៥សំណួរជុំវិញស្ត្រីខ្មែរឥស្លាមនិងការប្តូរផ្នត់គំនិតរបស់ឪពុកម្តាយ

ជាតិ

សង្គមជាតិ

៥សំណួរជុំវិញស្ត្រីខ្មែរឥស្លាមនិងការប្តូរផ្នត់គំនិតរបស់ឪពុកម្តាយ

16, Apr 2015 , 8:00 am

រូបភាព

លោកស្រី ម៉ាត់ ម៉ារ៉ា រដ្ឋលេខាធិការក្រសួងអភិវឌ្ឍន៍ជនបទ

ដោយ: អុីសា រ៉ហានី (Isa Rohany)

ភ្នំពេញ៖ កាលពីសម័យដើម ស្ត្រីខ្មែរឥស្លាមមិនខុសពីស្ត្រីខ្មែរនោះទេ។ សង្គមមិនឲ្យតម្លៃ ក្នុងនោះទាំងការសិក្សា និងការងារផ្សេង។ បច្ចុប្បន្ន ស្ត្រីឥស្លាមមានការផ្លាស់ប្តូរ។ ស្ត្រីខ្មែរឥស្លាមរាប់រយនាក់ បានសិក្សានៅថ្នាក់បរិញ្ញាបត្រ អនុបណ្ឌិត និងបណ្ឌិត ទាំងនៅក្នុងនិងក្រៅប្រទេស។ តើមានកត្តាអ្វីខ្លះ ដែលរួមចំណែកអភិវឌ្ឍសហគមន៍ខ្មែរឥស្លាម ពិសេសស្ត្រីខ្មែរឥស្លាម? ខាងក្រោមនេះជាបទសម្ភាសន៍រវាងអ្នកសារព័ត៌មានថ្មីៗ និងលោកស្រី ម៉ាត់ ម៉ារ៉ា។ លោកស្រី ម៉ាត់ ម៉ារ៉ា គឺជាស្ត្រីខ្មែរឥស្លាមមួយរូប ដែលមានតួនាទីជារដ្ឋលេខាធិការនៅក្រសួងអភិវឌ្ឍជនបទ។ លោកស្រី បាននិងកំពុងធ្វើការងារជាច្រើន ក្នុងការជួយសហគមន៍ខ្មែរឥស្លាម នាពេលកន្លងមក។

ចុចទីនេះដើម្បីទទួលបានព័ត៌មានរហ័ស

អ៊ីសា រ៉ហានី៖ បច្ចុប្បន្នលោកស្រី មើលឃើញពីការផ្លាស់ប្តូរអ្វីខ្លះសម្រាប់ស្ត្រីខ្មែរឥស្លាម?

ម៉ាត់ ម៉ារ៉ា៖ សព្វថ្ងៃ ខណៈដែលប្រទេសជាតិរីកចម្រើន ទន្ទឹមនឹងនោះ អ្វីៗក៏ផ្លាស់ប្តូរទៅតាមហ្នឹងដែរ។ យើងមានស្ត្រីខ្មែរឥស្លាមនៅជួររដ្ឋាភិបាល មានថ្នាក់រដ្ឋលេខាធិការ (២រូប) អនុរដ្ឋលេខាធិការ (១រូប)។ ក្រៅពីនោះ នៅថ្នាក់ក្រោមជាតិ យើងមានក្រុមប្រឹក្សាឃុំ មេឃុំជាដើម។ ក្នុងនោះ ស្ត្រីខ្មែរឥស្លាមជាច្រើន បានបន្តការសិក្សានៅភ្នំពេញ (ថ្នាក់បរិញ្ញាបត្រ) មួយចំនួនបានអាហារូបករណ៍ទៅក្រៅប្រទេស។ ពួកគេបានចេញធ្វើការនៅតាមគ្រប់ស្ថាប័ន មានក្រុមហ៊ុន ធនាគារ អង្គការ សមាគម ខ្លះជាគ្រូបង្រៀនជាដើម។

