ជាតិ
ពលរដ្ឋមកពីកោះកុងស្នើឲ្យរដ្ឋសភាអន្តរាគមន៍ការបូមខ្សាច់អនាធិបតេយ្យ 23, Apr 2015 , 10:19 am
×
ប្រជាពលរដ្ឋមកពីភូមិកោះស្រឡៅ ឃុំកាពិ ស្រុកកោះកុង ខេត្តកោះកុង បាននាំគ្នាតវ៉ានៅមុខរដ្ឋសភា នៅព្រឹកថ្ងៃទី២៣ មេសានេះ ដើម្បីយកញត្តិមកដាក់សុំអន្តរាគមន៍ពីគណកម្មការទី៣នៃរដ្ឋសភា ដោះស្រាយបញ្ហាបូមខ្សាច់យ៉ាងអនាធិបតេយ្យនៅតំបន់ពួកគេរស់នៅ។ដោយឡែក ប្រជាពលរដ្ឋនៅរាជធានីភ្នំពេញក៏មកដាក់ញត្តិនៅរដ្ឋសភា ដើម្បីស្នើសុំអន្តរាគមន៍ដោះស្រាយបញ្ហាទំនាស់ដីធ្លីរបស់ពួកគេដែរ។
ប្រជាពលរដ្ឋបានបញ្ជាក់ថា បច្ចុប្បន្ននេះមានសាឡង់សម្រាប់បូមខ្សាច់ពីព្រែកចំនួន៨គ្រឿង និងសាឡង់សម្រាប់ដឹកជញ្ជូនចំនួន១០គ្រឿងរបស់ក្រុមហ៊ុន អ៊ីនធើណាសសិនណលរ៉េនបូ ដែលបានធ្វើការបូមខ្សាច់យ៉ាងអនាធិបតេយ្យជារៀងរាល់ថ្ងៃ នាំចេញទៅកាន់ប្រទេសសឹង្ហបុរី។ ចំពោះសកម្មភាពបូមខ្សាច់នេះ បានបណ្ដាលឲ្យមានផលប៉ះពាល់ដល់ជីវចម្រុះ និងជីវភាពរស់នៅរបស់ប្រជាពលរដ្ឋ ដូចជា ការបំផ្លិចបំផ្លាញព្រៃកោងកាងតាមមាត់ព្រែក និងជីវចម្រុះក្នុងទឹក។
បំផ្លាញដល់មច្ឆាជាតិ ប្រភពស្បៀង និងឧបករណ៍នេសាទរបស់ប្រជាពលរដ្ឋ៣០០គ្រួសារ។ ធ្វើឲ្យបំពុលទឹក បាក់ឆ្នេរ និងបាត់កោះតូចៗ ជាពិសេសការបូមខ្សាច់នេះ មិនបានសិក្សាពីផលប៉ះពាល់ជាមុនឲ្យបានច្បាស់លាស់ឡើយ។
ដោយសារតែបញ្ហានេះទើប ប្រជាពលរដ្ឋមកសុំអន្តរាគមន៍ពីរដ្ឋសភា ដើម្បីកោះហៅមន្ត្រីពាក់ព័ន្ធ និងក្រុមហ៊ុនសាកសួរពីបញ្ហានេះ និងបញ្ឈប់សកម្មភាពបូមខ្សាច់នេះ៕
© រក្សាសិទ្ធិដោយ thmeythmey.com