ជាតិ
សៀមរាបគ្មានអគ្គិសនីប្រើ៥ថ្ងៃព្រោះរលំបង្គោលភ្លើងតពីថៃជាង២០ដើម 24, Apr 2015 , 10:42 am
![](https://image.thmeythmey.com/pictures/2015/04/24/thumb2/11169095_908742845815835_685548772_n.jpg)
×![]()
សៀមរាប៖ ប្រជាពលរដ្ឋក្នុងខេត្តសៀមរាបប្រឈមនឹងការគ្មានចរន្តអគ្គិសនីប្រើរយៈពេល៥ថ្ងៃ។ មូលហេតុ ព្រោះថាបង្គោលភ្លើងជាច្រើនដើមនៅស្រុកក្រឡាញ់ ដែលតភ្ជាប់ពីអគិ្គសនីថៃ បានបាក់ដួលតម្រៀបគ្នាកាលពីល្ងាចថ្ងៃទី២២ មេសា ដោយសារប៉ះទង្គិចភ្លៀងលាយខ្យល់កន្ត្រាក់។
មានសំឡេង
ប្រធានអគ្គិសនីសៀមរាប លោក គង់ ពុទ្ធី បានបញ្ជាក់ថា រហូតមកដល់ថ្ងៃនេះ ខេត្តសៀមរាបគ្មានអគ្គិសនីប្រើរយៈពេល២ថ្ងៃកន្លះហើយ។ លោកថា ក្រុមការងារកំពុងញាប់ដៃ ជួសជុលបង្គោលភ្លើងដែលរលំនៅស្រុកក្រឡាញ់ កាលពីថ្ងៃ២២ មេសានោះ ហើយយ៉ាងយូរ ៣ថ្ងៃទៀត ខេត្តសៀមរាបនឹងមានអគ្គិសនីប្រើប្រាស់ ដូចធម្មតាវិញ។
លោក គង់ ពុទ្ធី បន្ថែមថា រហូតមកដល់ថ្ងៃនេះ កំលាំងចម្រុះដែលមានទាំងភាគីខ្មែរ និងថៃ មានចំនួន២៥០នាក់ ដែលកំពុងប្រតិបត្តិការ ដំឡើងបង្គោលភ្លើងថ្មីឡើងវិញ។ លោកបញ្ជាក់ថា បង្គោលដែលបានបាក់ និងខ្លះដួលទ្រេតទៅប៉ះនឹងផ្ទះប្រជាពលរដ្ឋនោះ មានរហូតដល់ទៅ២៦ដើម។ លោកសង្ឃឹមថា ប្រជាពលរដ្ឋទាំងអស់ នឹងមានការអធ្យាស្រ័យខ្ពស់ ចំពោះគ្រោះមហន្តរាយធម្មជាតិនេះ។
ក្រៅពីសុំអភ័យទោសដល់ប្រជាពលរដ្ឋក្នុងខេត្តសៀមរាបទាំងមូលហើយនោះ ប្រធានអគ្គិសនីសៀមរាប បានបញ្ជាក់ថា បច្ចុប្បន្នខាងអគ្គិសនី មានផែនការតខ្សែបណ្តាញពីប្រទេសថៃ បញ្ជូនតាមខេត្តបាត់ដំបង មកខេត្តសៀមរាប ដែលមានតង់ស្យុងរហូតទៅ ២៣០គីឡូវ៉ុល ដើម្បីជំនួសខ្សែបញ្ជូនសព្វថ្ងៃពីខេត្តបន្ទាយមានជ័យ ដែលមានកម្រិតតង់ស្យុងត្រឹម ១១៥គីឡូវ៉ុលតែប៉ុណ្ណោះ។ លោក ពុទ្ធី បន្ថែមថា ខ្សែបញ្ជូនពីបាត់ដំបង ក៏នឹងត្រូវបញ្ជូនបន្តទៅខេត្តកំពង់ធំ និងកំពង់ចាមបន្តទៀតផងដែរ។
សព្វថ្ងៃការប្រើប្រាស់អគ្គិសនីនៅក្នុងខេត្តសៀមរាប បានកើនឡើងដល់ ៦៨មេហ្គាវ៉ាត់ ដែលអគ្គិសនីក្នុងខេត្ត មានលទ្ធភាពផ្គត់ផ្គង់ត្រឹម១០ មេហ្គាវ៉ាត់តែប៉ុណ្ណោះ ដែលហេតុនេះ ធ្វើឲ្យអគ្គិសនីក្នុងស្រុក មិនអាចបំពេញតម្រូវការសម្រាប់ខេត្តទាំងមូលបាន។
គួររម្លឹកឲ្យដឹងដែរថា ក្នុងអំឡុងពេលដាច់ចរន្តអគ្គិសនីរយៈពេល៥ថ្ងៃ ការប្រើប្រាស់អគ្គិសនី១០មេហ្គាវ៉ាត់ របស់ខេត្ត ត្រូវឆ្លាស់គ្នាប្រើ ដោយនៅតំបន់ខ្លះ អាចប្រើអគ្គិសនីបានអំឡុងពេលម៉ោង៨ព្រឹក រហូតដល់ម៉ោង១រសៀល ហើយខ្លះទៀត មានពីពេលរសៀល រហូតដល់ល្ងាចជាដើម។ ដោយឡែកនៅពេលយប់ តំបន់មួយចំនួនធំ ត្រូវបានកាត់ផ្តាច់ ក្នុងនោះមានតំបន់ផាប់ស្ទ្រីតជាដើម ដោយអគ្គិសនី ត្រូវផ្គត់ផ្គង់សម្រាប់ខាងមន្ទីរពេទ្យ និងកន្លែងសំខាន់ៗតែប៉ុណ្ណោះ។ យ៉ាងណា គេសង្កេតឃើញកន្លែងលក់ដូរ កន្លែងកម្សាន្តមួយចំនួន បានបិទទ្វារ ខណៈដែលកន្លែងខ្លះទៀត ប្រើប្រាស់ម៉ាស៊ីនផ្ទាល់ខ្លួន ដើម្បីបន្តអាជីវកម្មពួកគេ៕
© រក្សាសិទ្ធិដោយ thmeythmey.com