ក្រៅពីជជែកពីការឈ្លានពានរបស់រុស្ស៊ីលើអ៊ុយក្រែន ក្រុមប្រទេសអ្នកមានទាំង៧ (G7) បានលើកប្រធានបទចិនពាក់ព័ន្ធនឹងពាណិជ្ជកម្ម ការអុងអាត់នៅច្រកសមុទ្រតៃវ៉ាន់ និងសមុទ្រចិនខាងកើត និងខាងត្បូង។

 

«យើងបញ្ជាក់ជាថ្មីលើការជំទាស់ចំពោះការប៉ុនប៉ងផ្លាស់ប្តូរស្ថានភាពបច្ចុប្បន្នដោយកម្លាំង ឬការគំរាម»។ សេចក្តីថ្លែងការណ៍រួមក្រុមប្រទេស G7 បានបញ្ជាក់បែបនេះ ដោយបន្តបង្ហាញពីក្តីបារម្ភលើបញ្ហាជម្លោះនៅក្នុងសមុទ្រចិនខាងត្បូង និងខាងកើត។ បើតាមក្រុមប្រទេស G7 សកម្មភាពនាវាល្បាតចិននៅសមុទ្រចិនខាងត្បូង គឺគ្រោះថ្នាក់។ 

 

ទោះចិនចាត់ទុកសមុទ្រចិនខាងត្បូងជិត ៩០ភាគរយជាកម្មសិទ្ធិរបស់ខ្លួនដោយផ្អែកលើប្រវត្តិសាស្រ្ត និងច្បាប់អន្តរជាតិ ក្រុមប្រទេសអ្នកមានទាំង ៧ យល់ថា រដ្ឋាភិបាលក្រុងប៉េកាំង គ្មានមូលដ្ឋានច្បាប់ត្រឹមត្រូវ ក្នុងការពង្រីកដែនទឹកនៅក្នុងសមុទ្រចិនខាងត្បូង ដែលជាជម្លោះដ៏ក្តៅមួយនៅក្នុងពេលបច្ចុប្បន្ន ក្នុងតំបន់ឥណ្ឌូប៉ាស៊ីហ្វិក។ 

 

មិនតែប៉ុណ្ណោះ ក្រុមប្រទេសមានសេដ្ឋកិច្ចរីកចម្រើនទាំង៧ បានបង្ហាញក្តីបារម្ភចិនអាចផ្តល់អាវុធឱ្យរុស្ស៊ី ក្នុងការបន្តសង្រ្គាមនៅអ៊ុយក្រែនផងដែរ។ លើសពីនេះ ក្រុមប្រទេស G7 បានជំរុញឱ្យរដ្ឋាភិបាលក្រុងប៉េកាំង ដាក់សម្ពាធលើក្រុងមូស្គូ បញ្ចប់សង្រ្គាម។ ចិន និងរុស្ស៊ី ជាដៃគូពាណិជ្ជកម្មដ៏សំខាន់មួយ ចាប់តាំងពីសង្រ្គាមផ្ទុះឡើងនៅក្នុងឆ្នាំ២០២២។ ចិននាំចូលប្រេងឆៅ និងក្នុងតម្លៃទាបជាច្រើន ពីរុស្ស៊ី និងពាណិជ្ជកម្មផ្សេងទៀត៕