អ៊ីសា រ៉ហានី៖ សម័យពីដើម តើផ្នត់គំនិតឪពុកម្តាយចំពោះកូនស្រី យ៉ាងណាដែរ?
ម៉ាត់ ម៉ារ៉ា៖ យើងមិនខុសពីសង្គមខ្មែរទេ។ កូនស្រី មិនអនុញ្ញាតឲ្យរៀនសូត្របានច្រើន ព្រោះឪពុកម្តាយសម័យដើម មានផ្នត់គំនិតថា «ខ្លាចកូនស្រីរៀនច្រើន ចេះសរសេរសំបុត្រស្នេហា»។ នេះជាការគិតខុសរបស់ឪពុកម្តាយ និងមនុស្សចាស់សម័យនោះ ទើបធ្វើឲ្យស្ត្រីមួយចំនួនធំ មិនអាចធ្វើអ្វីជាដុំកំភួនបាន ក្រៅពីនៅមើលថែផ្ទះសម្បែង។

អ៊ីសា រ៉ហានី៖ មានមូលហេតុ និងកតា្តសំខាន់អ្វីខ្លះ ដែលជំរុញឲ្យមានការផ្លាស់ប្តូរ ផ្នត់គំនិតការគិតចំពោះស្ត្រីខ្មែរឥស្លាម?

ម៉ាត់ ម៉ារ៉ា៖ កន្លងមក បញ្ហាយេនឌ័រ យើងក៏បានបញ្ជ្រាបច្រើននៅក្នុងសហគមន៍ឥស្លាមដែរ។ នៅក្នុងសាសនា ក៏បាននិយាយ គឺស្ត្រីមានសិទ្ធិស្មើហ្នឹងបុរស។ យើងបានផ្លាស់ប្តូរការគិតរបស់គាត់ ដែលថា «ឲ្យកូនរៀនខ្មែរ ក្លាយជាខ្មែរ រៀនច្រើនចេះសរសេរសំបុត្រស្នេហា»។ យើងមានក្រុមការងារដែលចុះទៅមូលដ្ឋាន និងយកភស្តុតាងនានា បង្ហាញប្រាប់គាត់ ថាការរៀនសូត្រពិតជាមានសារសំខាន់កម្រិតណា ទាំងក្មេងប្រុស ទាំងក្មេងស្រី។ មួយទៀត សហគមន៍ឥស្លាមមានឳកាសច្រើន ព្រោះថាបច្ចុប្បន្ន យើងមានសមាគម និងអង្គការឥស្លាមជាង៨០ ស្ថាប័ន។ តាមការសិក្សារបស់ខ្ញុំ សមាគម និងអង្គការទាំងនោះ គឺផ្តោតសំខាន់លើវិស័យអប់រំ។ មានទាំងការជួយនិស្សិតរៀននៅសាកលវិទ្យាល័យ បើកសាលារៀននៅតាមមូលដ្ឋាន ឲ្យប្រាក់ខែគ្រូបង្រៀនឥស្លាម។ល។ ទាំងអស់នេះ គឺដោយសាររដ្ឋាភិបាល បានបើកឳកាសឲ្យមានការសប្បុរជនពីខាងក្រៅមកកម្ពុជាជាច្រើន ដូចជាមកពីអារ៉ាប់ ម៉ាឡេស៊ី ឥណ្ឌូនេស៊ី អាមេរិកជាដើម។

អ៊ីសា រ៉ហានី៖ បច្ចុប្បន្នឃើញថា ស្ត្រីខ្មែរឥស្លាមគឺត្រូវបានសង្គមបើកទូលាយ ដោយមិនរើសអើងដូចពីមុនទេ តើលោកស្រីមើលឃើញការងារ និងភាពជោគជ័យអ្វីខ្លះ ដែលពួកគាត់ទទួលបាន?

