ជាតិ
នយោបាយជាតិ
វប្បធម៌សន្ទនាគ្នា៖ លោក ហ៊ុន សែន រៀបក្បួនរក្សាអំណាច លោក សម រង្ស៊ី រៀបក្បួនផ្ទេរអំណាចដោយសន្តិវិធី 08, May 2015 , 4:31 pm
![](https://image.thmeythmey.com/pictures/2015/05/08/thumb2/073___20150409001___3h8a6569.jpg)
×![]()
ស្ថានការណ៍នយោបាយនៅកម្ពុជា ក្នុងរយៈពេលចុងក្រោយនេះមានការប្រែប្រួលគួរឲ្យកត់សម្គាល់ បន្ទាប់ពីលោក ហ៊ុន សែន និងលោក សម រង្ស៊ី នាំគ្នាអនុវត្តវប្បធម៌សន្ទនាគ្នា។ វប្បធម៌សន្ទនាគ្នា ដែលលោកប្រមុខ ដឹកនាំបក្សទាំងពីរតែងតែនិយាយដូចគ្នាថា ធ្វើឡើងដើម្បីដោះស្រាយបញ្ហារបស់ជាតិ និងប្រជាពលរដ្ឋ ។ អ្នកវិភាគនយោបាយយល់ថា ហេតុផលសំខាន់នៅពីក្រោយវប្បធម៌សន្ទនាគ្នា ក្រៅពីបញ្ហាជាតិ លោកទាំងពីរកំពុងតែរៀបចំយុទ្ធសាស្ត្ររៀងៗខ្លួន ដើម្បីចំណេញនយោបាយ។ លោក សម រង្ស៊ី រៀបចំយុទ្ធសាស្ត្រលួងលោមឲ្យលោក ហ៊ុន សែន ផ្ទេរអំណាដោយសន្តិវិធី ឯលោក ហ៊ុន សែន រៀបក្បួនដើម្បីរក្សាអំណាចទៅមុខទៀត ។
មានក្បួនយុទ្ធសាស្ត្រចំនួន ២ សំខាន់ៗ ដែលលោក ហ៊ុន សែន និងលោក សម រង្ស៊ី កំពុងតែរៀបចំឡើងដើម្បីប្រយោជន៍រៀងៗខ្លួន ក្រោមស្លាកវប្បធម៌សន្ទនាគ្នា ដើម្បីដោះស្រាយបញ្ហាជាតិ និងប្រជាពលរដ្ឋ។ នេះជាអ្វីដែលអ្នកវិភាគនយោបាយ លោក អ៊ូ វីរៈ មើលឃើញនៅពីក្រោយវប្បធម៌សន្ទនាគ្នា រវាងលោក ហ៊ុន សែន និងលោក សម រង្ស៊ី ។ លោក អ៊ូ វីរៈ អត្ថាធិប្បាយថា តាមរយៈវប្បធម៌សន្ទនាគ្នា លោក ហ៊ុន សែន មានទិសដៅមួយសំខាន់ គឺចង់រក្សាអំណាចរបស់ខ្លួនឲ្យបានតទៅទៀត នៅក្នុងការបោះឆ្នោតអាណត្តិក្រោយ មានន័យថា លោក ហ៊ុន សែន ខំរក្សាប្រជាប្រិយភាពឲ្យប្រជាពលរដ្ឋបោះឆ្នោតជូនគណបក្សប្រជាជនកម្ពុជាឲ្យឈ្នះគណបក្សសង្គ្រោះជាតិ ដើម្បីលោកបន្តតំណែងជានាយករដ្ឋមន្ត្រី។
