ជាតិ
សង្គមជាតិ
ក្រុងសៀមរាបកំពុងរៀបចំកែលម្អផ្លូវមួយចំនួនដើម្បីអភិវឌ្ឍទីក្រុងស្អាត 12, Mar 2015 , 2:55 pm
![](https://image.thmeythmey.com/pictures/2015/03/12/thumb2/img_0016.jpg)
×![]()
សៀមរាប៖ យ៉ាងហោចណាស់ មានផ្លូវចាក់កៅស៊ូ និងផ្លូវចាក់បេតុងចំនួនជាង១០ខ្សែ កំពុងដំណើរការជួសជុល និងពង្រីក នៅទីក្រុងសៀមរាប ក្រោយពេលផ្លូវទាំងនោះ រងការខូចខាត និងខ្លះទៀតមានសភាពតូចចង្អៀត មិនអាចធ្វើចរាចរណ៍បាន។
អភិបាលក្រុងសៀមរាប បានឲ្យដឹងថា បច្ចុប្បន្ននេះមានផ្លូវចំនួន១១ខ្សែ ដែលអាជ្ញាធរកំពុងដាក់លូ និងពង្រីក ក្នុងក្រុងសៀមរាប។ លោក ស៊ូ ប្លាតុង បានបន្ថែមថា ផ្លូវទាំងនោះ រួមមាន ផ្លូវម្តុំវត្តបូព៌ ផ្លូវ៧មករា ផ្លូវវិមានមង្គល ផ្លូវជាតិលេខ៦ ចាប់ពីស្ពាននាគ រហូតដល់សណ្ឋាគារ ស្មាយលីង ឫផ្លូវកែងផ្លូវ៦០ ។ ក្រៅពីនោះ មានផ្លូវលោកតាងើយ ផ្លូវលោកតា ខៀវ ណឺយ និងការរៀបចំសួនច្បារថ្មីជាដើម។ល។
លោក ស៊ូ ប្លាតុង បន្តថា៖« ក្រោយពីបើកការដ្ឋាននៅដើមឆ្នាំ២០១៤ គម្រោងខ្លះ យើងគ្រោងនឹងបញ្ចប់មុនចូលឆ្នាំខ្មែរ ហើយខ្លះទៀត ក៏មិនទាន់រួចរាល់ដែរ។ ផ្លូវទាំងខាងលើ មានសភាពខូចខាតច្រើន ហើយខ្លះទៀត បានលិចផង នៅពេលភ្លៀងធ្លាក់ម្តង»។
បើតាមការបញ្ជាក់ពីអភិបាលក្រុងសៀមរាប គម្រោងកែលម្អផ្លូវខាងលើ គឺជាថវិការបស់សាលាខេត្តសៀមរាប និងមួយចំនួនទៀតជាគម្រោងរបស់មន្ទីរសាធារណៈការ និងដឹកជញ្ជូន។ ប៉ុន្តែលោក ស៊ូ ប្លាតុង មិនបានបញ្ជាក់ពីចំនួនថវិកាពិតប្រាកដប៉ុន្មាននោះទេ។
គួររម្លឹកថា ទីក្រុងសៀមរាប បានទទួលចំណាត់ថ្នាក់ទីក្រុងស្អាតផ្ការំដួល៣ទង ពីគណៈកម្មាធិការជាតិវាយតម្លៃទីក្រុងស្អាត។ ទោះយ៉ាងណាក៏ដោយ ទីក្រុងមួយនេះ នៅតែសភាពចង្អៀត ដោយសារប្រព័ន្ធផ្លូវថ្នល់នៅតូចចង្អៀតនៅឡើយ។ ក្រៅពីនោះ បញ្ហាអនាម័យ កាកសំណល់មួយចំនួន នៅតែជាបញ្ហា ដែលតម្រូវឲ្យថ្នាក់ដឹកនាំខេត្ត គួរយកចិត្តទុកដាក់ខ្ពស់ ដើម្បីឲ្យស័ក្កសមនឹងទីក្រុងទេសចរណ៍លេខមួយ របស់ប្រទេសកម្ពុជា៕
© រក្សាសិទ្ធិដោយ thmeythmey.com