ជាតិ
FUSAAC នឹងរៀបចំពិព័រណ៍ជំនាញសិក្សា និងការងារ លើកទី៦ នៅដើមខែឧសភា
24, Apr 2015 , 12:28 pm
×![]()
ដោយ: ថ្មីៗ
ភ្នំពេញ៖ សមាគមអតីតនិស្សិតអាហារូបករណ៍សហរដ្ឋអាមេរិក (FUSSAC) និងផ្នែកកិច្ចការ សាធារណៈរបស់ស្ថានទូតអាមេរិកនៅទីក្រុងភ្នំពេញ នឹងប្រារព្ធកម្មវិធី ពិព័រណ៍ជំនាញសិក្សា និងការងារ លើកទី៦ នៅថ្ងៃទី៣ ខែឧសភា ឆ្នាំ២០១៥ ។ កម្មវិធីនេះ នឹងប្រព្រឹត្តទៅពេញមួយថ្ងៃ នៅឯវិទ្យាស្ថានបច្ចេកវិទ្យាកម្ពុជា (សាលាតិចណូ)។
ពិព័រណ៍ជំនាញសិក្សា និងការងារ លើកទី៦ នេះ នឹងលើកប្រធានបទសំខាន់ពីរ យកមក ពិភាក្សា នោះគឺ «យុវជនក្នុងការអភិវឌ្ឍសង្គម» និង«វិនិយោគលើជំនាញដើម្បីការងារ»។ FUSSAC ចាត់ទុកថា ប្រធានបទទាំងនេះ អាចជួយផ្តល់ជាគន្លឹះដល់សិស្ស និស្សិតទាំងឡាយ ដែលបានចូលរួម សម្រាប់ការសម្រេចចិត្តលើ មាគ៌ាដ៏ត្រឹមត្រូវសម្រាប់ការជ្រើសរើសជំនាញ សិក្សា និងអាជីពនាថ្ងៃអនាគត។
លោក សូផា រតនា ប្រធានសមាគម FUSSAC បានបង្ហាញពីជំនឿជាក់ថា ពិព័រណ៍ M&C នឹងជួយឲ្យអ្នកចូលរួមទទួលបានព័ត៌មានដោយផ្ទាល់អំពីជម្រើសជំនាញសិក្សានៅ សាកលវិទ្យាល័យ និងការងារពីសំណាក់អ្នកជំនាញក្នុងវិស័យដែលពួកគេចាប់អារម្មណ៍ នៅពេលអនាគត។
លោកបញ្ជាក់ថា៖«ការជជែកពិភាក្សាផ្លាស់ប្តូរយោបល់ ដែលប្រព្រឹត្តទៅក្នុង ពិព័រណ៍ នឹងនាំឲ្យអ្នកចូលរួមទទួលបាននូវគំនិតយោបល់កាន់តែល្អប្រសើរ អំពីនិន្នាការនៃ ជំនាញការងារនៅកម្ពុជាទៅថ្ងៃអនាគត និងដែលនាំឲ្យពួកគេមានការរៀបចំខ្លួនបានល្អទុកជា មុន»។
បើតាមសេចក្តីប្រកាសព័ត៌មានរបស់ FUSSAC រដ្ឋមន្ត្រីក្រសួងអប់រំ លោក ហង់ ជួនណារ៉ុន ក៏នឹងអញ្ជើញថ្លែងចំណាប់អារម្មណ៍បើកកម្មវិធី និងដឹកនាំកិច្ចពិភាក្សាស្តីពីប្រធានបទ«ចំណែក យុវជនក្នុងការអភិវឌ្ឍសង្គម» ផងដែរ។
FUSSAC មានជំនឿថា យុវជនជាកម្លាំងចលករដ៏សំខាន់នៅក្នុងប្រទេសកម្ពុជា ពោលគឺស្រប ពេលដែលកម្ពុជាមានធនធានយុវជនរហូតជាង ៦០ភាគរយ។ វាពិតជាមានសារៈសំខាន់ដែល យុវជនជ្រើសរើសជំនាញសិក្សាបានត្រឹមត្រូវ និងអាជីពការងារបានសមប្រកបស្របតាម ទេព កោសល្យ ចំណង់ចំណូលចិត្ត និងតម្រូវការទីផ្សារការងារ ទនឹ្ទមគ្នានឹងការធ្វើសមាហរណកម្ម តំបន់ និងសកលលោករបស់កម្ពុជា។
