ជាតិ
នយោបាយជាតិ
LDP ប្តឹងលោកស៊ន តារា ពីបទបរិហារកេរ្តិ៍ និងបទញុះញង់ឲ្យមានការរើសអើង
04, May 2015 , 8:15 pm
×![]()
ដោយ: ម៉ៅ សុផា
គណបក្សសម្ព័ន្ឋដើម្បីប្រជាធិបតេយ្យ បានដាក់ពាក្យបណ្តឹងទៅកាន់ព្រះរាជអជ្ញាអបសាលាដំបូងរាជធានីភ្នំពេញ ដើម្បីប្តឹងលោក ស៊ន តារា សាស្ត្រាចារ្យទស្សនវិជ្ជា នៃសាកលវិទ្យាល័យមួយនៅខេត្តសៀមរាប ពីបទបទបរិហារកេរ្តិ៍ និងបទញុះញង់ឲ្យមានការរើសអើង ។
គម្រោងនៃការប្តឹងលោកស៊ន តារា ពីសំណាក់ LDP បានក្លាយជាការពិតហើយ។ ក្នុងនាមជាអគ្គលេខាធិការរង និងជាអ្នកតំណាងឲ្យគណបក្សសម្ព័ន្ឋដើម្បីប្រជាធិបតេយ្យ លោក ឆឺយ ប៊ុនធឿន បានដាក់ពាក្យបណ្តឹងទៅកាន់ព្រះរាជអជ្ញាអមសាលារាជធានីភ្នំពេញ ដើម្បីប្តឹងលោក ស៊ន តារា ពីបទបរិហារេក្តិ៍ និង បទញុះញង់ឲ្យមានការរើសអើង នៅថ្ងៃទី០៤ ខែឧសភា ឆ្នាំ២០១៥ នេះ ។ នេះបើតាមការអះអាងរបស់លោក កូវ គា អ្នកនាំពាក្យគណបក្សសម្ព័ន្ឋដើម្បីប្រជាធិបតេយ្យ ។
លោកកូវ គា បញ្ជាក់ប្រាប់សារពត៌មានថ្មីៗថា មូលហេតុដែល LDP សម្រេចចិត្តប្តឹងលោកស៊ន តារា ដោយសារតែ បុគ្គលរូបនេះ បានសរសេរសំណេរបង្ហោះតាមទំព័រហ្វេសប៊ុករបស់លោក កាលពីថ្ងៃទី១៩ ខែមេសា ឆ្នាំ២០១៥ ទាក់ទងទៅនឹងការស្លាប់របស់ លោក បុប្ផា សិលា អតីតសកម្មជនគណបក្សដែលក្នុងសំណេរនោះសរសេរថា៖«សាច់ញាតិគ្រួសារសពប្អូនប្រុសបុប្ផាសិលាបានទូរស័ព្ទមកខ្ញុំនៅថ្ងៃនេះសុំឲ្យខ្ញុំជួយបង្ហោះពាក្យរបស់ពួកគាត់។ ពួកគាត់ផ្តាំថា ខឹម វាសនាបានផ្តល់ប្រាក់ជូនគ្រួសារសពហើយគ្រប់គ្រងបុណ្យនោះដោយទាញចូលទៅក្នុងកម្មវិធីបក្ស។ការស្លាប់របស់សិលា មិនពាក់ព័ន្ធនឹងបេសកកម្មបក្សទេគឺជាទំនាស់ធម្មតា ។ការលូកដៃរបស់ជួងធ្វើឲ្យប្អូនសិលាទទួលការស្អប់ខ្ពើមពីមហាជនយ៉ាងអយុត្តិធម៌ព្រោះគេគិតថាដោយសាតែវប្បធម៌ជេរប្រមាថអសីលធម៌ ទើបបណ្តាលឲ្យប្អូនស្លាប់ប្រែក្លាយពីទុក្ខសោកស្តាយ ទៅជាត្រេកអរពីមហាជនទៅវិញ» ។
បន្ទាប់មកនៅថ្ងៃទី២០ ខែមេសា ឆ្នាំ២០១៥ លោក ស៊ន តារា ក៏បានបង្ហោះសំណេរមួយទៀតថា៖ «យោងតាមវិទ្យុបារាំង RFI ឪពុក សិលាស្អប់មនោគមវិជ្ជា អសីលធម៌ជេរប្រមាថរបស់ ខឹម វាសនា។ តែក្រោយមក គាត់មានមោទនភាពក្រោមការជ្រោមជ្រែង យកចិត្តទុកដាក់ ពីជួង និងទទួលបានការសរសើរពីអ្នកជិតខាង។ នេះ បញ្ជាក់ថាការស្លាប់របស់ សិលា ពិតជាធ្វើឲ្យជួង ចំណេញ ទទួលបានអ្នកយល់ថ្មី (ធ្វើស្រែលើខ្នងសព)។ ចូរមើលឲ្យឃើញពីចេតនារបស់ វាសនា កុំមើលតែរូបភាព»។ ការបង្ហោះសំណេររបស់លោកស៊ន តារា ទាំងពីរលើកនេះ ត្រូវបានលោក កូវ គា អះអាងថា ជាការលាបពណ៌ដែលប៉ះពាល់ដល់កេរ្តិ៍ឈ្មោះរបស់លោក បុប្ផា សិលា និងគណបក្សខ្លួន ដែលជាហេតុនាំឲ្យគណបក្សសម្រេចប្តឹងលោក ស៊ន តារា ។
ឆ្លើយតបនឹងការប្តឹងនេះ លោកស៊ន តារាប្រាប់សារព័ត៌មានថ្មីៗថា លោកមានអារម្មណ៍ធម្មតា គ្មានអ្វីព្រួយបារម្ភទេ ហើយលោកបញ្ជាក់៖«ខ្ញុំមិនយកខ្មែរណាធ្វើជាសត្រូវទេ។តែបើការប្តឹងនេះមានអំពើអយុត្តិធម៌សម្រាប់រូបខ្ញុំ ខ្ញុំក៏អាចប្តឹងត្រឡប់ទៅវិញដែរ»៕
© រក្សាសិទ្ធិដោយ thmeythmey.com