ម៉ាត់ ម៉ារ៉ា៖ បច្ចុប្បន្នឃើញថា អាត្រាស្ត្រីខ្មែរឥស្លាមបានទទួលបានការអប់រំមានការកើនឡើង។ មួយចំនួន រៀនរហូតដល់ថ្នាក់បណ្ឌិត មានដូចជា ហ្វារីណា នៅមជ្ឈមណ្ឌលឯកសារកម្ពុជា មួយទៀតមកពីបារាំង។ យើងនិយាយពីអប់រំមានដល់ប៉ុណ្ណឹង។ យើងមានស្ត្រីជាវេជ្ជបណ្ឌិត ឫដង់ទ័រ មានច្រើន មានទាំងក្នុងប្រទេស ខ្លះមកពីឥណ្ឌូនេស៊ី ហើយសុទ្ធតែមានវ័យក្មេងៗ ។ ដើមឡើយនៅសម័យ លន់ ណុល តាមដែលខ្ញុំក្តាប់បាន គឺយើងមានស្ត្រីខ្មែរឥស្លាមតែម្នាក់ទេ ដែលទៅរៀនដង់ទ័រនៅបារាំង គាត់ឈ្មោះ ទាំង រ៉ហ៊ីម៉ះ។ ខ្ញុំក៏កត់សម្គាល់ឃើញថា ស្ត្រីខ្មែរឥស្លាមជាច្រើន បានអភិវឌ្ឍន៍ខ្លួនឯងជាពាណិជ្ជករ ធ្វើជំនួញពីបរទេស មានទៅប្រទេសម៉ាឡេស៊ីជាដើម។ សរុបមកវិញ បច្ចុប្បន្នយើងមានស្ត្រីខ្មែរឥស្លាមនៅក្នុងវិស័យនយោបាយ ទាំងថ្នាក់ជាតិ និងថ្នាក់ក្រោមជាតិ។ យើងមានស្ត្រីខ្មែរឥស្លាម មានចំណេះដឹងខ្ពស់ មួយចំនួនក្លាយជាពាណិជ្ជកម្ម និងមួយចំនួនប្រឡូកក្នុងវិស័យសារព័ត៌មាន។ ក្នុងនោះ ខ្ញុំក៏មានមោទនភាព ដែលមានស្ត្រីឥស្លាមជាច្រើន កំពុងធ្វើការក្នុងNGO ឫអង្គការ។

អ៊ីសា រ៉ហានី៖ ក្រៅពីភាពរីកចម្រើន តើស្ត្រីខ្មែរឥស្លាម នៅមានចំណុចខ្វះខាតអ្វីខ្លះទៀត ដូចជាមួយចំនួន តាមអ្វីដែលខ្ញុំកត់សម្គាល់ឃើញថា ពួកគាត់នៅតែមានភាពអៀនខ្មាស់ច្រើន មិនក្លាហាន ក្នុងការធ្វើការងារផ្សេងៗ ដូចយុវជនខ្មែរ?

ម៉ាត់ ម៉ារ៉ា៖ ត្រង់ហ្នឹងហើយ ទើបថ្មីៗនេះ ខ្ញុំបានបង្កើតក្រុមការងារស្ត្រីមួយ ដែលជាក្រុមស្ម័គ្រចិត្ត។ យើងក៏អនុញ្ញាតឲ្យអ្នកដែលមិនមែនជាឥស្លាមបានចូលរួមដែរ។ យើងបានជជែកជាមួយស្ត្រីដែលបានជោគជ័យក្នុងការងារ តើគួររកគន្លឹះបែបណា ដើម្បីជួយអភិវឌ្ឍសហគមន៍របស់យើង។ យើងលើកទឹកចិត្តស្ត្រី ឪពុកម្តាយ ទាំងថ្នាក់ដឹកនាំតាមសហគមន៍ ឲ្យលោកយល់ ដើម្បីជួយជម្រុញកូនរបស់ពួកគាត់ ឲ្យស៊ីជម្រៅក្នុងវិស័យអប់រំ។ តាមដែលអ្នកស្ម័គ្រចិត្តចែករំលែក ឃើញថា ការងារស្ម័គ្រចិត្ត គឺជាកត្តាជម្រុញឲ្យពួកគេមកដល់គោលដៅជោគជ័យរហូតមកដល់ថ្ងៃនេះ។ ការទំនាក់ទំនង គឺជាកត្តាសំខាន់ណាស់។ ប្រសិនបើយើងមានចំណេះដឹងខ្ពង់ខ្ពស់ យើងមានជំនាញ ប៉ុន្តែបើយើងខ្វះទំនាក់ទំនង អាហ្នឹងយើងពិបាកហើយ។ មាននិស្សិតជាច្រើន ពេលគាត់កំពុងរៀន គាត់ឆ្លៀតទៅស្ម័គ្រចិត្តរៀបចំសិក្ខាសាលាផ្សេងៗ ដើម្បីដឹងពីបែបបទនៃសិក្ខាសាលានោះ ឫការងារស្ម័គ្រចិត្តនៅតាមអង្គការជាដើម វាមិនឥតប្រយោជន៍ទេ។ យើងត្រូវចេះពង្រីកទំនាក់ទំនងរបស់យើង។ ខ្ញុំទទួលស្គាល់ថា មាននិស្សិតឥស្លាម និងស្ត្រីខ្មែរឥស្លាមមួយចំនួន គាត់មិនទទួលបានការងារធ្វើនៅពេលរៀនចប់ ព្រោះដោយសារការមិនពង្រីកទំនាក់ទំនងនេះឯង៕