កីឡាអន្តរជាតិ
អន្តរជាតិ
AFF Suzuki Cup 2014៖ ចាញ់ម៉ាឡេស៊ី គ្រូវៀតណាមថា កូនក្រុមលេងខ្លាចគេ 12, Dec 2014 , 9:15 am
× លោក Toshiya Miura គ្រូបង្វឹកក្រុមបាល់ទាត់ជម្រើសជាតិវៀតណាម បានចាត់ទុកបរាជ័យយ៉ាងអាម៉ាស់ក្នុងទឹកដី My Dinh National Stadium ក្បែក្រុងហាណូយ របស់ខ្លួនកាលពីយប់មិញថាមកពីកូនក្រុមប្រកួតទាំងអារម្មណ៍ភ័យខ្លាច ខណៈអ្នកគាំទ្រគ្រប់គ្នាគិតថាក្រុមម្ចាស់ផ្ទះនៅជើងទី២ នេះមានភាគរយច្រើនដើម្បីដណ្ដើមតំណែងឡើងទៅវគ្គផ្ដាច់ព្រ័ត្រ ពានរង្វាន់ AFF Suzuki Cup 2014។
បុរសជនជាតិជប៉ុនខាងលើបានប្រាប់វេបសាយផ្លូវការ affsuzukicup ថា៖ «នៅតង់ទី១ ពួកគេបានសម្រុករហូតយើងតដៃលែងរួច ក៏ព្រោះតែកីឡាករទាំងអស់គិតថាពួកគេស័ក្ខិសមនឹងឡើងទៅវគ្គផ្ដាច់ព្រ័ត្រ រួចរាល់ហើយ»។
ប្រធានក្រុមជម្រើសជាតិម៉ាឡេស៊ី Rahim បានរកគ្រាប់នាំមុខបាននៅនាទីទី៤ ដោយបាល់ពិន័យ ១១ ម៉ែត្រ ហើយមិត្តរូមជាតិ Talaha បានរកគ្រាប់ទី២ បន្តក្ដីសង្ឃឹមកាន់តែខ្លាំងនៅនាទី ១៦ ខណៈ Lê Công Vinh របស់វៀតណាម ទាត់បាល់ពិន័យ ១១ ម៉ែត្របំបែកពងមាន់ឱ្យក្រុមនៅនាទី២២។ នៅមិនអស់ចិត្តម៉ាឡេស៊ី វាយសម្រុករហូតធ្វើឱ្យខ្សែការពាររៀតណាម Đinh Tiến Thành ភ្លាត់ស្នៀតធ្វើឱ្យបាល់ចូលទីខ្លួនឯងនៅនាទី ២៩ និង Adam រកគ្រាប់បាល់ទី ៤ ឱ្យក្រុមនៅនាទី ៤៣ មុនបញ្ចប់តង់ទី១។ Lê Công Vinh រកគ្រាប់បាល់ទី២ ឱ្យវៀតណាម នៅនាទី ៧៨ ស្របពេលការប្រកួតបញ្ចប់ទៅនៅជើងទីលទ្ធផល ៤ ទល់ ២ ហើយលទ្ធផលទាំង២ជើង ៤ ទល់ ៥។
ចំណែកលោក Dollah Salleh គ្រូបង្វឹកក្រុមម៉ាឡេស៊ី ថ្លែងទាំងសប្បាយចិត្តថា៖ «ខ្ញុំមិនដឹងនិយាយថាម៉េចទេ។ យើងមានឱកាស ៤ លើកហើយទាត់បញ្ជូលទីបានទាំង ៤គ្រាប់។ វៀតណាមព្យាយាមវាយបកនៅតង់ទី២ តែយើងការពារបានល្អ។ នេះគឺជាបាល់ទាត់ យើងប្រព្រឹត្តិកំហុសកាលពីជើងទី១ តែលើកនេះយើងធ្វើល្អ។ ខ្ញុំរីករាយដែលរៀតណាមបង្ករកំហុសទើបយើងទទួលជ័យជម្នះបែបនេះ»។
ក្រុមម៉ាឡេស៊ី ត្រូវឡើងទៅជួបក្រុមថៃ នៅវគ្គផ្ដាច់ព្រ័ត្រ ដែលប្រើរូបមន្តប្រកួត ២ ជើង ដោយប្រកួតដំបូងធ្វើឡើងនៅកីឡដ្ឋាន Rajamangala National Stadium ក្នុងក្រុងបាងកក នៅថ្ងៃទី ១៧ ធ្នូ មុនចេញទៅប្រកួតជើងទី២ នៅកូឡាំពួរនៅថ្ងៃទី ២០ ធ្នូ ដែលជាប្រកួតកាត់សេចក្ដីចុងក្រោយ៕
© រក្សាសិទ្ធិដោយ thmeythmey.com