លោក ហង្ស វុទ្ធិកា ប្រធានក្រុមប្រតិបត្តិនៃ ពិព័រណ៍ជំនាញសិក្សា និងការងារលើកទី៦ បានលើកឡើងថា នៅឆ្នាំនេះ FUSSAC នឹងព្យាយាមជំរុញសិស្សានុសិស្សចូលរួមឲ្យ បានកាន់តែច្រើនជាងឆ្នាំមុនៗ ។ លោកថា៖«សមាគមយើងនឹងរៀបចំយ៉ាងណាឲ្យត្រូវទៅ តាមចក្ខុវិស័យរបស់ក្រសួងអប់រំ និងផ្តល់ឱកាសដល់សិស្ស និស្សិតទូទាំងប្រទេសកម្ពុជា»។
ជាមួយគ្នានេះដែរ លោកបានសំណូមពរឲ្យសិស្សានុសិស្សជួយចែករំលែកព័ត៌មានដល់អ្នក នៅតាមបណ្តាខេត្តនានា ឲ្យមកចូលរួមក្នុងកម្មវិធី ពិព័រណ៍ជំនាញសិក្សា និងការងារលើកទី៦ នេះ ឲ្យបានច្រើនកុះករ ដើម្បីបំពេញគោលដៅ និងឆ្ពោះទៅកាន់ការងារក្នុងក្តីសុបិន្តរបស់ ពួកគេ។
ពិព័រណ៍ជំនាញសិក្សា និងការងារ នៅឆ្នាំ២០១៥ នេះ FUSSAC រំពឹងថា សិស្ស និស្សិតច្រើនជាង ២ពាន់នាក់ នៅតាមវិទ្យាល័យ និងសាកលវិទ្យាល័យនានាទាំងនៅរាជធានី ភ្នំពេញ និងតាមបណ្តាខេត្តមួយចំនួន នឹងមកចូលរួមច្រើនកុះករ។
ពិព័រណ៍ជំនាញសិក្សា និងការងារលើកទី៦នេះ ជាវេទិកាមួយដ៏សំខាន់សម្រាប់សិស្ស និស្សិត ដែលមានគោលបំណងស្វែងយល់អំពីខ្លួនឯង និងរៀបចំនូវគម្រោងអាជីពរបស់ខ្លួននៅថ្ងៃ អនាគត។ ពិព័រណ៍ខ្នាតធំមួយនេះ ក៏មានគោលដៅផ្តល់ឱកាសដល់សិស្ស និស្សិត និងសាធារណជន បានចូលរួមស្តាប់ នូវការចែករំលែកចំណេះវិជ្ជា និងបទពិសោធ នូវវិធី សាស្ត្រជ្រើសរើសជំនាញសិក្សា គន្លឺះក្នុងការទទួលបានអាហារូបករណ៍ រួមទាំងព័ត៌មានស្តីពី ស្ថានភាពទីផ្សារការងារក្នុងប្រទេសកម្ពុជា ពីសំណាក់ អ្នកជំនាញមកពីស្ថាប័ននានា និងអតីត និស្សិតអាហារូបករណ៍មកពីក្រៅប្រទេសនានា។
លោកអ្នកអាចទាក់ទងព័ត៌មានលម្អិតតាមរយៈ លោក អូន ឆេងប៉រ លេខទូរសព្ទ ០៩២ ៩៨៨ ៣៣៥ និងលោក សឿ បញ្ញា ទូរសព្ទលេខ ០១០ ៧៤៤ ៧២៧ និងសារអេឡិតត្រូនិច [email protected] ៕
© រក្សាសិទ្ធិដោយ thmeythmey.com
