អគ្គនាយក អគ្គនាយករង រហូតដល់ប្រធាន​នាយកដ្ឋាន ឬតំណែង​ប្រហាក់ប្រហែល), វគ្គបណ្តុះបណ្តាលមន្ត្រី​ខុទ្ទកាល័យ​របស់ក្រសួង-ស្ថាប័ន និង​វគ្គ​បណ្តុះបណ្តាលថ្នាក់ដឹកនាំ និងមន្ត្រីរាជការនៃមន្ទីរមុខងារសាធារណៈរាជធានី-ខេត្ត។

 

«វគ្គបណ្តុះបណ្តាលទាំងនេះ ត្រូវបានរៀបចំឡើងដើម្បីគាំទ្រដល់ការបំពេញតួនាទី និង​ភារកិច្ចរបស់ថ្នាក់ដឹកនាំ និងមន្ត្រីរាជការ ដែលទើបចូលកាន់មុខតំណែងនៅតាម​ក្រសួង ស្ថាប័ន និងការបំពេញការងារថ្មីៗ នៅដើមនីតិកាលទី៧ នៃរដ្ឋសភា»។ នេះជាការ​បញ្ជាក់របស់រដ្ឋមន្ត្រីក្រសួងមុខងារសាធារណៈ។
  

សាលាភូមិន្ទរដ្ឋបាលត្រូវបានបង្កើតឡើងជាលើកដំបូងក្នុងប្រវត្តិសាស្រ្តនាឆ្នាំ១៩៥៦ តាមព្រះរាជ​គំនិតផ្តួចផ្តើមរបស់សម្តេចព្រះវររាជបិតា ព្រះករុណាព្រះបាទ នរោត្តម សីហនុ ព្រះបរមរតនកោដ្ឋ។ តាម​ឯកសារ​ដែលផ្សាយនៅ​លើ​គេហទំព័រ​សាលាផ្ទាល់ ទោះបីសាលាភូមិន្ទរដ្ឋបាលត្រូវបានបង្កើតនៅឆ្នាំ១៩៥៦ ក៏ពិតមែន តែវាមិនមែនជាគ្រឹះស្ថានទីមួយនៃជំនាញរដ្ឋបាល នៅកម្ពុជានោះទេ ព្រោះថានៅទីក្រុងប៉ារីសនាឆ្នាំ ១៨៨៦ អាជ្ញាធរបារាំងបានបើកសាលាមួយ ឈ្មោះសាលាបេសកកម្មខ្មែរ ដែលមានយុវជនខ្មែរចំនួនប្រមាណជាង១០នាក់ ទៅសិក្សាពីរដ្ឋបាលតាមវិធីនិងគំនិតបែបបស្ចិមប្រទេស។ រយៈពេល៣ ឆ្នាំ ក្រោយមក សាលានេះបានប្រែក្លាយជាសាលាអាណានិគម។
 

ចំណែកនៅកម្ពុជាវិញ ដោយការរីកដុះដាលផ្នែករដ្ឋបាលតម្រូវឲ្យមានមន្រ្តីរដ្ឋបាលថ្នាក់មធ្យមច្រើន ទើបគេឃើញ មានការបង្កើតសាលាក្រមការ នៅឆ្នាំ១៩១៤ សម្រាប់បណ្តុះបណ្តាលមន្រ្តី។ សាលានេះបានប្រែឈ្មោះជា សាលារដ្ឋបាលតុលាការខ្មែរវិញនៅឆ្នាំ១៩១៧ សម្រាប់បណ្តុះបណ្តាលអ្នករាជការក្នុងក្រុមរដ្ឋបាលផង ក្នុងក្រុមតុលាការផង ប៉ុនែ្តត្រូវបានបិទទ្វារវិញ នៅឆ្នាំ១៩៤៨-១៩៤៩។ 

 

