ជាតិ
កម្ពុជា ស្នើភាគីចិន បង្កើនកូតានាំអង្ករចូលទៅកាន់ប្រទេសចិន
23, Apr 2015 , 5:30 pm
×![]()
ដោយ: ថ្មីៗ
លោកនាយករដ្ឋមន្ត្រី ហ៊ុន សែន ស្នើឲ្យប្រធានាធិបតីចិន លោក ស៊ី ជិនពីង បន្តជួយដល់កម្ពុជា លើវិស័យយោធា ពិសេសលើការហ្វឹកហ្វឺនរួមគ្នាក្នុងការគ្រប់គ្រងគ្រោះមហន្តរាយ និងប្រតិបត្តិការជួយសង្រោះ្គ ។ទន្ទឹមនឹងនេះប្រមុខរដ្ឋាភិបាលកម្ពុជា ក៏ស្នើឲ្យភាគីចិន បង្កើនកូតានាំអង្ករចូលទៅកាន់ប្រទេសចិន និងការបង្កើនកិច្ចសហប្រតិបត្តិការពង្រីកការតភ្ជាប់បណ្ដាញធារាសាស្ត្រ អគ្គិសនី និងប្រព័ន្ធផ្លូវនៅកម្ពុជា។ ការស្នើនេះធ្វើឡើងនៅក្នុងជំនួបទ្វេរភាគីរវាងលោកនាយករដ្ឋមន្ត្រី ហ៊ុន សែន និងប្រធានាធិបតីចិន លោក ស៊ី ជិនពីង ក្រោយពីជំនួបក្នុងកិច្ចប្រជុំកំពូលអាស៊ីអាហ្វ្រិកនៅសាធារណរដ្ឋឥណ្ឌូនេស៊ី។
យោងតាមទីភ្នាក់ងារទូរទស្សន៍ជាតិកម្ពុជា (TVK)ក្នុងជំនួបពិភាក្សា នៅថ្ងៃទី២៣ មេសាលោកនាយករដ្ឋមន្ត្រី បានលើកនូវសំណូមពរមួយចំនួន ទៅកាន់ប្រធានាធិបតីចិន លោក ស៊ី ជិនពីង រួមមាន៖ ទី១ ស្នើដល់ភាគីចិនរក្សានូវអត្រាការប្រាក់លើកម្ចីនូវប្រាក់យន់ក្នុងស្ថានភាពដដែល។ទី២ ស្នើដល់ភាគី ចិន បង្កើនកូតានាំអង្ករចូលទៅកាន់ប្រទេសចិន ដោយសាតែកន្លងមកភាគីទាំងពីរបានឯកភាពនាំអង្ករចេញពីកម្ពុជា ទៅកាន់ប្រទេសចិនចំនួន១០ម៉ឺនតោន និងទី៣បង្កើនកិច្ចសហប្រតិបត្តិការពង្រីកការតភ្ជាប់នៅ កម្ពុជាទាំងផ្លូវដែក ផ្លូវទឹក ផ្លូវគោក ផ្លូវអាកាស ការតភ្ជាប់បណ្តាញអគ្គិសនី ប្រព័ន្ធធារាសាស្ត្រ តាមរយៈការប្រើប្រាស់ ផែនការផ្លូវសូត្រដែលជានយោបាយរបស់ចិន។
ជាការឆ្លើយតបប្រធានាធិបតីចិន លោក ស៊ី ជិនពីង មានប្រសាសន៍ថាភាគីចិននិងយកចិត្តទុកដាក់ពិចារណាលើបញ្ហានោះយ៉ាងសកម្មបំផុត ដើម្បីទទួលអង្ករនិងទំនិញផ្សេងៗពីកម្ពុជា។ លោក បន្ថែមថា ចិននឹងបន្តគាំទ្រដល់កម្ពុជា ក្នុងការកសាងនូវហេដ្ឋារចនាសម្ព័ន្ធឲ្យមានការរីកចំរើនថែមទៀត និងបានផ្តល់នូវសេចក្តីសង្ឃឹមថា នឹងរៀបចំនូវគំរោងជាមួយគ្នា នៃការតភ្ជាប់ស្របតាមគោលនយោបាយរបស់ចិន ៕
© រក្សាសិទ្ធិដោយ thmeythmey.com
