យោងតាមការចេញផ្សាយរបស់ស្នងការដ្ឋាននគរបាលជាតិខេត្តព្រះសីហនុ សមត្ថកិច្ចបានប្រតិបត្តិការចុះបង្ក្រាបទីតាំងមួយកន្លែងក្នុង ភូមិ១ សង្កាត់លេខ៣ ក្រុងព្រះសីហនុ កាលពីថ្ងៃទី១៥ មិថុនា ដោយឃាត់បានជនសង្ស័យចំនួន១នាក់ ជាជនជាតិចិន។ ទីតាំងទីមួយនេះ សមត្ថកិច្ចដកហូតវត្ថុតាងបានម្សៅក្រាមពណ៌ស ដែលសង្ស័យជាសារធាតុញៀនចំនួន១០ដុំ

រួមទាំងរថយន្ដ ROLL-ROY ពណ៌ខ្មៅ មួយគ្រឿង។ 

 

តាមរយៈជនសង្ស័យខាងលើ សមត្ថកិច្ចបន្តស៊ើបអង្កេត ហើយឆែកឆេរទីតាំងមួយកន្លែងទៀត ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ។ ហើយឃាត់ខ្លួនជនសង្ស័យ៤នាក់ទៀត ក្នុងនោះមានជនជាតិចិន៣នាក់ និងម្នាក់ទៀតជាស្ត្រីខ្មែរ។ ករណីនេះ សមត្ថកិច្ច រកឃើញនិងដកហូតបានម្សៅក្រាមពណ៌សថ្លា ដែលសង្ស័យជាសារធាតុញៀនមួយចំនួនធំ ,សារធាតុគីមី និងរថយន្ដចំនួន៣គ្រឿង ។ 

 

សមត្ថកិច្ចក៏បានបន្តស្រាវជ្រាវ និងឆែកឆេរវីឡាមួយកន្លែងទៀត ក្នុងភូមិ៣ សង្កាត់លរខ៣ ក្រុងព្រះសីហនុ។ ទីតាំងទីបីនេះ សមត្ថកិច្ចបានឃាត់ខ្លួនបក្ខពួករបស់ពួកគេ បាន៤នាក់ទៀត  ក្នុងនោះមានចិន៣នាក់ និងស្ត្រីវៀតណាម១នាក់។ ទីតាំងនេះ សមត្ថកិច្ច បានដកហូតវត្ថុតាងបានមួយចំនួន រួមមាន រថយន្ត TUNDRA មួយគ្រឿង និងប្រាក់ចំនួន១៦០០០ដុល្លារ រួមទាំងកាំភ្លើងខ្លី២ដើម។ 

 

ការបង្ក្រាបទាំងបីទីតាំងនេះ សមត្ថកិច្ចបានរកឃើញគ្រឿងញៀនជាង៦០គីឡូក្រាម។ បច្ចុប្បន្នវត្ថុតាង និងជនសង្ស័យខាងលើ ត្រូវបានកម្លាំងសមត្ថកិច្ច បញ្ជូនមករាជធានីភ្នំពេញ ដើម្បីបន្ដនីតិវិធីតាមផ្លូវច្បាប់។ នេះបើតាម មន្ទីរប្រឆាំងគ្រឿងញៀន៕