ក្រោយពីកម្ពុជាទទួលបានឯករាជ្យនៅឆ្នាំ១៩៥៣ វិបត្តិខាងវិស័យរដ្ឋបាលដ៏ធ្ងន់ធ្ងរមួយបានផ្ទុះឡើងដោយសារមូលហេតុសំខាន់ៗពីរ ដោយសារអតីតមន្រ្តីជនជាតិបារាំងត្រូវត្រឡប់ទៅប្រទេសបារាំងវិញ និងម្យ៉ាងទៀត ដើម្បីកាន់កាប់ការងារជាច្រើនសម្រាប់រដ្ឋឯករាជ្យថ្មី ភ្នាក់ងាររដ្ឋបាល និងមន្រ្តីរាជការជាច្រើនត្រូវបានជ្រើសរើសនិងតែងតាំងទៅតាមមុខតំណែងផ្សេងៗ។ ជាងនេះទៅទៀត ការជ្រើសរើសដាច់ពីគ្នាដោយក្រសួងថ្មីៗនីមួយៗ បានបង្កឲ្យរដ្ឋបាលខ្មែរមានការខណ្ឌដាច់ពីគ្នា និងនៅផ្តុំគ្នាជាដុំៗមិនមានការបែងចែក ហើយការបណ្តុះបណ្តាលមិនមានភាពរលូនដែលធ្វើឲ្យប៉ះពាល់ដល់អំណាចនិងការឯកភាពរបស់រដ្ឋទៀតផង។

 

ដើម្បីដោះស្រាយបញ្ហាប្រឈម ក្រោមព្រះរាជតម្រិះផ្តួចផ្តើមដ៏ខ្ពង់ខ្ពស់របស់សម្តេចព្រះនរោត្តមសីហនុ ព្រះបរមរតនកោដ្ឋ សាលាភូមិន្ទរដ្ឋបាលបានត្រូវបង្កើតដាច់ចេញពីវិទ្យាស្ថាន។ គំនិតផ្តួចផ្តើមនេះអាចសម្រេចទៅបានដោយសារការផ្តល់យោបល់របស់នាយកសាលាជាតិរដ្ឋបាលបារាំង និងការជួយជ្រោមជ្រែងជាប្រចាំពីអាជ្ញាធរខ្មែរ ព្រមទាំងការគាំទ្ររបស់បេសកកម្មជំនួយសេដ្ឋកិច្ច និងបច្ចេកទេសបារាំងប្រចាំនៅកម្ពុជា ពីមូលនិធិអាស៊ី និងផែនការកូឡុំបូ។
 

ចាប់តាំងពីការបង្កើតសាលាភូមិន្ទរដ្ឋបាល សាលាបានផ្លាស់ប្តូរឈ្មោះជាច្រើនលើកច្រើនសារ ដោយសារបញ្ហាសង្រ្គាមផ្ទៃក្នុង និងនយោបាយមិនច្បាស់លាស់ ហើយសាលាបានឆ្លងកាត់ដំណាក់កាលសំខាន់ៗដូចជា សាលាក្រមការ (ឆ្នាំ១៩១៤), សាលារដ្ឋបាល និងយុត្តិធម៌កម្ពុជា (ឆ្នាំ១៩១៧)។

 

ពីឆ្នាំ១៩៥៦ ដល់​ឆ្នាំ១៩៦៥ ព្រះបាទ នរោត្តម សុរាម្រិត បាន​សម្ពោធ​ក្រោម​ឈ្មោះជា​សាលាភូមិន្ទ​រដ្ឋបាល ប៉ុន្តែបានប្តូរឈ្មោះទៅជា​សាលាជាតិ​រដ្ឋបាលវិញ ក្រោម​របបសាធារណរដ្ឋខ្មែរពីឆ្នាំ១៩៧២ ដល់ឆ្នាំ១៩៧៥។ ក្រោយ​របប​ខ្មែរក្រហម សាលាមានឈ្មោះថា សាលាកម្មាភិបាលរដ្ឋបាល និងនីតិសាស្ត្រ នៃសម័យ​សាធារណរដ្ឋប្រជាមានិតកម្ពុជា ពីឆ្នាំ​១៩៨២ ដល់​ឆ្នាំ​១៩៨៥។

 

ពី​ឆ្នាំ​១៩៩៣ ដល់​ឆ្នាំ​១៩៩៤ សាលាជាតិ​រដ្ឋបាល បាន​ក្លាយជាសាលាភូមិ​ន្ទរដ្ឋបាលវិញ ។ ពីឆ្នាំ១៩៩៥ ដល់​ឆ្នាំ២០១៣ សាលានេះ ស្ថិតក្រោម​ទីស្តីការគណៈរដ្ឋមន្ត្រី ហើយ​ចាប់តាំងពីឆ្នាំ២០១៣មក សាលាត្រូវដាក់ឱ្យស្ថិតក្រោមឱវាទក្រសួងមុខងារសាធារណៈ វិញ៕