អ្នកវិភាគរូបនេះ បញ្ជាក់ដូច្នេះថា ៖ « លោក ហ៊ុន សែន គាត់ចង់បានស្ថានការណ៍នយោបាយខ្មែរបែបនេះ ពោលគឺបក្សទាំងពីរស្ងៀមស្ងាត់អនុវត្តវប្បធម៌សន្ទនាគ្នា ព្រោះគាត់មានអំណាចស្រាប់ហើយ។ គាត់រក្សាការស្ងៀមស្ងាត់របស់បក្សប្រឆាំងតាមរយៈវប្បធម៌សន្ទនាគ្នាឲ្យបានទៅ គឺគាត់នឹងឈ្នះទៀត ព្រោះគណបក្សប្រឆាំង ឈប់បានវាយប្រហារដ្ឋាភិបាល។ បើឈប់វាយប្រហាររដ្ឋាភិបាល ស្មើនឹងធ្វើឲ្យបក្សនេះបាត់បង់ប្រជាប្រិយភាព ព្រោះបក្សប្រឆាំង មិនអាចធ្វើអ្វីបានក្រៅពីរិះគន់នោះទេ ហើយបក្សកាន់អំណាចនឹងអាចកើនប្រជាប្រិយភាពថែមទៀត ។ វាឧបមាដូចជា នៅពេលដែលមានអំពើអយុត្តិធម៌កើតឡើង ហើយអ្នកឃ្លាំមើល មិននិយាយស្តី មិនរិះគន់នោះវាជាក្តីប្រថ្នារបស់អ្នកព្រឹត្ត » ។
ចំណែកឯកលោក សម រង្ស៊ី វិញ លោក អ៊ូ វីរៈ អះអាងថា លោកមេបក្សប្រឆាំងមិនមែនកំពុងអនុវត្តវប្បធម៌សន្ទនាគ្នាទេ តែលោក សម រង្ស៊ី កំពុងរៀបចំក្បួនយុទ្ធសាស្ត្រ លួងលោម លោក ហ៊ុន សែន ឲ្យមានការផ្ទេរអំណាចដោយសន្តិវិធី ប្រសិនបើគណបក្សប្រជាជនកម្ពុជាចាញ់ឆ្នោតអាណត្តិក្រោយ ។ លោកថា លោក សម រង្ស៊ី ជឿជាក់ថា ការបោះឆ្នោតលើកក្រោយគណបក្សសង្គ្រោះជាតិ នឹងទទួលបានជ័យជំនះ ។ « លោក សម រង្ស៊ី គាត់គិតថា ខ្លួនគាត់ឆ្លាត ដោយសង្ឃឹមថា បោះឆ្នោតលើកក្រោយយុវជនភ្លូកទឹកភ្លូកដី នឹងបោះឆ្នោតគាំទ្រគណបក្សសង្គ្រោះជាតិឈ្នះឆ្នោតដឹកនាំរដ្ឋាភិបាល ព្រោះគាត់យល់ថា ឆ្នាំ ២០១៣ យុវជនគាំទ្របក្សគាត់ច្រើនហើយ ចុះទម្រាំ ២០១៨ យុវជនឹងកើនឡើង ហើយការគាំទ្រក៏កើនឡើងដែរ » ។ នេះជាការវិភាគរបស់លោក អ៊ូ វីរៈ ។
អ្នកវិភាគរូបនេះ បានចាត់ទុកការរំពឹងទុករបស់លោក សម រង្ស៊ី ថា មិនត្រឹមត្រូវឡើយ ហើយប្រសិនបើនៅតែបន្តបែបនេះ អាណត្តិក្រោយគណបក្សសង្គ្រោះជាតិ អាចនឹងបរាជ័យជាថ្មី។ លោក ថា គ្រាន់តែយុទ្ធសាស្ត្ររបស់លោក សម រង្ស៊ី ចេញមក លោក ហ៊ុន ដឹងមុនជានិច្ច ។ លោក អ៊ូ វីរៈ បរិយាយដូច្នេះថា ៖ « លោក សម រង្ស៊ី កំពុងតែគិតខុស ។ កាលណាស្ថានភាពវានៅថេរដូចបច្ចុប្បន្ន វាចំណេញសម្រាប់បក្សប្រជាជន។ ម្យ៉ាងទៀត លោក សម រង្ស៊ី មិនពូកែទេ ហើយមិនអាចទៅរួចជាមួយលោក ហ៊ុន សែន ទេ ពីព្រោះលោក ហ៊ុន សែនមើលឃើញផ្លូវដើររបស់លោក សម រង្ស៊ី ១០០ ជំហានមុនឯណោះ។ លោក ហ៊ុន សែន មិនមែនអ្នកនយោបាយក្មេងខ្ចីទេ ។ គាត់ធ្លាប់មានបទពិសោធន៍ច្រើនណាស់ក្នុងរឿងនេះ» ៕
© រក្សាសិទ្ធិដោយ thmeythmey.com